रास्वपा सभापति लामिछाने (फाइल तस्बिर)
काठमाडौं– राष्ट्रिय स्वतन्त्र पार्टीका सभापति रवि लामिछानेको चितवनस्थित निवास (भाडाको घर)को छतबाट ‘खसेर’ उनका सवारी चालक गम्भीर घाइते भएका छन्।
आइतबार राति करिब १२ बजेतिर खाना खाएर सुतेका गाडी चालक सिन्धुपाल्चोक बाह्रबिसे नगरपालिका–३ घर भएका ३९ वर्षीय शम्भु भनिने दिलबहादुर थापा सोमबार बिहान करिब ३:५४ बजेतिर घरको छतबाट खसेका थिए।
भरतपुर महानगरपालिका–११ स्थित साढे २ तले घर लामिछानेले निजी आवासका रुपमा भाडामा लिएका छन्। आइतबार तनहुँको चुनावी कार्यक्रम सकेर रास्वपा सभापति लामिछाने, महामन्त्री मुकुल ढकाल र लामिछानेका सहयोगी तथा रास्वपा नेता दीपक बोहरा उक्त निवासमा बसेका थिए।
लामिछाने घरको भूइँ तलमा सुतेका थिए भने महामन्त्री ढकाल र बोहरा पहिलो तलामा सुतेका थिए। लामिछानेका सवारी चालक थापा र महामन्त्री ढकालका सवारी चालक दोस्रो तलामा सँगै सुतेका थिए।
सोमबार बिहान ३:४५ बजेतिर लामिछानेको घर अगाडि सुरक्षाका लागि ड्यूटीमा रहेका प्रहरीले लामिछानेका सवारी चालक थापा छतबाट खसेको थाहा पाएका थिए। प्रहरीले तत्काल उद्धार गरी थापालाई उपचारको लागि भरतपुरको पुरानो मेडिकल कलेज पुर्याएका थिए।
घरको छतबाट खसेका चालक थापाको अवस्था गम्भीर रहेको जिल्ला प्रहरी कार्यालय चितवनका प्रमुख, प्रहरी उपरीक्षक (एसपी) रामेश्वर कार्कीले नेपाल लाइभलाई जानकारी दिए।
‘सभापति (लामिछाने) र महामन्त्री ढकालका सवारी चालक घरको दोस्रो तलामा सँगै सुतेका भन्ने जानकारी मिलेको छ। खाना खाएर आइतबार राति सुतेका सवारी चालक थापा बिहान ३:५४ बजेतिर छतबाट खसेको देखेपछि हाम्रो (प्रहरीको) टोलीले उद्धार गरेर अस्पताल पुर्याएको हो,’ एसपी कार्कीले नेपाल लाइभसँग भने।
एसपी कार्कीका अनुसार थापा छतबाट खसेकोबारे आफूलाई केही जानकारी नभएको महामन्त्री ढकालका सवारी चालकको भनाइ छ। थापा छतबाट खस्दा ढकालका चालक सुतिरहेका थिए।
‘सँगै सुतेको हो, तर खसेको थाहा छैन भन्ने कुरा महामन्त्री ढकालका सवारी चालकको छ। यसबारे हामीले विस्तृत अनुसन्धान गरिरहेका छौं,’ एसपी कार्कीले भने।
वैशाख १० गते हुने प्रतिनिधि सभाको उपनिर्वाचनका लागि लामिछाने चितवन २ बाट प्रतिनिधि सभा सदस्यको उम्मेदवार छन्। लामिछाने सहितको टोलीले सोमबार बारा २ मा चुनावी प्रचार गर्ने कार्यक्रम थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1764146706.png)
