धनगढी– सुदूरपश्चिमको वैद्यनाथ बाहिनीमा निर्माण भएको सशस्त्र प्रहरी बल नेपालको फिल्ड अस्पताल सञ्चालनमा आएको छ। सशस्त्र प्रहरी महानिरीक्षक राजु अर्यालले उक्त अस्पताल उद्घाटन गरेका हुन्।
एपीएफले सातै प्रदेशमा स्कुल र अस्पताल स्थापना गर्ने लक्ष्य अनुसार उक्त अस्पताल निर्माण गरिएको जानकारी दिएको छ।
महानिरीक्षक अर्यालले संगठनले राष्ट्रसेवक सशस्त्र प्रहरी कर्मचारीहरूका लागि विभिन्न किसिमका कल्याणकारी कार्य एवं वृत्तिविकासमा विशेष ध्यान दिँदै कार्य गरिरहेको बताउँदै सशस्त्र प्रहरी कर्मचारीहरू अनुशासित, इमान्दार र पूर्ण व्यावसायिक भई प्राप्त जिम्मेवारी त्रुटिरहित ढंगबाट पूरा गर्न निर्देशन दिए।
कैलालीको गोदावरी नगरपालिका-१ स्थित सशस्त्र प्रहरी बल, नेपाल नम्बर ७ बैद्यनाथ बाहिनी मुख्यालय परिसरभित्र १५ शय्याको फिल्ड अस्पताल निर्माण भएको हो।
अस्पतालको निर्माण र सञ्चालनले सो क्षेत्रमा रहेका सशस्त्र प्रहरी बल, नेपालका बहालवाला तथा अवकाश प्राप्त कर्मचारीहरू र उनीहरुको परिवारका साथसाथै स्थानीय नागरिकहरूलाई समेत औषधि उपचारमा सहजता हुनेछ।
कार्यक्रममा सुदूरपश्चिम प्रदेश बैद्यनाथ बाहिनी मुख्यालय कैलालीका बाहिनीपति सशस्त्र प्रहरी नायब महानिरीक्षक कुमार न्यौपानेलगायत सशस्त्र प्रहरी बल, नेपालका अधिकृत, बिल्लादार जवान तथा स्थानीयको सहभागिता रहेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।