बारा- नेपाली कांग्रेसका केन्द्रीय सदस्य एवं पूर्वमन्त्री बालकृष्ण खाणले बारा-२ को उपनिर्वाचनमा गठबन्धनका साझा उम्मेदवार उपेन्द्र यादवलाई जिताउन खुलेर लाग्न बाराका कांग्रेसका नेता/कार्यकर्तालाई निर्देशन दिएका छन्।
बाराको महागढीमाई नगरपालिका–२ बरियारपुरमा शुक्रबार स्थापना गरिएको संयुक्त चुनावी सम्पर्क कार्यालयको उद्घाटन कार्यक्रममा बोल्दै पूर्वगृहमन्त्री खाणले बारा–२ मा जसपा अध्यक्ष उपेन्द्र यादवले पाँच दलीय गठबन्धनको प्रतिनिधित्व गरिरहेका कारण उनी नेपाली कांग्रेस समेतको उम्मेदवार भएको बताए। उनले कांग्रेस बाराका नेता र कार्यकर्ताहरूलाई खुलेर यादवलाई जिताउन चुनावी अभियानलाई अझ तीब्र र आक्रमक बनाउन निर्देशन दिए।
‘उपेन्द्रजी जसपा पार्टीको मात्र उम्मेदवार हुनुहुन्न। उहाँलाई पाँच दलीय गठबन्धनले उठाएको हो। उहाँ जति जसपाको उम्मेदवार हुनुहुन्छ, उत्तिकै कांग्रेसको पनि उम्मेदवार हुनहुन्छ। उहाँलाई जिताउने सम्पूर्ण कांग्रेसी नेता कार्यकर्ताहरूको कर्तव्य हो। कांग्रेसका सम्पूर्ण साथीहरूसँग म उपेन्द्रजीलाई जिताउन खुलेर लाग्न आग्रह गर्दछु।’
कार्यक्रममा जसपा अध्यक्ष यादवले बारा जिल्ला र समग्र मधेशको विकास र समृद्धि आफ्नो मूल चुनावी अजेण्डा भएको बताए। उनले निर्वाचनमा उम्मेदवारको पृष्ठभूमि र उसले गरेको कामको मूल्यांकन गरेर मतदान गर्न मतदाताहरूलाई आग्रह गरे। भ्रम फिजाएर मधेशका जनताबीच द्वन्द्व सृजना गर्नेबाट सावधान रहन आग्रह गर्दै उनले भने, ‘जातियता, बाहिरिया भित्रिया जस्तो द्वन्द्व सृजना गर्ने विषयको उठान गर्नेहरूसँग सावधान रहन आवश्यक छ।
‘बाहिरी शक्तिबाट परिचालितहरूले मधेशी जनताको भलोको बारेमा सोच्न सक्दैनन्। मधेशका लागि हालसम्म कसले के गरेको छ, मधेशी जनताले पाएको अधिकारको लागि कसले कति योगदान पुर्याएको छ। यसको मूल्यांकन गरेर मात्र मतदान गर्नुहोला’, यादवले भने।
लोसपा मधेश प्रदेशका अध्यक्ष जितेन्द्र सोनलले पनि उपेन्द्र यादवजस्तो नेता संसद् बाहिर रहनु संघीयताका लागि घातक भएको बताए। पछिल्लो समय संघीयतालाई कमजोर पार्ने शक्तिहरू सक्रिय भइरहँदा यसको संरक्षणका लागि आवाज उठाउन पनि उपेन्द्र यादवजस्तो नेताको संसद्मा उपस्थिति अपरिहार्य रहेको सोनलले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
