बारा– बारा–२ का प्रतिनिधि सभा सदस्य उम्मेदवार एवं जसपा अध्यक्ष उपेन्द्र यादवले दुई/दुई पटक संसद् विघटन गर्ने एमाले र विखण्डनको नारा लगाउने जनमत पार्टी देश र लोकतन्त्रका लागि निकै घातक रहेको टिप्पणी गरेका छन्।
बाराको पचरौता पालिकामा आयोजित गठबन्धनको संयुक्त चुनावी सभालाई शुक्रबार सम्बोधन गर्दै यादवले आफ्नो नीहित स्वार्थका लागि राष्ट्रपति पदको दुरुपयोग गरी एमालेले दुई पटक संसद् विघटन गरेको टिप्पणी गरे।
अहिले पनि जनमत पार्टीको आन्तरिक अजेन्डा मधेश विखण्डन नै रहेकाले यी दुवै दल लोकतन्त्र र सिंगो मुलुकका लागि अत्यन्तै घातक भएका यादवको आरोप छ।
कुनैपनि विधेयक संसद्बाट पारित भइसकेको अवस्थामा त्यसलाई रोक्ने अधिकार कसैको नरहेको र नागरिकता विधेयक रोकेर तत्कालनी राष्ट्रपति विद्या भण्डारीले लाखौं युवालाई अवसरबाट वञ्चित गराएको यादको टिप्पणी छ।
बारा जिल्ला इतिहास निर्माण गर्ने किल्ला रहेको बताउँदै यादवले काठमाडौंलाई बसोबास योग्य बनाउने बाराबासी नै रहेको समेत उल्लेख गरे। यादवले बाराकै नागरिक हरिसिंह देवले काठमाडौंको सभ्यता र संस्कृति स्थापित गराएको दाबी गरे।
मधेश जनविद्रोहमा बाराबासीको ठूलो योगदान रहेको चर्चा गर्दै त्यही योगदानको प्रतिफल स्वरुप आज मधेश प्रदेशको मुख्यमन्त्री तथा मुलुककै दोस्रो शीर्ष स्थान उपराष्ट्रपति पनि बाराबासीले पाएको उनले उल्लेख गरे।
प्रतिगमनकारी शक्तिविरूद्ध र लोकतन्त्रको रक्षाका लागि अहिलेको गठबन्धन बनेको जिकिर गर्दै उनले विभिन्न कुतत्वहरूले संघीयता र लोकतन्त्रमाथि प्रहार गरिरहेको जिकिर गरे।
अध्यक्ष यादवले मुलुकको हित र लोकतन्त्रको रक्षाका लागि गठबन्धनको साझा उम्मेदवारहरूको विजय अपरिहार्य रहेको तर्क समेत गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
