काठमाडौं– शिक्षा विज्ञान तथा प्रविधि मन्त्रालयले शिक्षासँग सम्बन्धित सूचना प्राप्त गर्न सकिने मोबाइल एप प्रयोगमा ल्याएको छ।
मन्त्रालयले शैक्षिक सूचना तथा तथ्यांक हरेक व्यक्तिको पहुँचमा पुर्याउने उद्देश्यले विकास गरिएको शैक्षिक सूचनाहरू सङ्ग्रहित रहने मोबाइल एप एजुकेशन इन्फरमेसन सञ्चालनमा ल्याएको हो।
वार्षिक बजेट तथा कार्यक्रमसँग सम्बन्धित प्रगति विवरण अनलाइनबाट संकलन गर्न सक्नेगरी विकास गरिएको अनुगमन सफ्टवेयर प्रणाली सञ्चालनमा ल्याउने निर्णय गरेको मन्त्रालयले जनाएको छ।
शिक्षामन्त्री अशोक कुमार राईले मन्त्रालयका सचिव, सहसचिव तथा विभागीय प्रमुखहरूसँग सर्वसाधारणले प्रयोग गर्न सक्नेगरी विकास गरिएको मोबाइल एपका साथै मन्त्रालय र अन्तर्गतका निकायहरूले प्रयोगमा ल्याउने सफ्टवेयरको प्रयोगको विषयमा छलफल तथा अन्तरक्रिया समेत गरेको मन्त्रालयले जनाएको छ।
मन्त्रालयले विकास गरेको शैक्षिक सूचनाहरू सङ्ग्रहित रहने मोबाइल एप एजुकेशन इन्फरमेसन एन्ड्रोइड मोबाइलहरूमा डाउनलोड गरी प्रयोग गर्न सकिने मन्त्रालयले जनाएको छ।
बजेट तथा अनुगमन सफ्टवेयर तत्काललाई परीक्षणको रूपमा प्रयोगमा ल्याई आगामी आर्थिक वर्षको बजेट कार्यान्वयनसँगै आगामी साउन १ गतेदेखि पूर्ण रूपमा कार्यान्वयनमा लउने लक्ष्य राखिएको मन्त्रालयका प्रवक्ता दीपक शर्माले जानकारी दिएका छन्।
उक्त एपबाट प्रतिवेदन प्रणालीमा देखिएको समस्या समाधान गर्नका लागि संघ, प्रदेश र स्थानीय तहले आ–आफ्नो युजरनेम र पासवर्ड राखेर कार्यक्रम अपलोड गर्न र उक्त कार्यक्रमका सम्बन्धमा भएको प्रगति विवरण भर्न सक्ने मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
