काठमाडौं– आइतबार राष्ट्रिय स्वतन्त्र पार्टीबाट समानुपातिक सांसदमा निर्वाचित ढाकाकुमार श्रेष्ठको दुई करोडको लेनदेनको अडिओ सार्वजनिक भयो। मेडिकल व्यवसायी दुर्गा प्रसाईंसँग स्वास्थ्यमन्त्री रास्वपाले पाएको र आफू स्वास्थ्यमन्त्री बन्न लागेको भन्दै २ करोड माग गरेको श्रेष्ठको अडिओ बाहिरिएको थियो।
वैकल्पिक राष्ट्रिय पार्टीको रुपमा उदाएको रास्वपाका साांसदहरु एकपछि अर्को विवादमा मुछिएसँगै सामाजिक सञ्जालमासमेत उक्त पार्टी र पार्टीका नेताप्रति अनेकौं खालमा टीकाटिप्पणी भइरहेका छन्। यसअघि सरकारमा सहभागी हुँदा पनि रास्वपाले स्वार्थ बाझिएका र विवादित मन्त्री बनाएको भन्दै सामाजिक सञ्जालमा चर्को आलोचना भएको थियो।
नागरिकता प्रकरणमा आफैं दोषी रहेका रास्वपा सभापति रवि लामिछाने गृहमन्त्री, म्यानपावरसञ्चालकसमेत रहेका डोलप्रसाद अर्याललाई श्रममन्त्री, शिक्षा कन्सलटेन्सीसँग जोडिएका शिशिर खनाललाई शिक्षामन्त्री बनाएको भन्दै चर्को विरोध भएको थियो। साथै आइतबारको अडिओ संवादले स्वास्थ्यसँग स्वार्थ बाझिनेलाई स्वास्थ्यमन्त्री बनाउन खोजेको भन्दै सामाजिक सञ्जालदेखि सदनसम्म आलोचना भइरहेको छ।
सोमबारको संघीय संसद् (प्रतिनिधि सभा/राष्ट्रिय सभा) बैठकमा सांसदहरुले उक्त विषय उठान गरेका छन्। अधिकांश सांसदहरुले बैठकमा सांसद श्रेष्ठलाई छानबिन गरी कारबाही गर्न सरकारसँग माग गरेका छन्।
छानबिन समिति बनाउन माग
नेपाली कांग्रेसका उपसभापति तथा प्रतिनिधिसभा सदस्य धनराज गुरुङले विवादास्पद अडिओ प्रकरणमा मुछिएका रास्वपा सांसद श्रेष्ठको सन्दर्भमा संसदीय समिति गठन गरेर छानबिन गर्नुपर्ने माग गरे। प्रतिनिधि सभाको सोमबारको बैठकमा आकस्मिक समय लिएर बोल्दै सांसद गुरुङले उक्त माग गरेका हुन्।
‘त्यो वार्तामा (आडिओमा) भनिएको छ, कोर टिमलाई बुझाउनुपर्छ। त्यो कोर टिम भनेको को हो? त्यसको पनि छानबिन गर्नु पर्दैन? त्यसकारण यसको छानबिनको लागि आज यो संसद्भित्रको एउटा प्रतिनिधि सभाको सदस्यले गरेको वार्ताको सन्दर्भमा, भ्रष्टचारको सन्दर्भमा यो संसद् चुप लागेर बस्नु हुँदैन,’ गुरुङले भने, ‘त्यसकारण आजको यही बैठकबाट एउटा संसदीय समिति बनाएर यो घटनाको निष्पक्ष छानबिन गर्न म माग गर्दछु।’
त्यसैगरी बैठकमा नेपाल मजदुर किसान पार्टीका सांसद प्रेम सुवालले वर्तमान गठबन्धनको सरकारले सिंहदरबारलाई भ्रष्टाचारको अखडा बनाउन खोजेको आरोप लगाए। उनले गठबन्धन सरकारकै सांसदले स्वास्थ्यमन्त्री हुन मेडिकल व्यवसायीसँग २ करोड घुस मागेको अडिओ सार्वजनिक भएसँगै सिंहदरबारलाई भ्रष्टाचारको अखडा बनाउन खोजिएको बताएका हुन्। सांसद सुवालले गठबन्धनका नेताहरुले घुस काण्डका विषयमा संसद्मा जानकारी दिन मागसमेत गरे।
प्रतिनिधि सभा सदस्य ऋषिकेश पोखरेलले पछिल्लो साढे दुई वर्षको अवधिमा मुलुक इतिहासमै कमजोर भएको टिप्पणी गरे। उनले हाकाहाकी ब्रमलुट गर्ने मानसिकता तयार भएको बताए।
सांसद पोखरेलले भने, ‘हिजो मात्रै हामीले सुन्यौं,स्वास्थ्यमन्त्रीको भाउ दुई करोड रहेछ। अरु अरु मालदार मन्त्रीहरुको यो गठबन्धन सरकारमा कति होला? एउटा चाहिँ एक्सपोज भयो। जसले भ्रष्ट मानसिकता समाजमा विछिप्त बनायो।’ उनले दल र दलका नेताप्रति सामाजिक रुपमै बहिस्करणको अवस्थामा पुर्याएको बताए।
राष्ट्रिय सभामासमेत चर्को बहस
राष्ट्रिय सभाको विशेष समयमा बोल्दै सांसद उदयबहादुर बोहोराले मेडिकल व्यवसायी दुर्गा प्रसाईं र रास्वपा सांसद ढाकाकुमार श्रेष्ठको दुई करोडको बार्गिनिङ अडिओ हाम्रो राजनीति कतातिर जाँदैछ भन्दै प्रश्न गरे।
उनले भने, ‘हिजो २६ गते राष्ट्रिय स्वतन्त्र पार्टीका सांसद ढाकाकुमार श्रेष्ठलाई निलम्बन पनि गरिसक्यो। ७२ घण्टाभित्र छानबिन गर्ने भनेर रवि लामिछानेले आफ्नो अभिव्यक्ति दिइसके। दुर्गा प्रसाईंबाट दुई करोड स्वास्थ्यमन्त्री बन्नको लागि र त्यो स्वास्थ्यमन्त्री बने वाफत दुर्गा प्रसाईंलाई लेटर अफ इन्टेन्ट दिने। त्यो त शिक्षा मन्त्रालयले दिने हो। त्यति पनि थाहा रहेन छ विचरालाई,’ उनले भने, ‘स्वास्थ्य मन्त्रालयले एड्वाई लिटर दिन सक्दैन।’
दुर्गा प्रसाईंलाई मेडिकल कलेज चाहिएको र अडिओलाई झुटो हो भन्ने कुरा आइरहेकाले आफूलाई त्यो कुरा झुटो हो भन्ने नलागेको उनको भनाइ छ। उनले यस प्रकरणमा सरकारले तत्काल छानबिन गर्न माग गरे।
त्यसैगरी राष्ट्रिय सभा सदस्य भुवनबहादुर सुनुवारले मन्त्री बन्नका लागि अनेक खालका विकृति भइरहेकोले त्यसलाई नियन्त्रण गर्नुपर्ने माग गरे। राष्ट्रिय सभा बैठकमा नेकपा (एमाले) की सांसद दिलकुमारी थापा रावल (पार्वती)ले २ करोड घुस माग्ने सांसद ढाकाकुमार श्रेष्ठबारे सत्यतथ्य छानबिन गरी कारबाही गर्न सरकारसँग माग गरिन्। उनले घुस लिने र दिने दुवै राष्ट्रको शत्रु भएकाले सांसद श्रेष्ठले घुस माग गरे/नगरेको सत्यतथ्य छानबिन गर्नुपर्ने बताइन्।
उनले त्यस्ता घटना सत्य भए/नभएको तथ्य बाहिर ल्याउन सरकारले तत्काल समिति बनाएर छानबिन गर्नुपर्ने बताइन्। सांसद रावलले सरकारलाई संविधान र कानुन अनुसार अघि बढ्न पनि ध्यानाकर्षण गराएकी छन्।
अडियो प्रकरणबारे रास्वपाले संसद्मै माग्यो माफी
रास्वपा सांसद डा ढाकाकुमार श्रेष्ठको अडिओ सार्वजनिक भएसँगै सोही पार्टीका संसदीय दलका प्रमुख सचेतक सन्तोष परियारले उक्त प्रकरणबारे पार्टीका तर्फबाट प्रतिनिधि सभामा माफी मागेका छन्।
उनले अडिओ सार्वजनिक भएको घटनाले प्रतिनिधि सभा सदस्यको सम्मानमा परेको चोटप्रति क्षमा याचना गरे। अडिओ सार्वजनिक भएपछि रास्वपाले श्रेष्ठलाई जिम्मेवारीबाट मुक्त गरी ७२ घण्टाभित्र स्पष्टीकरण दिन निर्देशन दिएको र पार्टीको अनुशासन समितिले छानबिन गरिरहेको परियारले जानकारी गराए।
उनले घुस मागेको अडिओ सार्वजनिक भएको घटना पहिलो पटक नभएको भन्दै विगतमा पनि यस्ता घटना भएको र सबैको सत्यतथ्य छानबिन हुन आवश्यक रहेको बताए। उनले सुशासन र भ्रष्टाचारविरुद्धको अभियान आफ्नो पार्टीको प्रमुख अभियान भएको दाबी गरे।
उनले भने, ‘राष्ट्रिय स्वतन्त्र पार्टी सुशासन र भ्रष्टाचार विरुद्धको अभियानलाई आफ्नो प्रमुख अभियान ठान्दछ। राष्ट्रिय स्वतन्त्र पार्टी लोकतन्त्रलाई मान्दछ। राष्ट्रिय स्वतन्त्र पार्टी संविधानवादलाई मान्दछ। राष्ट्रिय स्वतन्त्र पार्टी विधि र विधानलाई मान्दछ।’
उनले भ्रष्टाचारको कुनै जाति र वर्ग नहुने स्पष्ट पारे। उनले अडिओ प्रकरणलाई पार्टीले गम्भीर रुपमा लिएको बताए। आफ्ना सांसदको घटना नेपालको सन्दर्भमा पहिलो नभएको दाबी गर्दै उनले यस्ता सम्पूर्ण घटनाको सत्यतथ्य छानबिन गर्नुपर्ने माग गरे।
लेनदेन सम्बन्धी अडियो सार्वजनिक भएसँगै रास्वपाका सभापति रवि लामिछानेले उक्त प्रकरणमा अनुसन्धान गर्नका लागि प्रहरी प्रशासन र अख्तियार दुरुपयोग अनुसन्धान आयोगलाई सघाउने उद्घोष गरेका छन्। सांसद श्रेष्ठलाई कारबाही नगरे गढीमाईमा आफू बली चढ्नका लागिसमेत तयार भएको आइतबार लामिछानेले घोषणा गरिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
