काठमाडौं– राष्ट्रिय स्वतन्त्र पार्टीका सांसद मनिष झाले मन्त्री बनाउनका लागि पार्टी नेतृत्वले रकम लिने गरेको भन्ने भनाईप्रति विश्वास गर्न नसकिने बताएका छन्।
पार्टीका सभापति रवि लामिछानेले करोडौं रुपैयाँ लिएर मन्त्री बनाउने गरेको चर्चा भइरहेका बेला सांसद झाले यसमा आफूले विश्वास गर्न नसक्ने बताएका हुन्।
सोमबार संघीय संसद् भवन परिसरमा सञ्चारकर्मीहरूले राखेका जिज्ञासाको जवाफ दिने क्रममा उनले पार्टी सभापति लामिछानेले मन्त्री बनाउनका लागि रकम असुली गरेको पुष्टि गरेको देखाउन चुनौती दिए। नेपाली कांग्रेसमा आवद्धहरूले ट्वीटरमा पार्टी नेतृत्वले शिक्षामन्त्री बनाउनका लागि ८ करोड लिएको भनेर लेखेको आफूले पनि देखेको उल्लेख गर्दै सांसद झाले पुष्टि गरेको देखाउनुपर्ने बताए।
उनले पार्टी नेतृत्वले पार्टीका निलम्बित सांसद ढाकाकुमार श्रेष्ठसँग मन्त्री बनाउनका लागि साढे २ करोड मागेको भन्ने कुरा पनि सत्य नभएको जिकिर गरे। मन्त्री बनाउनका लागि पार्टी नेतृत्वलाई २ करोड दिनुपर्ने भन्दै व्यवसायी दुर्गा प्रसाईंसँग पैसा मागेको अडियो आइतबार सार्वजनिक भएपछि रास्वपा सांसद श्रेष्ठ निलम्वित भएका छन्। सांसद झाले भने पार्टी नेतृत्वबाट त्यस्तो काम नभएको, बरु आरोप लगाउने कांग्रेस पार्टीभित्र भने त्यस्तो हुने गरेको प्रमाण आफूहरूसँग रहेको दाबी गरेका छन्। उनले दोषीलाई कारबाही गरेर देखाउन पनि कांग्रेस नेतृत्वलाई चुनौती दिएका छन्।
‘मैले पनि ट्वीरमा केही कांग्रेसीजनले लेखेको, ८ करोड रुपैयाँ शिक्षामन्त्री बन्नलाई माग्यो भनेर देखेको थिएँ। त्यसमा म विश्वास गर्दिनँ। त्यो स्टयाटस लेखेर चुनावका बेलामा स्टन्ट गर्ने हो भने कति दाई भाउजुले के–के लिए भन्ने कुरा त हामीलाई पनि थाहा छ नि! हामीले प्रमाण पेस गरेपछि कारबाही गर्छ त्यो दलले? म चुनौती गर्न चाहन्छु’, झाले भने, ‘कति पटक हामीले सुनेका छौ| नि। कहिल्यै यस्तो अभिव्यक्ति र निलम्बन गरेको छ त्यो दलले। त्यो पार्टीहरूले। सुनेर पनि ढाकछोप गर्न खोजेको होइन र?’
सांसद झाले विवादमा परेपछि निलम्बनमा परेका सांसद श्रेष्ठसँग पार्टीले सम्बन्ध विच्छेद गरेको पनि स्पष्ट पारे। छानबिनका लागि पार्टीका सदस्यहरूलाई प्रभाव पार्नसक्ने भन्दै आफूहरूले निलम्बित सांसद श्रेष्ठसँग सम्बन्ध विच्छेद गरेर छानबिनको प्रक्रियालाई अघि बढाउनु परेको उनले बताए। झाले आरोप पुष्टि भए निलम्बित सांसद श्रेष्ठमाथि कारबाही हुने पनि बताए।
सांसद झाले निलम्बित सांसद श्रेष्ठलाई जोगाएर आफूहरूले मतदाताको मतमाथि विश्वासघात नगर्ने पनि दोहोर्याए। व्यवसायी प्रसाईंसँगको अडियो प्रकरण सार्वजनिक भएलगत्तै आइतबार सांसद श्रेष्ठलाई निलम्बन गरी ७२ घण्टाभित्र छानबिन गरी आरोप पुष्टि भए कारबाही गर्ने रास्वपाले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
