काठमाडौं– तनहुँ निर्वाचन क्षेत्र नम्बर १ मा बैशाख १० गते हुने उपनिर्वाचनका लागि कांग्रेस नेतृत्व पार्टीका पुराना नेता गोविन्दराज जोशीलाई फकाउन लागिपरेको छ।
सोमबार मात्रै कांग्रेस सभापति शेरबहादुर देउवाले नेता जोशीका छोरा दीपकराज जोशीलाई आफ्नो निवासमा बोलाएर छलफल गरेका छन्। यसअघि देउवाले जोशीविरुद्ध पार्टीले गरेको कारबाही फिर्ता लिने निर्णय गरेका थिए।
नेपाली कांग्रेसले तनहुँ–१ मा गोविन्द भट्टराईलाई उपनिर्वाचनका लागि उम्मेदवार बनाएको छ। गत निर्वाचनको परिणाम अनुसार कांग्रेस बलियो देखिए पनि कांग्रेस परित्याग गरेर रास्वपाबाट चुनाव लड्न लागेका स्वर्णीमविरुद्ध कांग्रेस त्रसित रहेको छ। जसका कारण कांग्रेसले उक्त क्षेत्रका पुराना नेता जोशीलाई फकाउने कोशिस गरिरहेको छ। भट्टराईलाई सहज रुपमा निर्वाचनमा जित दिलाउनका लागि कांग्रेसबाट छुट्टिएका पूर्व सहमहामन्त्री जोशीलाई कांग्रेस नेतृत्वले पार्टीमा मिलाउन प्रयास गरिरहेको छ।
विगतमा देउवा समूहमै बसेर काम गरेका जोशीले तनहुँमा रामचन्द्र पौडेललाई सधैं प्रतिरोध गर्ने गरेका थिए। गत मंसिर ४ को निर्वाचनमा पनि उनी पौडेलविरुद्ध उभिएका थिए। तनहुँको कांग्रेस राजनीतिमा पौडेल र जोशीको गुट बेलाबेला चर्चामा आउनेसमेत गरेको थियो। तर गएको २५ फागुनमा रामचन्द्र पौडेल राष्ट्रपतिमा निर्वाचित भए पछि कांग्रेस जोशीलाई पार्टीमा मिलाएर उपनिर्वाचन आफ्नो पक्षमा पार्ने रणनीतिमा देखिन्छ।
जसका लागि जोशीसँग महामन्त्री गगन थापा, सहमहामन्त्री जिवन परियारसहित केन्द्रीय सदस्य मोहन बस्नेतलेसमेत यसअघि नै छलफल गरिसकेका छन्। सोमबार कांग्रेस सभापति देउवाले पार्टीका अधिकारिक उम्मेदवारको पक्षमा खुल्न आग्रह गरेको जोशीका छोरा दीपकराज जोशीले नेपालाइभलाई बताए।
दीपकराज गत स्थानीय निर्वाचनमा नहुँको व्यास नगरपालिकामा स्वतन्त्र उम्मेदवार बनेका थिए। अहिले उपनिर्वाचनलाई लिएर कांग्रेसको शीर्ष नेतृत्वले गरेको छलफल कुनै निष्कर्षमा नपुगेको उनले बताए।
‘हामीले आफ्ना कुराहरु महामन्त्री थापा र सहमहामन्त्री परियारलाई लिखित रुपमै पनि दिएका छौं,’ जोशीले भने, ‘कांग्रेस बलियो बनाउने हो मनसाय हो भन्ने उहाँहरुले ती कुरा सम्बोधन गर्नुपर्ने हुन्छ।’ सोमबार कांग्रेस सभापति देउवाले उपनिर्वाचनमा सघाउनबाहेक आफूहरुको माग सम्बोधनबारेमा कुनै ठोस कुरा नगरेको उनको भनाइ छ।
कांग्रेस कार्यसम्पादन समितिले आफूमाथिको कारबाही फिर्ता लिने निर्णय गरेपछि जोशीले त्यसलाई जालझेलको संज्ञा दिएका थिए। उनले आफूहरुसँगै यसअघि पार्टीबाट विद्रोह गरेका सम्पूर्ण पूर्वसहकर्मीहरुलाई पनि सम्बोधन गर्नुपर्ने माग अघि सारेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
