काठमाडौं- नगरिकता प्रकरणमा सर्वोच्च अदालतको एक फैसलाले पदमुक्त भएका राष्ट्रिय स्वतन्त्र पार्टीका सभापति रवि लामिछाने पुन: सांसद बन्ने दौडमा छन्। उनी यतिबेला मत माग्दै चितवन- २ का मतदाताका घरघर पुगिरहेका छन्।
मंसिर ४ को निर्वाचनअघि मैजुदा दलहरुमाथि निर्मम प्रहार गर्दै मत मागेका लामिछाने त्यसको ५ महिनापछि हुन लागेको उपनिर्वाचनमा भने उही भाव र भङ्गीमा फरक अभिव्यक्तिका साथ मत मागिरहेका छन्।
यो बीचमा उनी उपप्रधानमन्त्रीसहित गृह मन्त्रालयको जिम्मेवारीमा थिए। अदालतको फैसालासँगै एकै चोटी ती पद गुमाउन पुगेका लामिछाने आफ्ना मतदातालाई आफू पुरानो सम्बन्ध ताजगी गर्न मात्र मत माग्न आएको बताइरहेका छन्। मंसिर ४ को माया वैशाख १० गते पनि पाउनेमा विश्वस्त रहेको उनी बताउँछन्।
मंसिर ४ अघि प्रमुख दलहरु सत्ता र भ्रष्टाचारको दलदलमा रहेकोले तिनीहरुसँग ‘घाँटी’ नजोड्ने धारणा सहितको बलले निर्वाचित भएका लामिछाने तिनै दलहरुसँग सत्ताको खेलदौडमा लाग्दा भने सत्ता र वर्तमान वातावरणलाई फरक किसिमले ब्याख्या गर्छन्।
नागरिकता प्रकरणमा आफ्नो गल्तीलाई खास कमजोरी नठान्ने उनी जनताको मतलाई खोट लगाउने प्रयास गरेको भन्दै आक्रोश व्यक्त गर्छन्।
‘परिबन्दले, परिस्थितिले कहाँ पुर्याोयो, तपाईंहरुले देख्नुभएको छ। मैले हिजो यहीँ उभिएर वाचा गरेको थिएँ, तपाईंहरुको लागि काम गर्ने भनेर। महिलाका लागि, पछाडि परेकाहरुको लागि काम गर्छु भनेको थिएँ। तर समय र परिस्थितिले कुन अवस्थामा गुज्रिएको छु, तपाईंहरुले सबै देख्नुभएको छ। म आफ्नो तर्फबाट भएको त्रुटिलाई सुधार्न सकौँला तर तपाईंले दिनुभएको भोटमा कुनै पनि खोट छैन,’ जनता सामु मत माग्दै लामिछाने भन्छन्, ‘म त्यो भाग्मानी छोरो हुँ, जसलाई चितवनकी आमाले आफैंले जन्माएको छोरालाई भन्दा बढी माया गर्नुभएको छ। म त्यो भाग्यमानी छोरो हुँ, जसका लागि आफ्नो जिन्दगीमा भएका दशा टरुन् भनेर आमाहरुले भाकल गर्नुभएको छ।’
रवि भन्छन्, ‘तपाईंहरुले हिजो गरिसक्नुभएको मायालाई फेरि वैशाख १० गते हामीले माया गरेकै हो भनेर छाप लगाउनुपर्ने भयो। र, भन्नुपर्ने भयो, यो भाइको यो छोराको, नातिको, भतिजको प्रक्रियामा त्रुटि छ होला तर हाम्रो भोटमा कुनै त्रुटि छैन। यसको काम प्रक्रियामा केही त्रुटि होला, खोट होला तर हाम्रो भोटमा खोट छैन। अब यसलाई चोट नदेऊ भनेर तपाईंले वैशाख १० मा भन्दिनु पर्यो।’
आफ्नो पार्टी र आफूलाई घेराबन्दीमा पार्न लागिएको भन्दै जनतालाई त्यो चिर्न सहयोग गर्न अपिल गर्छन् लामिछाने।
‘मलाई विरोधीको घेराबन्दीमा पार्ने काम भइरहेको छ। हिजो तपाईंहरुले हुर्काएको फूललाई चिमोट्ने, चुँड्ने र फाल्ने काम भइरेहको छ। यो काम तपाईंहरुले देख्नुभएको छ। घरमा बसेर तपाईंहरुका आँखा रसाएका छन्। मेरो पनि आँखा नरासाएको हैन। तर भन्दैआएको छु, तपाईंको आँखाको त्यो आँसुलाई आँखाको डिलबाट खस्न नदिनु होला। किनभने, अहिले खस्यो भने दु:खको आँसु हुन्छ, वैशाख १० पछि खस्यो भने त्यो खुसीको आँसु हुन्छ,’ मत माग्दै लामिछाने भन्छन्।
यस्तै, आफू केही समय सरकारमा रहँदा जनताको पक्षमा काम गरेको भन्दै पुन: मत दिन लामिछाने आग्रह गर्छन्।
‘भोट जितेर त जो पनि जान सक्छ तर म भन्न सक्छु, म मन जितेर गएको थिएँ। मैले वाचा गरेको थिँए, महिलाको लागि काम गर्छु। मैले उपप्रधानमन्त्री तथा गृहमन्त्री हुँदा पहिलो निर्णय गरेँ, छोरी निर्मला पन्तको बलात्कारीलाई कारबाही गर्छु भनेर,’ उनको दाबी छ, ‘त्यहाँ कमिसन खान पाइने फाइल थिए। तर त्यस्ता फाइलहरुमा आँखा लगाएको छैन।’
कस्तो छ, चितवन- २ को इतिहास
मंसिर ४ गते भएको निर्वाचनमा पहिलो पटक प्रतिनिधि सभा निर्वाचनमा भाग लिइरहेको राष्ट्रिय स्वतन्त्र पार्टीका सभापति रवि लामिछाने चितवन- २ बाट उम्मेदवार बने। उनी उम्मेदवार मात्र बनेनन्, एमालेको पकड क्षेत्र मानिएको क्षेत्रबाट एमाले र कांग्रेसका उम्मेदवारलाई हराउँदै भारी मतसहित निर्वाचित भए।
एमालेका तत्कालीन सांसद कृष्णभक्त पोखरेल र नेपाली कांग्रेसका उमेश श्रेष्ठलाई ठूलो मतान्तरसहित पराजित गर्दै रवि प्रतिनिधि सभामा भित्रिए। चितवन- २ बाट ३४ हजारको मतान्तरले जित हात पारेका उनी एमालेसँगको गठबन्धन बनाउँदै प्रचण्ड नेतृत्वको सरकारमा उपप्रधानमन्त्री तथा गृहमन्त्री बने।
गृहमन्त्री भएका उनीविरुद्ध दोहोरो नागरिकता लिएको आरोपमा सर्वोच्च अदालतमा रिट दायर भयो। उनलाई विदेशी नागरिकता हुँदाहुँदै नेपाली नागरिकता लिएको र नेपाली नागरिकता लिँदा पूरा गर्नुपर्ने प्रक्रिया पालना नगरेको आरोप लागेको थियो। उक्त रिटमा संवैधानिक इजलासले फागुन २३ गते फैसला सुनाउँदै रवि नेपाली नागरिक नभएको ठहर गर्यो । योसँगै उनको सांसद पद गयो। उक्त क्षेत्र रिक्त भयो।
को-को छन्, प्रतिस्पर्धी
उक्त क्षेत्रमा लामिछानेलाई रोक्न नेपाली कांग्रेसले जितनारायण श्रेष्ठलाई अघि सारेको छ। उनलाई माओवादी केन्द्र र एकीकृत समाजवादी पार्टीले समेत साथ दिएका छन्।
त्यस्तै, नेकपा एमालेले यस पटक पोखरेललाई पछि हटाउँदै रामप्रसाद न्यौपानेलाई अघि सारेको छ। उनी अघिल्लो पटक चितवन- ३ मा उम्मेदवार हुन चाहेका थिए। तर पार्टीले उम्मेदवारी फिर्ता लिएर राप्रपालाई समर्थन गर्ने निर्णय गरेपछि उनी पछि हटेका थिए। अन्तिम समयमा पछि हटेका न्यौपाने यस पटक क्षेत्र नम्बर २ मा उम्मेदवार भएका छन्।
एमालेको बलियो संगठन भएकोले आफूले यस पटक जित्ने उनको दाबी छ। यो क्षेत्रमा त्रिपक्षीय प्रतिस्पर्धा हुने देखिन्छ। मनोनयन दर्ता गर्दै तीनै जना उम्मेदवारहरूले आफूले जित्ने दाबी गरे पनि कडा प्रतिस्पर्धा हुने देखिन्छ।
के भन्छन् प्रतिस्पर्धी
कांग्रेस उम्मेदवार जितनारायण श्रेष्ठले चितवनबासीको सेवाका लागि आफ्नो उम्मेदवारी भएको दाबी गरे। चुनावी सभालाई सम्बोधन गर्दै नेपाली कांग्रेसका उम्मेदवार श्रेष्ठले चितवन- २ का मतदाताले स्थानीय उम्मेदवार र सुख-दुःखको साथी भएकाले आफूलाई निर्वाचित गराउने बताए।
त्यस्तै, नेकपा एमालेका उम्मेदवार रामप्रसाद न्यौपानेले पनि आफूले जित हात पार्ने दाबी गरे। उनले यस पटक चितवनका जनताले सबै कुरा बुझेको भन्दै संगठनको बल र जनताको मतबाट आफू निर्वाचित हुने बताए।
के छ अंकगणित
गत मंसिरको मत हेर्दा चितवन-२ मा रास्वपा नै हावी देखिन्छ। प्रत्यक्षतर्फ लामिछानेले ४९ हजार २ सय ६१ मत ल्याएर जित हात पारेका थिए। उनका प्रतिस्पर्धी कांग्रेसका उम्मेदवार उमेश श्रेष्ठले १५ हजार ९१ मत पाएका थिए। एमालेका उम्मेदवार कृष्णभक्त पोखरेलले १४ हजार ६ सय ४९ मत पाएका थिए।
समानुपातिकको मत हेर्दा पनि रास्वपा अगाडि देखिन्छ। समानुपातिक मतमा रास्वपाले ३५ हजार ९ सय ४५ मत पाएको थियो।
एमालेले १६ हजार ७ सय ८४ मत पाएको थियो भने कांग्रेसले १२ हजार १ सय ३२ मत प्राप्त गरेको थियो।
त्यस्तै, माओवादी केन्द्र ८ हजार ४ सय ७, राप्रपा ३ हजार २ सय १८ र एकीकृत समाजवादी पार्टीले ६१६ मत प्राप्त गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
