काठमाडौं- फ्रान्सको पेरिसमा आयोजना हुने महिला ओलम्पिक फुटबल २०२४ को एसिया छनोटअन्तर्गत पहिलो चरणको खेलमा नेपाल भियतनामसँग पराजित भएको छ।
त्रिपुरेश्वरस्थित दशरथ रङ्गशालामा बुधबार भएको पहिलो खेलमा भियतनामले नेपाललाई ५–१ गोलअन्तरले पराजित गरेको हो। भियतनामको जितमा कप्तान हुन्ह न्हुले दुई गोल गरिन् भने फाम हाइ यन, एनगुएन थि बीच थुए र एनगुएन थि नाले एक एक गोल गरे।
नेपालका लागि सावित्रा भण्डारीले एक गोल फर्काइन्। खेलको ११औं मिनेटमा फाम हाइ यनले गोल गर्दै भियतनामलाई सुरुआती अग्रता दिलाइन्। उनले एनगुएन थिबीच थुएको क्रसमा सहजै गोल गरिन्।
त्यस्तै, खेलको ३६औं मिनेटमा भियतनामकी कप्तान हुन्ह न्हुले पेनाल्टीमार्फत् गोल गर्दै आफ्नो टोलीको अग्रता दोब्बर बनाइन्। कप्तान न्हुकै प्रहारमा नेपालकी समीक्षा घिमिरेले ह्यान्डबल गरेपछि भियतनामले पेनाल्टी पाएको थियो। जसको सदुपयोग भियतनामकी कप्तानले गरिन्।
यसैगरी, खेलको ३८औं मिनेटमा एनगुएन थि बिच थुएले गोल गरेपछि पहिलो हाफमा भियतनाम ३–० गोलअन्तरले अगाडि रह्यो। खेलको दोस्रो हाफमा भियतनामले दुई गोल थप्यो। खेलको ४८औं मिनेटमा थि लोनको क्रसमा कप्तान न्हुले हेडरमार्फत् व्यक्तिगत दोस्रो गोल गरिन्।
खेलको ७९औं मिनेटमा नेपालकी सावित्राले एक गोल गरिन्। उनले सरु लिम्बूको पासलाई सदुपयोग गर्दै गोल गरिन्। त्यसपछि खेलको दोस्रो हाफको अत्तिरिक्त समयमा एनगुएन थिले गोल गर्दै भियतनामलाई ५–१ को जित दिलाइन्।
एसियाली छनोटको समूह ‘सी’मा रहेको नेपालले अब शनिबार भियतनामसँग दोस्रो खेल खेल्नेछ। यस समूहमा रहेका प्यालेस्टाइन र अफगानिस्तानले खेल नखेल्ने भन्दै नाम फिर्ता लिएपछि दुई टोलीको मात्र सहभागिता रहेको हो। यस समूहमा शीर्ष स्थान हासिल गर्ने टोली दोस्रो चरणमा पुग्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
