काठमाडौं– राष्ट्रिय स्वतन्त्र पार्टीका सभापति रवि लामिछाने विरुद्धको रिटमा सुनुवाइ सकिएको छ। सर्वोच्च अदालतका न्यायाधीश हरि फुयाँलको एकल इजलासमा भएको सुनुवाइमा निवेदक र लामिछाने पक्षका कानुन व्यवसायीहरूले पनि बहस गरेका छन्।
आठौं नम्बरमा पेसी रहेको मुद्दामा रिट निवेदकहरूको बहसपछि लामिछानेका पक्षले बहस गरेका थिए। युवराज पौडेल ‘सफल’ले लामिछानमाथि मुद्दा नचलाउने निर्णय बदर हुनुपर्ने माग गर्दै रिट दायर गरेका थिए।
महान्यायाधिवक्ता दिनमणि पोखरेलले राहदानी कीर्तेमा लामिछानेमाथि मुद्दा नचल्ने निर्णय गरेका थिए। महान्यायाधिवक्ताले नागरिकता लिएको तर राहदानी लिएर दुरुपयोग गरेको र अरुलाई हानी पुर्याएको नदेखिएकाले मुद्दा दायर नगर्ने निर्णय गरेका थिए।
उनको यो निर्णयले फौजदारी अभियोगमा उन्मुक्ती दिएकाले उक्त निर्णय बदर गर्दै पुन: अनुसन्धान गरि मुद्दा दायर गर्न रिटमा माग गरिएको छ। प्रहरीको अनुसन्धानपछि जिल्ला सरकारी वकिलको कार्यालय, उच्च सरकारी वकिलको कार्यालय हुँदै आएको टिप्पणीमा महान्यायाधिवक्ता पोखरेलले यस्तो निर्णय गरेका थिए।
बुधबार निवेदकका तर्फबाट वरिष्ठ अधिवक्ता सुरेन्द्र भण्डारी, लोकबहादुर जङ्ग थापा, नवराज पाण्डे , वासुदेव शर्मा लगायतले बहस गरेका छन्। त्यस्तै, लामिछानेका पक्षबाट वरिष्ठ अधिवक्ता सुनिल पोखरेल र नरेन्द्र गौतमले बहस गरे।
सर्वोच्चले बहसपछि आजै निर्णय सुनाउने छ। सर्वोच्चले अन्तरिम आदेश जारी गरेमा भने लामिछाने समस्यामा पर्ने छन्। वैशाख १० गते हुने उपनिर्वाचनमा उनी चितवन–२ बाट उम्मेदवार बनेका छन्। अन्तरिम जारी भएन भने उनका लागि निर्वाचन लड्ने कानुनी बाटो खुल्ला हुने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
