लमजुङ– चक्रीय अन्नपूर्ण पदमार्गमा तीन महिनामा दुई हजार चार सय ७५ विदेशी पर्यटक आएका छन्।
सन् २०२३ को जनवरीदेखि हालसम्म सो संख्यामा विदेशी पर्यटक आएका हुन्। अन्नपूर्ण संरक्षण क्षेत्र आयोजना (एक्याप) पर्यटक जाँच केन्द्र धारापानीका पर्यटन सहायक क्षेत्रबहादुर गुरुङका अनुसार यतिबेला दैनिक ४०/५० जना पर्यटक आउने गरेका छन्।
‘यस पदमार्गमा यतिबेला कम कम नै पर्यटक आइरहेका छन्। विश्वमा देखा पर्दै गएको आर्थिकमन्दीका कारण हुनसक्छ’, गुरुङले भने। कोरोना संक्रमणपछि विगतमा आएकोझैं पर्यटक हालसम्म आएका छैनन्। पर्यटकको कमीले पदमार्गका पर्यटन व्यवसायी चिन्तित छन्।
जुर्मुराउँदै गरेको पर्यटन व्यवसाय कोरोना संक्रमणले लामो समय ठप्प भयो। संक्रमण हटेयता विगतमाझैं पर्यटक आउन नसकेको व्यवसायी पञ्चबहादुर गुरुङले बताए।
हिमाली, पहाडका दृश्य, उच्च पहाड, मनाङवासीको रीतिरिवाज, प्राकृतिक सुन्दरता हेर्न र मनाङबाट थोराङ भञ्ज्याङ उक्लेर मुस्ताङ हुँदै पोखरा जान अन्नपूर्ण पदमार्गमा पर्यटक आउँछन्। मनाङका विभिन्न हिमाल तथा चुली चढ्न तथा हेर्न पर्यटक भित्रिन्छन्।
अन्नपूर्ण पदमार्गको प्रवेशद्वार लमजुङ बेँसीसहर नगरपालिका–७ मनाङे चौतारा हो। यस पदमार्गमा लमजुङ, मनाङ, कास्की, मुस्ताङ र म्याग्दी जिल्ला जोडिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
