काठमाडौं- जसपा नेता रामसहाय यादव उपराष्ट्रपति निर्वाचित भएसँगै बारा- २ मा प्रतिनिधि सभा उपनिर्वाचन हुने निश्चित भएको छ। उपराष्ट्रपति यादव उक्त क्षेत्रबाट प्रतिनिधि सभा सदस्यमा निर्वाचित भएका थिए।
यादव उपराष्ट्रपति बनेपछि रिक्त भएको उक्त क्षेत्रमा जसपा अध्यक्ष उपेन्द्र यादव चुनाव लड्ने चर्चा सुरु भइसकेको छ।
जसपा अध्यक्ष यादव गत ४ मंसिरको निर्वाचनमा सप्तरी- २ बाट पराजित भएका थिए। उनलाई जनमत पार्टीका अध्यक्ष सिके राउतले १७ हजारभन्दा बढी मतान्तरले पराजित गरेका थिए। त्यतिबेला यादवले देशी-विदेशी शक्तिको षडयन्त्रले आफूलाई निर्वाचन हराएको आरोप समेत लगाएका थिए।
बारा- २ मा उपेन्द्र यादव स्वयं भिड्ने लगभग निश्चित रहेको जसपा नेताहरुले बताएका छन्। अध्यक्ष यादवले बारा- २ बाट निर्वाचन जितेर ४ मंसिरको हारको बदला लिन चाहेको उनी निकटस्थहरुको भनाइ छ।
जसपाका युवा नेता योगेन्द्र यादवले उपराष्ट्रपतिमा जसपा नेता रामसहाय यादव निर्वाचित भएसँगै अब आफूहरुको पूर्ण ध्यान बारा- २ मा हुने उपनिर्वाचनमा केन्द्रित भएको नेपाल लाइभलाई बताए। उनले बारा- २ को उपनिर्वाचनमा पार्टी अध्यक्ष उपेन्द्र यादव जाने तय रहेको जानकारी दिए।
उपेन्द्र यादवको संसद् छिर्ने यो हुटहुटीलाई बुद्धजीवीहरुले भने अस्वस्थ अभ्यास भनेका छन्। एउटै संसदको निर्वाचनमा फराकिलो मतान्तरले पराजित भएका नेता उपनिर्वाचनबाट त्यही संसदमा छिर्न खोज्नु स्वस्थ अभ्यास नभएको उनीहरुको तर्क छ। उनीहरुले जसपा अध्यक्ष यादवले रणनीतिक रुपमै उपराष्ट्रपति आफ्नो दलको भागमा पारेर संसद् छिर्न निर्वाचन क्षेत्र खाली गराएको विश्लेषण समेत गरेका छन्।
४ मंसिरको निर्वाचनमा सप्तरी- २ बाट यादव पराजित भएपछि जसपाले समिति नै बनाएर छानविन गरेको थियो। गत बुधबार मात्रै उक्त समितिले जसपा अध्यक्ष यादवलाई आफ्नो प्रतिवेदन बुझाएको छ।
छानविन समितिले पार्टीकै २० भन्दा बढी स्थानीय नेताहरुको असहयोग र केही देशी-विदेशी चलखेलका कारण यादव पराजित हुन पुगेको निष्कर्ष यादवलाई बुझाएको छ। यादवले पनि निर्वाचनमा पराजित भए लगत्तै आफूलाई षडयन्त्रपूर्वक हराइएको आरोप लगाएका थिए।
यादव र उनको पार्टी पंक्ति अब हुने उपनिर्वाचनबाट जवाफ दिने गृहकार्यमा लागेको छ। ‘हामी बारा- २ बाट अध्यक्षज्यूलाई ५० हजार बढी मतान्तरले जिताएर देखाउँछौं,’ जसपा युवा नेता यादवले भने, ‘४ मंसिरको जवाफ हामी उपनिर्वाचनबाट दिने तयारीमा छौं।’
उपेन्द्र यादव सत्ता-गठबन्धनकै साझा उम्मेदवार बनेर बारा- २ मा उम्मेदवारी दिने दाउमा छन्। तर गठबन्धनमै रहेको जनमत, लोसपा र नागरिक उन्मुक्ति पार्टीले त्यसलाई नमान्ने संकेत गरिसकेका छन्।
उपराष्ट्रपति निर्वाचनमा सत्तारुढ दलका प्रमुख घटकहरुले जसपालाई गठबन्धनका उम्मेदवारलाई सघाए पनि जनमत, लोसपा र उन्मुक्तिले छुट्टै उम्मेदवारी दिएका थिए। ती तीन पार्टीले यो बीचमा कार्यगत एकता पनि गरेका छन्।
बारा- २ मा यी तीन पार्टीको साझा उम्मेदवार भए पनि आफूहरुलाई कुनै असर नपर्ने दाबी जसपा नेताहरुको छ। आफ्नै पार्टीबाट निर्वाचित उपराष्ट्रपति यादवको त्यहाँ राम्रो प्रभाव रहेको र जातीय समीकरणमा समेत जसपाको हात माथि पर्ने भएकाले जनमत, लोसपा र उन्मुक्तिको चुनौतीले केही गर्न नसक्ने उपेन्द्र यादव पक्षको आकलन छ।
उपराष्ट्रपतिमा निर्वाचित रामसहाय यादव यो क्षेत्रबाट २०७४ र २०७९ गरी दुई पटक लगातार निर्वाचित भएका थिए। उपराष्ट्रपति यादवको राम्रो छवि स्थानीय स्तरमा भएकाले जसपा अध्यक्षलाई समेत त्यसको फाइदा हुन सक्ने निष्कर्ष उक्त पार्टीले निकालेको छ।
तर, नेपाली कांग्रेस, माओवादीको स्थानीय स्तरबाट विद्रोह भएर एमाले समेतले जसपालाई साथ नदिएको खण्डमा जसपालाई यो उपनिर्वाचन महँगो पर्न सक्ने एकथरीको विश्लेषण छ।
चितवन र तनहुँमा पनि उपनिर्वाचन
राष्ट्रिय स्वतन्त्र पार्टीका अध्यक्ष रवि लामिछानेको सांसद पद खारेज भएपछि रिक्त रहेको चितवन- २ मा आउँदो वैशाख १० गते उपनिर्वाचनको मिति तय भइसकेको छ। यस्तै, निर्वाचन आयोगले राष्ट्रपति रामचन्द्र पौडेलको निर्वाचन क्षेत्र तनहुँ- १ र उपराष्ट्रपति यादवको निर्वाचन क्षेत्र बारा- २ मा उपनिर्वाचन गर्नुपर्नेछ।
चितवनको मिति तय भए पनि अन्य २ क्षेत्रको निर्वाचनको मिति भने तय भएको छैन। सबैतिर एकै मितिमा उपनिर्वाचन गर्ने वा फरक मितिमा गर्ने भन्ने पनि प्रष्ट छैन।
जसपा अध्यक्ष यादव निकट स्रोतका अनुसार यादव स्वयंले उपनिर्वाचनको मितिबारे प्रधानमन्त्री पुष्पकमल दाहाल प्रचण्ड र निर्वाचन आयोगसँग समेत केही दिनअघि छलफल गरिसकेका छन्। सकभर १० वैशाखमै वा त्यसकै सेरोफेरोमै तनहुँ र बारामा उपनिर्वाचन गराउने तयारी आयोगको छ।
तर, चुनावमा जाने त्योभन्दा बढी हुटहुटी जसपा अध्यक्ष उपेन्द्र यादव र उनको पार्टी पंक्ति देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
