सुर्खेत– संघीय सरकारले अगाडि सारेको एक स्थानीय तह एक औद्योगिक ग्राम कार्यक्रमअन्तर्गत कर्णालीका छ पालिका छानिएका छन्। सुर्खेतका चार तथा कालिकोट र जाजरकोटका एक–एक पालिकामा औद्योगिकग्राम निर्माण गर्ने घोषणा गरियो।
सुर्खेतको पञ्चपुरी नगरपालिकामा २०७६, भेरीगंगा, चौकुने र गुर्भाकोट नगरपालिका, जाजरकोटको शिवालय गाउँपालिकामा २०७७ तथा कालिकोटको शुभकालिका गाउँपालिकामा औद्योगिकग्राम निर्माणका लागि २०७८ सालमा घोषणा गरिएको थियो। औद्योगिकग्राम घोषणासँगै काम अगाडि बढ्ने र रोजगारी सिर्जना हुने अपेक्षा नागरिकले लिएका थिए।
सुर्खेत भेरीगंगाको रामघाटस्थित २० विगाह क्षेत्रमा औद्योगिकग्राम निर्माणका लागि तोकिएको छ। उक्त क्षेत्रमा हालसम्म घेरबारको काम मात्रै भएको छ। गत आर्थिक वर्षमा संघीय सरकारबाट आएको रकमले घेरबार गरिएको र यसवर्ष संघीय सरकारसँग बजेट माग गरे पनि आइनसकेको नगरपालिका प्रमुख यज्ञप्रसाद ढकाल बताउँछन्।
गतवर्ष संघीय सरकाले औद्योगिकग्राम निर्माणको काम अगाडि बढाउन बजेट आएको थियो। उनले भने, ‘त्यही बजेटले घेरबारको काम गर्यौं। तर अहिलेसम्म पनि बजेट नआउँदा काम अगाडि बढ्न सकेको छैन।’
माथिल्लो तहबाट पठाउने बजेटमा ढिलाइ हुँदा संघ र प्रदेश सरकारका कार्यक्रम कार्यान्वनयमा कठिनाइ हुने गरेको नगरप्रमुख ढकालको भनाइ छ। यस्तै सुर्खेतकै पञ्चपुरी नगरपालिकाको वडा नं ६ र ८ को बीचमा पर्ने दुलालथाईमा औद्योगिकग्राम निर्माणका लागि पाँच सय रोपनी जग्गा छुट्याइएको छ।
उक्त क्षेत्रमा हालसम्म कार्यालयका लागि चारकोठे भवन, चमेना गृह, शौचालय निर्माण भएको पञ्चपुरी नगरपालिकाका प्रमुख लालवीर भण्डारीले जानकारी दिए। सडक, घेरबारलगायतका काम बाँकी छ। नगरप्रमुख भण्डारी भने, ‘बजेट नै अभाव छ। हामीले काम अगाडि बढाउने तयारी गरेको भए पनि संघीय सरकारबाट आउनुपर्ने बजेट समयमै आइदिन्न अनि काम अगाडि बढ्न सक्दैन।’
चौकुने गाउँपालिका–५ स्थित मायातालमा औद्योगिकग्राम निर्माण थालेको छ। दश विगाह जग्गा छुट्याएर औद्योगिकग्राम निर्माण थालिए पनि हालसम्म घेरबार, शौचालय र एक वटा कार्यालय भवन मात्रै निर्माण भएको छ।
अघिल्लो वर्ष आएको बजेटले भवन र शौचालय निर्माणको काम भए पनि रकम अभावमा अन्य काम अघि बढ्न नसकेको गाउँपालिकाका अध्यक्ष खड्क विक बताउँछन्। उनले भने, ‘प्रर्याप्त बजेट नहुँदा औधोगिक ग्राम निर्माणमा समस्या भएको छ। उद्योग सञ्चालनका लागि पानी, विद्युत् जस्ता पूर्वाधारको तत्काल आवश्यकता हाम्रो पालिकामा छ।’
जाजरकोटको शिवालय गाउँपालिका–४ मा औद्योगिक ग्रामका ४८ रोपनी जग्गा छुट्याएको छ। औद्योगिकग्राम निर्माण कार्य भने सुस्त छ। चालु आर्थिक वर्षका लागि यस पालिकाको बजेट आएको छैन। कालिकोटको शुभकालिका गाउँपालिकाले पनि वडा नं ४ राराकाटियाँ भन्ने ठाउँमा जग्गा छनौट गरेको छ।
गत आर्थिक वर्षमा पूर्वाधार निर्माणका लागि ठेक्का सम्झौता भए पनि काम भने सुरु हुन सकेको छैन। निर्माण सुरु गर्नका लागि ठेकेदार कम्पनीसँग छलफल गरेको र चाँडै सुरु हुने शुभकालिका गाउँपालिकाका अध्यक्ष गोविन्दप्रसाद आचार्य बताउँछन्।
कर्णाली प्रदेशले पनि साझेदारीका लागि बजेट छुट्याए पनि बर्सनि फ्रिज हुने गरेको छ। चालू आर्थिक वर्षमा पनि औद्योगिक ग्रामका लागि ३० लाख विनियोजन गरिएको छ। मन्त्रिपरिषद्को निर्णयका आधारमा उक्त रकम खर्च हुने मन्त्रालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1764580720.png)
-1763721444.png)
-1763559424.jpg)
-1764080971.png)
