काठमाडौँ- आगामी चैत ५ गते हुने स्वतन्त्र विद्यार्थी युनियन(स्ववियु) निर्वाचनमा तीन वटा विद्यार्थी संगठनबीच तालमेल गर्ने तयारी भएको छ।
नेपाली कांग्रेस निकट नेपाल विद्यार्थी संघ, माओवादी केन्द्र निकट अनेरास्ववियु (क्रान्तिकारी) र नेकपा एकीकृत समाजवादी निकट अनेरास्ववियुले तीन सदस्यीय कार्यदल बनाएर तालमेलका लागि छलफल अगाडि बढाएका छन्।
तत्कालीन प्रधानमन्त्री केपी शर्मा ओलीले प्रतिनिधि सभा विघटन गरेपछि प्रतिगमनविरुद्ध भन्दै एक ठाउँमा उभिएका दलसम्बद्ध विद्यार्थी संगठनले आफ्ना माउ पार्टीलाई पुरानै अवस्थामा फर्काउने दबाबस्वरुप स्ववियु निर्वाचनमा तालमेल गर्ने रणनीति अघि बढाएका हुन्।
तीन वटा विद्यार्थी सङ्गठनबाट एक/एक जना गरी तीन जनाको कार्यदल बनेको छ। कार्यदलमा नेपाल विद्यार्थी संघका तर्फबाट केन्द्रीय नेता दिनेशकुमार शाही, अनेरास्ववियु क्रान्तिकारीका तर्फबाट उपाध्यक्ष क्षितिज सापकोटा, एस निकट अनेरास्ववियुका तर्फबाट हिरेन्द्र शाही कार्यदलमा रहेका छन्। स्ववियु निर्वाचन सफल पार्न र जित हासिल गर्न कार्यदलमा छलफल भएको नेविसंघ नेता शाहीले बताए। एमाले निकट विद्यार्थी संगठन अनेरास्ववियुलाई पराजित गर्ने उद्देश्यसहित स्ववियु निर्वाचनमा तीनै विद्यार्थी संगठन एक भएर जाने शाहीले बताए।
पुरानो गठबन्धनलाई एक ठाउँमा ल्याउँछौं: शेर्पा
नेपाल विद्यार्थी संघका केन्द्रीय अध्यक्ष डुजाङ शेर्पाले पुरानो गठबन्धन दलहरुलाई एक ठाउँमा ल्याउने उद्देश्यसहित विद्यार्थी संगठनहरूबीच तालमेलको कुरा अगाडि बढाएको बताए। उनले भने, ‘हाम्रो पुरानो गठबन्धन छ। स्ववियु निर्वाचनमा समेत तालमेल गरौँ भनेर छलफल चलाएका छौँ। हामी परिवर्तनकारी विद्यार्थी शक्तिहरूबीच संविधान र लोकतान्त्रिक गणतन्त्रको रक्षाका निम्ति साझा बुझाइ बनाएर जाउँ भनेर कार्यदल बनाएका हौँ।’ उनले स्ववियु निर्वाचनलाई सफल पार्न हिजोका परिवर्तनका पक्षधर विद्यार्थी संगठनबीच तालमेल गर्न लागिएको दावी गरे।
'कार्यदलले संसद् विघटनपश्चात् बनेको गठबन्धन दलका विद्यार्थी संगठनहरूबीच छलफल जारी छ,’ उनले भने, ‘कतिपय कुराहरू केन्द्रबाट र कतिपय कुराहरू तल्लो तहबाट जिल्ला र प्रदेशलाई जिम्मा दिएर अघि बढ्छौँ।'
विद्यार्थी आन्दोलनको जग बलियो पार्छौं: पराजुली
एकीकृत समाजवादी निकट अनेरास्ववियुका अध्यक्ष सुदेश पराजुलीले विद्यार्थी आन्दोलनबाट प्राप्त उपलब्धिलाई संस्थागत गर्न तीन वटा विद्यार्थी संगठनबीच तालमेलको विषय अगाडि बढाइएक बताए। उनले भने, ‘नेविसंघ, क्रान्तिकारी र अनेरास्ववियुबी सहकार्यको तयारी भएको छ। यस सहकार्यलाई स्थानीय तहदेखि जिल्ला, प्रदेश र केन्द्रका विभिन्न क्याम्पससम्म लैजान्छौं। सहमतिको आधारमा स्ववियु निर्वाचन सम्पन्न गर्न, विद्यार्थी आन्दोलनको जगलाई बलियो पार्न र विद्यार्थीमा नयाँ उत्साह ल्याउने उद्देश्यका साथ कार्यदल बनाएका हौँ।’
संयुक्त विद्यार्थी आन्दोलनका उपलब्धि गुम्न नदिन एकै ठाउँमा उभिनुको विकल्प नभएको उनको भनाइ छ। उनले शिक्षामा भएको व्यापारीकरणका विरुद्ध लड्न संयुक्त विद्यार्थी आन्दोलन आवश्यक भएको औँल्याए।
स्ववियुलाई सफल पार्न एक ठाउँमा आएका हौं: एमसी
अनेरास्ववियु क्रान्तिकारीका प्रवक्ता मिलन एमसीले स्ववियु निर्वाचन सफलतापूर्वक सम्पन्न पार्ने उद्देश्यसहित छलफल भइरहेको दावी गरे। उनले भने, ‘नेविसंघ, अनेरास्ववियु र क्रान्तिकारीले एक ठाउँमा रहेर निर्वाचनमा होमिँदा एकताको सन्देश जान्छ। मिल्न सक्ने ठाउँमा मिलेर जानुपर्छ,’ उनले भने, ‘नमिलेको ठाउँमा प्रतिस्पर्धा गरेर जानुपर्छ। त्यही अनुसार साथीहरूबीच छलफल भइरहेको छ।’
उनले विद्यार्थीको चुनावी गठबन्धन सरकारलाई हेरेरभन्दा पनि स्वतन्त्र विद्यार्थी युनियनको निर्वाचनलाई लक्षित गरी बनेको बताए। पार्टी सरकारमा हुँदा र नहुँदा पनि विद्यार्थीहरूको अजेण्डामा केन्द्रित रहेको उनको दावी छ।
त्यसैगरी अखिल क्रान्तिकारीका उपाध्यक्ष एवं कार्यदलका सदस्य क्षितिज सापकोटाले भने, ‘कार्यदलमा एक/दुई पटक छलफल भइसकेको छ। स्ववियुमा मिलेर जाने सहमति भइसकेको छ। निचोडमा भने पुग्न सकेका छैनौँ।’
नेता सापकोटाले प्रतिगमन, एमसीसी र शैक्षिक माफिया विरुद्ध सडकमा सँगै रहेर दल तथा विद्यार्थी संगठनहरूले आन्दोलन गरेकाले आगामी दिनमा पनि त्यसलाई निरन्तरता दिन तालमेल गर्न लागेको बताए।
तालमेलको विरोध
स्ववियु निर्वाचनमा तीन विद्यार्थी संगठनबीच तालमेलको छलफल भइरहँदा कतिपय विद्यार्थीले भने त्यसको विरोध गरेका छन्। त्रिवि नेविसंघका पूर्वसचिव योगेन्द्र रावलले तालमेलको विरोध गर्दै सामाजिक सञ्जालमा लेखेका छन्, ‘नेविसंघ भित्र संगठन नगर्ने अनि स्ववियु निर्वाचनमा गठबन्धन गर्ने रे? के खाएर आउँछ हो यस्तो बुद्धि? स्ववियु निर्वाचनमा कथित गठबन्धन हुनै सक्दैन, गर्नु हुँदैन।’
विद्यार्थी नेता रवीन्द्र विक्रम शाहले पनि आफ्नै टिमलाई व्यवस्थापन गर्न कठिन भइरहँदा तालमेल गरेर जाने कुरा नाटक भएको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
