धनगढी– नागरिक उन्मुक्तिबाट निर्वाचित प्रतिनिधि सभा सदस्य अरुणकुमार चौधरी आइतबार कैलाली कारागारबाट मुक्त भए । ट्याक्टर जलाएको घटनामा अदालतले दोषी ठहर गरेका चौधरीलाई असल चालचलनका आधारमा राष्ट्रपति विद्यादेवी भण्डारीले प्रजातन्त्र दिवसको अवसरमा कारागारमुक्त गर्ने निर्णय बमोजिम कैद माफ गरिएको हो ।
सोही मुद्दामा थुनामा रहेका वीरबहादुर चौधरी र परशुराम चौधरी भने रिहा भएनन्। सांसद भएकै कारण अरुणलाई माफी दिइएको सन्देश सो घटनाले दिएको छ । २०६६ भदौ ३ मा ट्याक्टर जलाएको भन्दै २०७० वैशाख ९ गते कैलाली जिल्ला अदालतले अरुण चौधरीसहित ३ जनाविरुद्ध जनही ६ महिना कैद र ८ लाख १८ हजार ४२३ रुपैयाँ पीडितलाई उपलब्ध गराउने फैसला गरेको थियो । ६ महिना कैद भुक्तान नगरेको भन्दै चौधरीलाई प्रहरीले माघ १९ गते बाँकेबाट पक्राउ गरेको थियो ।
दसैँ, नयाँ वर्ष, लोकतन्त्र अनि गणतन्त्र दिवस जस्तो अवसरमा अपराध पुष्टि भएर कैद सजाय भोगिरहेका कैदीहरूमध्ये निश्चित सर्त पालना गरेकाहरूको बाँकी कैद मिनाहा गर्न सक्ने कानुनी अधिकार सरकारलाई छ । यस पटक माओवादी केन्द्रका अध्यक्ष पुष्पकमल दाहाल प्रचण्डले सरकारलाई नागरिक उन्मुक्तिले दिएको समर्थन कायम गराउने स्वार्थमा आगजनीका दोषीको कैद माफ गराए ।
‘दिवसको अवसरमा कैद भोगिरहेका व्यक्तिलाई असल चालचलनका आधारमा माफी दिनु सरकारको नियमित प्रक्रिया नै हो,’ नेपाल बार एसोसिएसन कैलालीका अध्यक्ष शिद्धराज ओझाले भने, ‘तर, सोही मुद्दामा पक्राउ परेका अन्य व्यक्तिको कैद माफ नहुनुले सरकारप्रति नकारात्मक सन्देश प्रवाह परेको छ।’
उनले कैद माफ गराउन पनि पदमै जानुपर्ने गलत सन्देश यो प्रवृत्तिले दिएको बताए । ओझाले भने, ‘एकै प्रवृत्ति र एउटै मुद्दामा एउटाको माफी मिनाहा गर्नु र अरुले चाहिँ कारागारमै बस्नु पर्ने कुरा न्यायसंगत देखिएन।’ उनले सरकारको यो निर्णय त्यति ठूलो विवादित नभए पनि जनतामा न्याय पाउन पनि पदमा पुग्नुपर्ने सन्देश प्रवाह गरेको बताए ।
थारु कल्याणकारिणी सभाका कार्यवाहक सभापति माधव चौधरीले सांसद अरुण चौधरीलाई हिरासतमुक्त बनाउनुलाई सरकारको राम्रो पक्ष भए पनि अन्य दुई जनाको पक्षमा सरकारले केही निर्णय नगरेकोप्रति खेद प्रकट गरे । उनले सांसद नभएकै कारण दुई जनाको बारेमा सरकारले फाइल अघि नबढाउनुमा पहुँचका आधारमा कार्य भएको देखिएको बताए ।
‘नेपालको कानुन दैवले जानून् भनेझै समस्या के भयो भने ठूलाबडाको मात्र कानुन हुने देखियो,’ उनले भने, ‘त्यही मुद्दामा भएको अन्य मान्छेले माफी पाएनन्। अरुण सांसद भएकै कारण माफी दिइयो । यदि माफी गर्नु नै थियो भने तीनै जनालाई गर्नु उचित हुन्थ्यो ।’ उनले नागरिक उन्मुक्ति पार्टी सत्ता पक्षमा रहेकाले अरुणलाई माफी गराइ कारागारमुक्त गराउनु स्वभाविक देखिएको बताए ।
पत्रकार एकिन्द्र तिमिल्सेनाले राजनीतिमा लागेकालाई सरकारले दोषी ठहर भएका अरुणलाई माफी अन्यका विषयमा नबोल्दा गलत नजिर स्थापना भएको बताए । उनले गल्ती अनुसारको सजाय हुनुपर्ने बताए ।
थुनामा रहेका वीर र परशुराम प्रतिनिधि सभा सदस्य अरुणका नातेदार हुन् । आठ लाख जरिवाना बुझाएका अरुणलाई कारागारबाट बाहिर ल्याउन नागरिक उन्मुक्तिकी अध्यक्ष रञ्जिता श्रेष्ठ स्वय्र पुगेकी थिइन् । तर अध्यक्ष श्रेष्ठले पनि सोही अपराधमा पक्राउ परेका दुई जनाबारे कुनै प्रतिक्रिया दिइनन् ।
कारागारमुक्तका क्रममा अरुणले पनि सो बारेमा कुनै प्रतिक्रिया दिएनन् । सञ्चारकर्मीसँग कुराकानी गर्दै उनले भने, ‘१८ दिनको कारागार बसाइले धेरै कुरा सिकाएको छ । हामीले कानुनमा धेरै कुरा परिमार्जन र संशोधन गर्नुपर्नेछ । जब २०७० सालमा कैलाली जिल्ला अदालतले फैसला गरिसकेको थियो भने त्यतिखेरै जानकारी पाउनुपथ्र्यो । तीन पटक चुनाव लडिसकेको छु । त्यतिखेरको अवस्थामा पनि म सफाइको लागि दावी पेस गर्न सक्थें । उच्च अदालतमा पनि जान सक्थें । मैले त्यो मौका नै पाइनँ । जानकारी नै पाइनँ ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
