२५ सयबाट स्मृतिले सुरु गरेको ‘ह्याप्पिनेस’

फिचर

अन्शु खनाल शनिबार, माघ २८, २०७९ १४:०८

काठमाडौं– कोसिस गर्‍यो भने असहज समयमा समेत सफलता हासिल गर्न सकिन्छ भन्ने दृष्टान्त हुन् पोखराकी स्मृति ओझा। अनलाइन व्यवसायमा सक्रिय स्मृति २३ वर्षकी भइन्।

पोखरा घर भएकी उनी पहिलो लकडाउनपछिका दिनमा आजित थिइन्। एक दिन इन्स्टाग्रामबाट आफूले लगाएको कपडा बेच्नका लागि पोस्ट गरिन्।

लगाइसकेको कपडा बेच्ने 'थ्रिफ्ट कल्चर' नेपालमा नौलो होइन। एक वा दुई पटक मात्रै लगाएका कपडा आफूले किनेभन्दा कम रकममा बेच्नु थ्रिफ्ट हो।उनले पहिलो पटक आफूले लगाएको कपडा बेचेर २५ सय रुपैयाँ कमाइन्।

त्यसपछि उनले कपडाको अनलाइन व्यापारबारे सोचिन्। सुरुको २५ सयबाट स्मृतिले चार वटा टिसर्ट किनिन्। व्यावसायिक उद्देश्यका लागि उनले छुट्टै इन्स्टाग्राम खोलिन्।

नाम दिइन्– ‘फो फिट ह्याप्पिनेस।’

‘लकडाउनमा खुलेको भएर फो फिटले दुरीलाई बुझाउँछ। ह्याप्पिनेसले खुसीलाई। अनलाइन सप भएको हुनाले टाढाबाट पनि आफ्नो खुसी किन्न मिल्छ भन्ने सोचेर यही नाम राखेँ,’ स्मृति भन्छिन्।

व्यावसायिक रुपमा पहिलो पाइलास्वरुप उनले इन्स्टाग्रामबाटै चार वटा टिसर्ट बेचिन्। त्यसैबाट उनको व्यवसाय सुरु भयो। त्यसपछि बिस्तारै इन्स्टाग्राममा फलोअर्स बढ्न थाले। नयाँ नयाँ अर्डर आउन थाल्यो।

सुरुका केही महिना उनले टिसर्ट, पाइन्ट, ओन् पिस जस्ता कपडा मात्रै बेचिन्। केही समयपछि विस्तारै कुर्ता र साडीका पनि फोटो राख्न थालिन्।

ग्राहकले टिसर्ट पाइन्टहरू भन्दा साडी र कुर्ता बढी रुचाउन थालेपछि उनले आजकाल साडी र कुर्ताहरू मात्रै बेच्छिन्। लकडाउनमा सुरु गरेको व्यवसाय भएकाले स्मृतिलाई सुरुमा कुरियरमा समस्या भयो। लकडाउन विस्तारै खुकुलो हुंदै गर्दा उनको व्यवसायले राम्रो गति लिन थाल्यो।

पछिल्लो केही महिना यता उनले नेपालमा मात्रै होइन विदेशमा समेत अर्डरहरू पठाउने गरेकी छन्। ‘आजकाल नेपालभित्रबाट भन्दा नेपाल बाहिर बस्नेहरूको धेरै अर्डर आउँछ,’ उनले भनिन्।

आजकल उनको इन्स्टाग्राममा एघार हजारले फलो गर्छन् भने टिकटकमा करिब सात हजारले।

सामान्य रुपमा अनलाइन सपहरुमा पाइने भन्दा फरक किसिमको कपडा बेच्छिन् स्मृति।

परम्परागत र मोडर्न चिजहरू मिसाएर बनाएका ड्रेस हुन्छन् उनको अनलाइनमा। बिजनेसमा स्नातक गरिरहेकी उनी कपडाको डिजाइन सोच्छिन्। उनले सोचेको डिजाइन अनुसार सिलाउने चार जना महिलाहरूलाई जागिर समेत दिएकी छन्।

सानो उमेरदेखि नै सामाजिक काममा रुचि राख्ने स्मृतिले कुनै समय ब्यूटीपेजेन्टहरुमा पनि भाग लिएकी थिइन्। २०१७ मा मिस लेखनाथ नगरपालिकामा फस्ट रनर अप समेत भइन् स्मृति।

त्यस्ता ब्यूटीपेजेन्टहरुले बाहिरी सुन्दरतालाई मात्रै प्राथमिकता दिएको देखेपछि उनले त्यो क्षेत्र छाडिन्। भन्छिन्, ‘ब्यूटी कन्टेस्टमा भाग लिई सकेपछि थाहा भयो की त्यहाँ 'आउटर ब्युटी' लाई एकदमै धेरै प्राथमिकतामा राखिँदो रैछ। मैले बुझे अनुसारको ब्यूटीपेजेन्टको अर्थ मैले पाउनै सकिनँ। त्यसपछि फर्किएर हेर्नै मन लागेन।’

पढाइ र व्यवसायसँगै घुम्न पनि मन पराउँछिन् स्मृति। ‘घुम्नलाई समय मिलाउन गाह्रो हुन्छ। कलेज विदा भएको समयमा सबै अर्डर डेलिभरी गरेर नयाँ अर्डर केही दिनलाई रोकेर घुम्छु,’ उनी भन्छिन्।

०००

२५ सयबाट सुरु गरेको उनको व्यवसायमा अहिले मासिक ३ देखि ४ लाखसम्मको व्यापार हुन्छ। डेढ लाख रुपैंया बचत हुन्छ।

स्मृतिलाई लाग्छ– ‘अनलाइन बिजनेस गर्नु मात्रै ठूलो कुरा होइन रहेछ। त्यसलाई निरन्तर रूपमा लैजानु चाहिँ चुनौतीको कुरा रहेछ।’ फरक ढंगले काम गर्न सकेमा सफलता हात लाग्ने उनको अनुभव छ।

उनले छोटो समयमा गरेको प्रगति देखेर उनकाे परिवार पनि खुसी छ। ‘छोरी मात्रै छिन्’ भनेर बुवा आमालाई सहानभूति राख्ने आफन्तहरूको मुख नै बन्द गरिदिएकी छन् स्मृतिले। अहिले उनी आफ्नै कमाइबाट घर बनाउँदै छिन्।

र अनलाइनमा मात्रै सीमित आफ्नो व्यवसायलाई छिट्टै स्टोरको रूपमा अगाडि लैजाने सोच पनि छ स्मृतिको। भन्छिन्, ‘त्यो सोच छिट्टै पूरा हुनेवाला छ।’