काठमाडौं– नेकपा माओवादी केन्द्रका अध्यक्षसमेत रहेका प्रधानमन्त्री पुष्पकमल दहाल ‘प्रचण्ड’ले बिहीबार एकीकृत समाजवादीका अध्यक्ष माधवकुमार नेपाल र उक्त पार्टीका नेता झलनाथ खनालसँग संवाद गरे। सिंहदरबारस्थित प्रधानमन्त्री कार्यालयमा छलफल चलिरहँदा राष्ट्रिय जनमोर्चाका अध्यक्ष चित्रबहादुर केसी पनि सामेल हुन आइपुगे।
यसअघि बुधबार पनि प्रधानमन्त्री प्रचण्डले एकीकृत समाजवादीका नेता खनालसँग भेटवार्ता गरेका थिए। त्यसअघि मंगलबार पनि प्रचण्डले बिहीबारजस्तै अध्यक्षद्वय नेपाल र जनता समाजवादीका अध्यक्ष उपेन्द्र यादवसँग भेट गरे।
पछिल्लो तीन दिनयता प्रधानमन्त्री प्रचण्ड लगातार एकीकृत समाजवादी र जसपासँग छलफलमा छन्। नेताहरुबीचमा निरन्तर छलिरहेको छलफल भने कुन विषयमा केन्द्रित छ भन्ने कुरा चाहि खुलेको छैन। खनालले भने, ‘प्रधानमन्त्रीसँग छलफल हुनु सामान्य कुरा हो। शीर्ष नेताहरुका बीचमा समसामयिक कुराबाहेक अरु के हुन्छ र?'
यता केही सयमअघि माओवादी केन्द्र, एकीकृत समाजवादी र जसपाले पार्टी एकीकरण र मोर्चाबन्दीका लागि वार्ता समिति नै गठन गरेका छन्। माओवादीले पार्टी उपाध्यक्ष कृष्णबहादुर महराको नेतृत्वमा, एकीकृत समाजवादीले पार्टीका महासचिव वेदुराम भुसाल, जसपाले नेता राजेन्द्रनारायण श्रेष्ठ र नेपाल समाजवादीले नेता गंगा श्रेष्ठको नेतृत्वमा वार्ता समितिहरु गठन गरेका छन्।
माओवादी र नेपाल समाजवादी पार्टीका वार्ता समिति र एकीकृत समाजवादी तथा जसपाका वार्ता समितिहरुबीच त पहिलो चरणको छलफल नै चलिसकेको छ। माओवादीको वार्ता समितिले एकीकृत समाजवादीको वार्ता समितिसँग पनि एक चरणमा छलफल गरेको छ। हुन त माओवादी र एकीकृत समाजवादीले गत मंसिर ४ गतेको निर्वाचनअगावै पार्टी एकीकरण गर्नेगरी दुईपक्षीय संयन्त्र निर्माण गर्ने कुरा पनि सार्वजनिक भएको थियो।
एकीकृत समाजवादीका नेता खनालले तत्कालै माओवादीसँग एकीकरणको सम्भावना नरहे पनि यो मोर्चाबन्दीका रुपमा अघि बढ्न सक्ने संकेत गरे। उनले पार्टी एकीकरणका विषयमा भने अहिल्यै विस्तृत कुरा भन्न नसकिने बताए।
यता, जसपाका वार्ता समिति संयोजक श्रेष्ठ शीर्ष तहका नेताहरुका बीचमा चलिरहेको भेटघाट र छलफलले वार्ता समितिलाई काम गर्न सहज हुने बताउँछन्। ‘वार्ता समितिको स्तरमा अहिले जसपाले एकीकृत समाजवादीसँग छलफल गरिरहेको छ’, श्रेष्ठले भने, ‘हामीले एक अर्काका दस्तावेज अध्ययन गर्न एउटा समिति बनाएका छौं। त्यो समितिले भोलि शुक्रबारसम्म आफ्नो प्रतिवेदन बनाउनेछ। त्यसपछि हामी बसेर कुरा गर्नेछौं।’
आफूहरुबीच पहिला जसपा र एकीकृत समाजवादीबीचमा कुरा मिलाउने र त्यसपछि मात्रै माओवादीसँग कुरा गर्ने मोटामोटी सहमति भएको श्रेष्ठले जानकारी दिए। यता माओवादी र नेपाल समाजवादी पार्टीको वार्ता समितिका बीचमा पनि एक तहमा कुरा मिलेर छलफल अहिले शीर्ष तहमा पुगेको देखिन्छ।
केही दिनअघि बसेको माओवादी स्थायी कमिटी बैठकमा पनि पार्टी एकीकरण र त्यसका लागि आवश्यक वार्ताहरुका विषयमा चर्चा चलेको थियो। माओवादी अध्यक्ष तथा प्रधानमन्त्री प्रचण्डले त पार्टीको नामसमेत फेरेर भए पनि एकीकरण प्रक्रियालाई अगाडि बढाउने कुरा बैठकमा राखेको माओवादीका नेताहरु बताउँछन्।
यसरी माओवादीको बैठकमा छलफल हुने र यी चार पार्टीका वार्ता समितिका बीचमा एक तहमा दुई पक्षीय समझदारी बन्ने छाँटकाँट देखिरहेका बेला शीर्ष तहका नेताबीचमा पनि छलफल बाक्लिएको छ। पार्टी एकीकरण वा मोर्चाबन्दी भन्ने विषयमा अहिले नै पक्का भइसकेको भने देखिँदैन।
तर, अकस्मात जनमोर्चाका अध्यक्ष केसीको इन्ट्रीले भने थप चासो दिएको छ। कतिपय नेताहरुले यसलाई राष्ट्रपतिको निर्वाचन र सम्भावित समीकरणको नयाँ खेलसँग पनि जोडेर हेरेका छन्। तर यो निरन्तरको भेटघाटले कसरी राजनीतिक घटनाक्रम विकास गर्छ भन्नेबारे जानकारी पाउन त केही समय कुर्नेपर्ने देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791965585.png)
-1791964075.png)
-1787821305.jpg)
-1786602170.png)
