काठमाडौं– सशस्त्र प्रहरी बल (एपीएफ) मा ९ महिनादेखि रिक्त रहेको नायव महानिरीक्षक (डीआईजी) बढुवा प्रक्रिया सुरु गरिएको छ। ९ महिनादेखि रिक्त रहेको डीआईजी बढुवाका लागि भन्दै माघ १९ गते बढुवा समितिका सदस्य सचिव सशस्त्र प्रहरी अतिरिक्त महानिरीक्षक (एआईजी) नारायणदत्त पौडेलद्वारा हस्ताक्षरित एक सूचना सशस्त्र हेडक्वार्टरले निकालेका छ।
योग्य उम्मेदवारले १ साताभित्र बढुवाका लागि चाहिने आवश्यक कागजात पेस गर्न भन्दै सूचना निकालिएपछि डीआईजी बढुवाका लागि तीव्र लबिइङ सुरु भएको छ।
सशस्त्रमा अहिले चार डीआईजीको दरबन्दी रिक्त छ। कुल १६ डीआईजीको दरबन्दी रहेकोमा राजु अर्यालय गत वैशाखमा आईजीमा बढुवा भएदेखि नै दरबन्दी रिक्त हुँदै आएको थियो।
गत वैशाख १८ गते अर्याल आईजीमा बढुवा भएपछि डीआईजी पद रिक्त हुन सुरु गरेको थियो। उनीसँगै नारायणदत्त पौडेल र चन्द्रप्रकाश (सीपी) गौतम एआईजीमा बढुवा भएपछि सशस्त्रमा ३ डीआईजी पद रिक्त भयो।
त्यसपछि एआईजीको दरबन्दी थप गर्दै गत भदौ ६ गते वंशीराज दाहाललाई एआईजीमा बढुवा गरेपछि सशस्त्रमा ४ डीआईजीको दरबन्दी रिक्त भएको थियो। सोही रिक्त पदमा बढुवा हुन अहिले एसएसपीहरुबीच तीव्र प्रतिस्पर्धा छ।
अहिलेको डीआईजी बढुवाका लागि प्रहरीको प्राविधिक सईमा भर्ना भएर सशस्त्रमा स्थानान्तरण भएका कृष्णराज पाठक र सशस्त्रको इन्सपेक्टरमा भर्ना भएको पहिलो टोलीबीच प्रतिस्पर्धा हुनेछ। यसअघिसम्म नेपाली सेना तथा नेपाल प्रहरीमा भर्ना भएर सशस्त्रमा स्थानान्तरण हुँदै आएकोहरुको बढुवा भएको थियो। यसपटक भने सशस्त्रमै भर्ना भएर डीआईजी बन्नेहरु पहिलो हुनेछन्।
२०५९ कात्तिक २६ मा सशस्त्रको इन्सपेक्टरमा भएका सिसं. १ का टोलीहरु पहिलोपटक डीआईजी बन्न लागेका हुन्। सशस्त्रको पहिलो ब्याचमा ९ जनालाई इन्सपेक्टरमा भर्ना लिइएको थियो। उनीहरुमध्ये अञ्जनीकुमार पोखरेल, दीपेन्द्र शाह, सुरेशकुमार श्रेष्ठ, पुरुषोत्तम थापा, दीपक अधिकारी, कृष्ण ढकाल, मनिष थापा, विनोदराज श्रेष्ठ डीआईजी बढुवाका प्रतिस्पर्धामा छन्। सिसं. १ मै भर्ना भए पनि स्टाफ कलेज पास नगरेकाले प्रकाश थापा भने प्रतिस्पर्धाबाट बाहिर छन्।
सशस्त्रमा डीआईजी बढुवाका लागि स्टाफ कलेज पास गर्नुपर्ने हुन्छ। जसकारण अहिले रिक्त रहेको ४ डीआईजीका लागि सिसं. १ का ८ जना र प्रहरीको प्राविधिक सईमा भर्ना भएर सशस्त्रमा स्थानान्तरण भएका १ जना गरी ९ जनाबीच प्रतिस्पर्धा हुने देखिन्छ।
बढुवाको प्रतिस्पर्धामा रहेका पोखरेल उत्कृष्ट काम गरेको भन्दै भर्खर पुरस्कार समेत पाएका थिए। विपत् व्यवस्थापन तालिम शिक्षालय कुरिनटारका प्रमुख रहेका पोखरेलले लगातार दुई पटक शिक्षालयलाई सर्वोत्कृष्ट बनाएका छन्। २२औं सशस्त्र प्रहरी दिवसको अवसरमा उक्त शिक्षलायलाई सशस्त्र हेडक्वार्टरमा पुरस्कृत गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
