सिन्धुपाल्चोक– प्रधानमन्त्री पुष्पकमल दाहाल प्रचण्डले अर्थतन्त्रमा देखिएको समस्या सुधार हुने संकेतहरु देखिन थालेको दाबी गरेका छन्। सिन्धुपाल्चोकको जुगल गाउँपालिकामा रत्नराज्य माध्यमिक विद्यालयको ५९औं वार्षिकोत्सव एवं चीन सरकारको १ अर्ब रुपैयाँ सहयोगमा निर्माण भएको भवन उद्घाटन समारोहमा बोल्दै प्रधानमन्त्रीले यस्तो दाबी गरेका हुन्।
चीनले भौतिक पूर्वाधारदेखि भूकम्पका कारण भत्केका संरचना बनाउन सहयोग गरेको भन्दै उनले धन्यवाद पनि दिए।
प्रधानमन्त्री प्रचण्डले आफू सरकारको नेतृत्वमा आएपछि बैंक तथा व्यवसायीको बीचमा नयाँ रुपमा सम्बन्ध अघि वढाउने कार्यको थालनी गरेको भन्दै यसको सकारात्मक सुधार देखिएको दाबी गरे। उनले अर्थतन्त्रमा देखिएको समस्या समाधान हुने आधारहरु देखा परेको बताए।
सरकार अर्थतन्त्र सुधार गरेर जनतालाई सुशासन दिने पक्षमा काम गरिहेको उनको भनाइ थियो। उनले अहिलेको सरकारलाई धेरै दलको सर्मथन प्राप्त भएकाले यो ठूलो जिम्मेबारी र चुनौती भएको महसुससहित आफू जनताको काममा केन्द्रित भएको प्रचण्डको जिकिर थियो।
देशमा शुसासन कायम गर्दै विकास गर्नुपर्ने जिम्मेबारी आफूमा रहेको उनले बताए। एक्लै कसैको वलले मात्र देश विकास नहुने भएकाले सवैको हातेमालो, सहयोगले विकासको गति लिनसक्ने भन्दै नेपालको आर्थिक विकासका लागि मित्रराष्ट्र चीन र भारत दुवै देशसँग सहकार्यका लागि आफूले अग्रसरता लिएको उनको भनाइ छ।
अन्तर्राष्ट्रिय समुदायलाई पनि नेपाली जनताको विकासको चाहना सम्बोधन गर्न हातेमालोको आग्रह गरेको भन्दै उनले शिक्षाको क्षेत्रमा लगानी गरेर मात्र विकास गर्न सकिने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
