माथिल्लो तामाकोसी जलविद्युत् आयोजनाको बाँध
काठमाडौं– माथिल्लो तामाकोसी जलविद्युत् आयोजनाको सहायक आयोजनाको रुपमा रोल्वालिङ खोला जलविद्युत् आयोजना निर्माण हुने भएको छ।
आयोजनाले विद्युत् विकास विभागमा उत्पादन अनुमतिका लागि आवेदन दिएको छ। कूल २२ मेगावाट क्षमताको सो आयोजना नदी प्रवाहमा आधारित आयोजना हो। यसको डिजाइन बहाव १३.४ घनमिटर प्रतिसेकेण्ड रहेको छ। आयोजनाको कूल हेड २०७ मिटर रहेको छ। आयोजनाबाट वार्षिक सरदर १०५ गिगावाट घण्टा विद्युतीय ऊर्जा उत्पादन हुनेछ।
यस्तै, डाईभर्सन स्किमबाट वार्षिक २१६ गिगावाट घण्टा ऊर्जा उत्पादन हुनेछ। आयोजनाको मुख्य संरचना रोल्वालिङ खोलाको दायाँ किनारामा पर्छ। रोल्वालिङ खोलामा बाँध बाँधी खोलाको दायाँपट्टी निर्माण हुने इन्टेकबाट पानी फर्काइ सो पानीलाई आयोजनाको मुख्य संरचना निर्माण गरिनेछ।
आयोजनाको विद्युत् उत्पादनका लागि खोलाको पानी फर्काउन ४२ मिटर लामो र चार मिटर उचाईको कङ्क्रिट ग्रेभिटी वेयर बनाइनेछ। विद्युत् गृहमा २ वटा टर्वाइन रहनेछ। ती टर्वाइनबाट १०.४९ मेगावाट बिजुली उत्पादन हुनेछ।
विद्युत् उत्पादनपछि निस्केको पानीलाई ७४० मिटर लामो सुरुङमार्फत् माथिल्लो तामाकोसी जलविद्युत् आयोजनाको जलाशयमा खसालिनेछ।
विद्युत् गृहबाट उतपादित बिजुली ८.४ किलोमिटर लामो ३३ केभी क्षमताको प्रसारण लाइनबाट बिगु गाउँपालिका–१ गोंगरस्थित माथिल्लो तामाकोसी जलविद्युत् आयोजनाको प्रस्तावित ३३/२२० केभी सवस्टेशनमा जोडिनेछ।
आयोजनाबाट २०८४ साल मंसिर १ गतेभित्र विद्युत् उत्पादन हुनेछ। सो आयोजना निर्माण सम्पन्न भएपछि माथिल्लो तामाकोसी जलविद्युत् आयोजनाको बिजुली उत्पादनमासमेत गुणात्मक वृद्धि हुनेछ।
अर्धजलाशयुक्त प्रकृतिको सो आयोजनाबाट पूर्ण क्षमतामा बिजुली उत्पादनका लागि समेत रोल्वालिङ खोला जलविद्युत् आयोजना सहयोगी हुनेछ।
आयोजनाको डिजाइन लगायतको काम नेपाल विद्युत् प्राधिकरणको सहायक कम्पनी एनइए इञ्जिनियरिङ कम्पनीले गरेको हो। सो आयोजनालाई प्राधिकरणका कार्यकारी निर्देशक कुलमान घिसिङले रणनीतिक महत्वको आयोजनाको रुपमा चित्रण गर्दै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
