काठमाडौं- नयाँ सभामुखको निर्वाचन हुँदै गर्दा गत साता नेपाली कांग्रेसका सांसद रामहरि खतिवडाले उपप्रधान तथा गृहमन्त्री रवि लामिछानेप्रति कटाक्ष गर्दै प्रश्न गरे- यो सभा हलमा अदालतले ज्यान मुद्दामा दोषी ठहर गरेका व्यक्ति पनि उपस्थित छन्। उनलाई पक्राउ गर्न गृहमन्त्रीलाई कसले रोकेको छ?’
सांसद खतिवडाले कसैको नाम नलिई प्रश्न उठाएपछि गृहमन्त्री लामिछाने नाजवाफ देखिए। उनको इसारा सत्ता साझेदार दलको प्रमुख घटक नेकपा एमालेका सांसद लक्ष्मी महतो कोहरीतर्फ थियो।
सांसद खतिवडाले सभा हलमा उठाएको प्रश्नले गृहमन्त्रीप्रति यति ठूलो नैतिक दबाब सिर्जना भयो, गृह मन्त्रालयले राति नै एउटा विज्ञप्ति सार्वजनिक गर्नुपर्यो।
गृह मन्त्रालयका प्रवक्ता फणिन्द्रमणि पोखरेलले हस्ताक्षर गरेको विज्ञप्तिको सार थियो- कोइरीलाई पक्राउ गर्न गृह मन्त्रालयले नेपाल प्रहरीलाई पत्र लेखिसकेको छ। गृहमन्त्री लामिछानले मौखिक र लिखित रुपमा पनि उनलाई पक्राउ गर्न निर्देशन दिएका छन्। गृहमन्त्रीको निर्देशनपछि नेपाल प्रहरीले देशभरका प्रहरी कार्यालयमा कोइरीलाई पक्राउ गर्न सर्कुलर जारी गरेको छ।
कहाँ छन् त कोइरी?
प्रतिनिधि सभाको पहिलो बैठक र प्रधानमन्त्रीले विश्वासको मत लिएको बैठकमा सहभागी भएका एमाले सांसद कोइरी त्यसपछि सभामुखको निर्वाचनको समयमा प्रतिनिधि सभामा पुगेका थिए। बैठकमा पुगेपछि नेपाली कांग्रेसले गम्भीर रुपमा प्रश्न उठाएपछि उनी त्यहाँबाट निस्केर हिँडेका थिए। तर प्रहरीले उनलाई हालसम्म फेला पार्न सकेको छैन।
महोत्तरी- १ बाट नेकपा माओवादी केन्द्रका नेता एवं पूर्वमन्त्री गिरिराजमणि पोखरेललाई पराजित गर्दै चुनाव जितेका कोइरीमाथि मधेस आन्दोलनका क्रममा एम्बुलेन्समा रहेका बिरामीलाई पनि जबरजस्ती निकालेर हत्या गरेको आरोप छ। उनलाई उच्च अदालतले फरारको सूचीमा राख्दै पक्राउ गरेर अदालत पेस गर्न भनेको छ।
अहिले यो विषय सबैका लागि चासोको विषय बनेको छ। पुस ७ गते चुनाव जितेर आएका नयाँ सांसदहरूलाई सपथ गराउँदा कोइरी नयाँ बानेश्वस्थित संसद् भवनमा उपस्थित थिए। नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई पुस २६ गते विश्वासको मत दिँदा पनि उनी संसद भवनमै उपस्थित थिए।
सभामुखको चुनावका लागि पनि उनी संसद भवन पुगेका थिए। तर नेपाली कांग्रेसका सांसद खतिवडाले प्रश्न उठाएपछि उनी एकाएक संसद् भवनबाट गायब भए। सांसद खतिवडाले फरार सांसद र आफूले प्रधानमन्त्रीलाई सँगै विश्वासको मत दिएको भन्दै प्रश्न उठाएपछि गृहमन्त्री लामिछानले पनि संसदको रोष्ट्रममा उभिएर जवाफ दिएका थिए। लामिछानेले आफूले विधि र प्रक्रियाभित्र काम गर्ने र कसैको दबाब स्वीकार नगर्ने बताएका थिए।
अहिले उनी कहाँ छन् भन्ने विषयमा गृह मन्त्रालय पनि अनभिज्ञ छ। गृहमन्त्रीले छिट्टै कानुनी दायरामा ल्याउने बताएका छन्। उच्च स्रोतका अनुसार संसद भवनबाट निस्केका कोहरीले नेपाल छोडिसकेका छन्।
नेपाल लाइभलाई प्राप्त उच्च स्रोतको सूचनाअनुसार कोहरी अहिले भारत, उत्तर प्रदेशमा घुमिरहेका छन्। उनी सोही दिन मधेस हुँदै भारत प्रवेश गरेका थिए। ‘उहाँ भारतको उत्तर प्रदेशमा देखिनुभएको छ,’ उच्च स्रोतले नेपाल लाइभलाई भन्यो, ‘नेपालले भारतीय सरकारसँग समन्वय गर्यो भने पक्राउ पर्न सक्छन्।’
कोइरीमाथि नेपाल प्रहरीका सई थामन विश्वकर्माको हत्या गरेको आरोप छ। सात वर्षअघि मधेस प्रदेशमा आन्दोलन हुँदा महोत्तरीमा विश्वकर्माको हत्या भएको थियो।
घाइते भएर अस्पताल लैजाँदै गर्दा एम्बुलेन्सनबाट थुतेर विश्वकर्माको हत्या गरिएको भन्दै जनकपुर उच्च अदालतले कोइरीलाई पक्राउ गर्न आदेश दिएको थियो। यसअघि धनुषा जिल्ला अदालतले १० लाख धरौटीमा उनलाई छोडेको थियो।
प्रतिनिधि सभाको पहिलो बैठकअघि नै नेपाली कांग्रेसका सांसद टेकबहादुर गुरुङ निलम्बनमा परेका थिए। उनी विरुद्ध विशेष अदालतमा भ्रष्टाचार मुद्दा विचाराधीन रहेको छ। मनाङबाट निर्वाचित भएका गुरुङले सपथ पनि लिन पाएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751963591.png)
-1751879619.webp)
-1749826086.png)
