राजनीति

कहाँ पुग्यो माओवादी केन्द्र, एकीकृत समाजवादी र जसपा एकीकरण?

नवीन झा मंगलबार, माघ १०, २०७९ ०७:३३

काठमाडौं- सरकारको नेतृत्व गरिरहेको नेकपा माओवादी केन्द्र, सरकारलाई समर्थन गरेको तर सहभागी नभएका नेकपा एकीकृत समाजवादी र जसपा नेपालबीच एकीकरण प्रयास जारी छ।

४ मंसिरको निर्वाचनलगत्तै यी तीनवटै दलले एकीकरणको विषयमा सम्वाद गर्न वार्ता समिति गठन गरेका थिए। तर वार्ता समितिहरु खासै सक्रिय देखिएका थिएनन्। तर पछिल्लो केही दिनयता यी दलका वार्ता समितिले एकअर्कासँग सम्वाद अघि बढाएका छन्।

आइतबार माओवादी र एकीकृत समाजवादीका वार्ता समितिबीच दुई पटक संवाद भयो। त्यसअघि शनिबार माओवादी केन्द्रको वार्ता समितिले बाबुराम भट्टराई नेतृत्वको नेपाल समाजवादी पार्टीसँग पनि छलफल गरेको थियो। गत २९ पुसमा पनि छलफल गरेका एकीकृत समाजवादी र जसपा नेपालका वार्ता समितिबीच शनिबार पनि छलफल भएको थियो।

शनिबार त एकीकृत समाजवादी र जसपा नेपालबीच भएको वार्तापछि दुई पार्टीका दस्तावेजहरु अध्ययन गर्न दुई नेतालाई जिम्मा नै दिएका छन्। एकीकृत समाजवादीका डा विजय पौडेल र जसपाका गोविन्द चौधरीलाई १५ दिनभित्र दुवै पार्टीका सबै दस्तावेज अध्ययन गरेर एकीकरणको सैद्धान्तिक अधार खोज्न जिम्मा दिएका छन्।

माओवादीले उपाध्यक्ष कृष्णबहादुर महराको नेतृत्वमा अन्य दलहरुसँग सम्वाद गर्न वार्ता समिति गठन गरेको छ भने एकीकृत समाजवादीले महासचिव वेदुराम भुसाल र जसपाले राजेन्द्र श्रेष्ठको नेतृत्वमा अन्य पार्टीहरुसँग एकीकरणका लागि वार्ता समिति बनाएका छन्।

४ मंसिरको निर्वाचनमा माओवादीकै चुनाव चिन्ह्मा भाग लिएको बाबुराम भट्टराई नेतृत्वको नेपाल समाजवादी पार्टीले पनि गंगा श्रेष्ठको नेतृत्वमा वार्ता तथा संवाद समिति गठन गरेको छ।

पछिल्लो राजनीतिक घटनाक्रमलाई हेर्दा माओवादी केन्द्र, एकीकृत समाजवादी, जसपा नेपाल र नेपाल समाजवादी पार्टीबीच एकीकरणको सम्भावना देखिएको छ।

माओवादी वार्ता समितिका सदस्य गिरिराजमणि पोखरेलले एकीकृत समाजवादी र नेपाल समाजवादी पार्टीसँग एकताका लागि सकारात्मक संवाद अघि बढेको दावी गरे। नेपाल लाइभसँग कुरा गर्दै पोखरेलले एकीकृत समाजवादीसँग निर्वाचनअघि नै एकीकरण गर्ने गरी समन्वय समिति गठन गर्ने कुरा चले पनि अहिले आएर आफूहरुले वार्ता समितिमार्फत संवाद अघि बढाएको दावी गरे।

‘नेपाल समाजवादी पार्टीसँग पनि हामीले नयाँ पार्टीको नामसहित अन्य विषयमाथि सकारात्मक कुरा अघि बढाएका छौं,’ पोखरेलले भने, ‘चाँडै एकीकृत समाजवादी र नेपाल समाजवादीसँग पुन: बस्नेछौं। त्यसपछि धेरै कुरा अघि बढनेछ।’

तर, एकीकृत समाजवादीका महासचिव तथा वार्ता समिति संयोजक वेदुराम भुसालले भने पार्टी एकीकरणका लागि भइरहेको सम्वाद प्रारम्भिक चरणमै रहेको बताए। यद्यपि, भुसालले पनि प्रारम्भिक सम्वादहरु पनि साकारात्मक रहेको प्रतिक्रिया दिए।

एकीकृत समाजवादीले उपेन्द्र यादव नेतृत्वको जसपा नेपाल र माओवादी केन्द्र दुवैसँग समानान्तर सम्वाद अघि बढाएको छ। भुसालले जसपासँग १५ दिनपछि पुन: बस्ने तय भएको जानकारी दिए।

यता जसपाका वार्ता समिति संयोजक राजेन्द्र श्रेष्ठले एकीकृत समाजवादीसँग भएका पछिल्ला दुई वार्ताबारे आइतबार पार्टी अध्यक्ष उपेन्द्र यादवलाई जानकारी गराएका छन्। श्रेष्ठले वार्ताहरु सकारात्मक भएको प्रतिक्रिया दिए। पार्टी एकीकरणबारे चलिरहेको सम्वादका विषयमा अहिले नै धेरै बोल्न नमिल्ने श्रेष्ठले बताए।

माओवादी, एकीकृत समाजवादी, जसपा र नेपाल समाजवादी पार्टीबीच एकीकरण भएमा सत्ता समीकरणको शक्तिमा व्यापक परिवर्तन आउन सक्ने राजनीतिक विश्लेषक बताउँछन्।

यी पार्टीहरु एक भएमा प्रतिनिधि सभामा ५४ सिटको पार्टी बन्नेछ भने राष्ट्रिय सभामा सबैभन्दा ठूलो दल बन्नेछ। साथै प्रदेशहरुतर्फ पनि शक्ति सन्तुलनमा परिवर्तन आउने देखिन्छ। त्यसैले प्रधानमन्त्री तथा माओवादी अध्यक्ष प्रचण्ड यो एकीकरणलाई राष्ट्रपति निर्वाचन अगावै पूर्णता दिन सकिन्छ कि भन्ने कसरतमा देखिन्छन्। त्यसैका लागि प्रचण्डले आइतबार नेता माधव नेपालसँग एक्लै कुराकानी गरेको स्रोतले बतायो।

माओवादीले १२ गते बोलाएको स्थायी कमिटी बैठकले समेत पार्टी एकीकरणका बारेमा छलफल गर्ने बताइएको छ। यद्यपि, एकीकरण कसरी र कहिले हुन्छ, प्रष्ट भने छैन।