काठमाडौं– मीनकुमारी राणा प्रतिष्ठानले पहिलो वार्षिक तिथीको अवसर पारेर विभिन्न व्यक्तिलाई सम्मान गरेको छ। नेपाली कांग्रेसका नेता तथा समाजसेवी कबिर राणाकी आमाको स्मृतिमा गतवर्ष स्थापना भएको मीनकुमारी राणा प्रतिष्ठानले नेपालका प्रथम राष्ट्रपति डा रामवरण यादवको उपस्थितिमा आइतबार विभिन्न विधामा मुर्धन्य व्यक्तिहरुलाई सम्मान गरेको हो।
भक्तपुरको राधे–राधेमा भएको कार्यक्रममा साहित्यविधातर्फ प्राडा ध्रुवचन्द्र गौतमलाई सम्मान गरिएको छ। यसैगरी नेपालको प्रजातान्त्रिक आन्दोलनमा सक्रिय भूमिका खेलेका शहीद माथवरसिंह बस्नेत, पत्रकारिताको माध्यमबाट सशक्त भूमिका खेलेका पत्रकार हरिहर विरही र नेपाली खेलकुदमा योगदान गरेका वरिष्ठ बक्सिङ्ग प्रशिक्षक मदनकुमार गुरुङ्गलाई जनही ५१ हजार रुपैयाँसहित सम्मानपत्र प्रदान गरिएको थियो।
कार्यक्रममा मीनकुमारी राणाले दिक्षा लिएको बैंकेटश्वर मन्दिरले सञ्चालन गरेको संस्कृत पाठसाल र उनका छोरा–छोरीले अध्ययन गरेको आदर्श माध्यामिक विद्यालय (डीएमपीए) विद्यालयलाई पनि छात्रबृत्ति प्रदान गरिएको थियो।
कार्यक्रममा पूर्व राष्ट्रपति डा यादवले साहित्यकार डा ध्रुवचन्द्र गौतम लगायतका व्यक्तिहरुलाई सम्मानित गर्न पाउँदा आफू अत्यन्त उत्साहित भएको बताए। सबैलाई सम्मान गर्ने व्यक्तिहरुलाई नै प्रतिष्ठानले पुरुस्कृत गरेको उल्लेख गर्दै डा यादवले आगामी दिनमा यसलाई निरन्तरता दिन आग्रह गरे।
कार्यक्रममा सम्मानित हरिहर विरहीले पुरस्कार ग्रहण गर्न पाउँदा आफू खुसी भएको बताए। अहिले नेपाली राजनीति मूल्यमान्यताभन्दा बाहिर गएकोतर्फ संकेत गर्दै उनले विगतमा मीनकुमारीले खेलेको भूमिकालाई सम्झिएर अघि बढ्न सवैलाई आग्रह गरे।
प्रजातन्त्र सेनानी माथवरसिंह बस्नेतले आफू राजनीतिमा लाग्दा सम्मान पाउनका लागि नभइ व्यवस्था परिवर्तन गर्ने उद्देश्य लिएर हिँडेको बताए।
यस्तै, साहित्यकार डा ध्रुवचन्द्र गौतमले साहित्यले समाजलाई चिनाउने काम गरेको बताउँदै सम्मानले आफूलाई खुसी लागेको बताए।
कार्यक्रममा नेपाली कांग्रेसका केन्द्रीय सदस्य विनोद कुमार चौधरीले मीनकुमारी प्रतिष्ठानले गरेको कामले आफू पनि उत्साहित भएको बताउँदै आमाको नाम राख्नका लागि छोरा छोरीले गर्ने कर्तव्य पूरा गरेको बताए।
कार्यक्रममा भक्तपुर कांग्रेस सभापति तथा सांसद दुर्लभ थापाले कबिर राणा र रबि राणाका साथै परिवारसँगको आत्मियताका विषयमा कुरा गर्दै सधैंभरी साथ दिने मीनकुमारीबाट धेरै कुरा आफूले ग्रहण गरेको पनि बताए।
मीनकुमारीका माहिला छोरा कबिर राणाले आमाको नाममा केही काम गर्न पाएकोमा खुसी लागेको बताए।
मीनकुमारीको गत वर्ष निधन भएको हो। उनको सम्झनामा स्थापना गरिएको प्रतिष्ठानमा पति कोमलविक्रम राणा संरक्षक रहेका छन् भने कबिर राणा अध्यक्ष छन्। यसैगरी कान्छा छोरा रबि राणा महासचिव रहेका छन् भने नाती बिक्रान्त विक्रम राणा यसको कोषाध्यक्ष रहेका छन्।
प्रतिष्ठानको सदस्यमा नारायणी थापा, गायत्री केसी, नन्दु देउजा, अञ्जु खड्का, रितु बस्नेत र जयन्ती देवकोटा रहेकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
