विकास निर्माणको नेतृत्वमा महिला

समाज

ललित बोहरा शनिबार, माघ ७, २०७९ ०९:३०

बैतडी– बैतडीको पाटन नगरपालिका, जहाँ कांग्रेस र माओवादीको गठबन्धनबाट मेयर, उपमेयरमा पुरुष निर्वाचित भएका छन्। दुईवटै पदमा पुरुष निर्वाचत भएपछि महिलाका हक अधिकारका विषयमा कसले बोल्ने हो भने आमचिन्ता जस्तै थियो। तर, नगर उपप्रमुख कमलसिंह बोहराले अहिले कार्यपालिकाबाटै उपभोक्ता समितिमा पहिलो पद अर्थात् अध्यक्ष महिला हुनुपर्ने निर्णय गराएपछि अधिकांश वडामा महिला अध्यक्ष भएर योजना सम्झौता भएका छन्।

जिल्लाको पाटन नगरपालिका वडा नम्बर १, जहाँ चालु आर्थिक वर्षका लागि सडक, खानेपानी, स्वास्थ्य चौकी भवन, मन्दिर निर्माण लगायत गरेर २३ योजनाहरु छन्। सबै योजनाको वडाध्यक्ष तर्कसिंह ठगुन्नाको रहोवरमा उपभोक्ता समिति गठन गरेर योजना सम्झौता गरिरहेको छ।

जसमा २३ योजनाको नेतृत्वमा महिला छन्। महिलाले ३३ प्रतिशतमा खुम्चिनुपर्ने तथा कोषाध्यक्ष पदमा मात्र बस्नुपर्ने बाध्यता पुरुष उममेयर पाएपछि हटेको छ। विकास निर्माणको नेतृत्व पाएका महिला अध्यक्ष उत्साहित भएको उपभोक्ता समिति अध्यक्ष लक्ष्मी भट्टले बताइन्। उनले भनिन्, ‘महिलालाई पहिला भनेर र उपमेयरसाबले जो नारा ल्याउनुभयो त्यो नै महिलाका लागि उत्साहित हुने खालको छ। पहिलोपटक अध्यक्ष हुन पाएँ। खुशी छु।’

अहिले गाउँ गाउँ, वस्ती वस्ती निर्माण गर्ने नेतृत्वमा पुगेको स्थानीय भागरथी बोहराले बताइन्। उनले भनिन्, ‘हामी नेतृत्व नगर्न सक्षम छौं भन्ने देखाउँछौं।’

Baitadi_ women1674272731.jpeg

वडा कार्यालमै पुगेर योजना सम्झौता गरिराखेको नगरपालिकाले अहिलेसम्म ५ वटा वडाको योजना सम्झौता गरेको छ। ४६ उपभोक्ता समितिको नेतृत्व महिलाले गरेका छन्। नगर कार्यपालिकाले महिलालाई पहिलो पदमा ल्याउन पहिलो प्राथमिता दिनपर्ने भन्दै वडा कार्यालयलाई पत्राचार समेत गरेको छ।

पहिलो वर्ष नै कार्यान्वयको चरणमा गएकोले आगामी वर्ष वडा नम्बर १ जस्तै अरु वडामा पनि महिलालाई पहिलो पदमा ल्याउन सहयोग पुग्ने नगरपालिकाको अपेक्षा छ। महिला अध्यक्ष भए उनीहरको क्षमता विकास हुने उपमेयर बोहराले बताए।

उनले भने, ‘सरकारी अड्डा तथा विभिन्न छलफल बैठकमा हाम्रा दिदीबहीनीहरु सहभागी हुन पाउँछन्। त्यसले क्षमता विकास हुन्छ। अब महिला हरेक क्षेत्रमा ३३ प्रतिशतमा सीमित रहने नेतृत्वका लागि अग्रसर हुन्छन्।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।