काठमाडौं– प्रधानमन्त्री पुष्पकमल दाहाल प्रचण्डले वर्तमान सरकार ताजा जनादेशको जगमा गठन भएको बताएका छन्। आइतबार थारू समुदायको चाड माघी पर्व तथा मगर समुदाय लगायत अन्य समुदायहरूले मनाउने चाड माघे संक्रान्ति (मकर संक्रान्ति)को अवसरमा शुभकमाना सन्देश दिँदै उनले उक्त कुरा बताएका हुन्।
शुभकामना सन्देशमार्फत प्रचण्डले प्रतिनिधि सभा तथा प्रदेश सभा निर्वाचनपछि ताजा जनादेशको जगमा वर्तमान सरकार गठन भएको उल्लेख गरेका छन्। उनले सरकारले सामाजिक न्याय, सुशासन र समृद्धिलाई प्रमुख लक्ष्य बनाएको उनले दाबी गरेका छन्।
प्रधानमन्त्री प्रचण्डले प्रतिनिधि सभाबाट अभूतपूर्व विश्वासको मत प्राप्त गरेको वर्तमान सरकार जनताको जीवनमा गुणात्मक परिवर्तन ल्याउने संकल्पका साथ अवस्था बदल्न दृढ संकल्पित रहेको उल्लेख गरेका छन्। उनले सम्पूर्ण नेपालीलाई सामाजिक न्याय, सुशासन र समृद्धिको लक्ष्यमा हातेमालो गर्न र यस पर्वलाई राष्ट्रिय एकता, सद्भाव र सहकार्य थप बलियो बनाउने ऐतिहासिक अवसरमा रूपमा मनाउन अपिल गरेका छन्।
संसद्मा तेस्रो दल रहेको नेकपा (माआवादी केन्द्र)का अध्यक्ष तथा संसदीय दलको नेता प्रचण्ड प्रधानमन्त्री बनेका हुन्।जनादेशविपरीत तेस्रो पार्टीका नेता प्रधानमन्त्री बनेको भन्दै कतिपयले आलोचना गरिरहेका बेला प्रचण्डले यस्तो दाबी गरेका हुन्।
नेपाल बहुजातीय, बहुभाषिक, बहुसांस्कृतिक, बहुधार्मिक विशेषताले भरिएको सुन्दर देश रहेको उल्लेख गर्दै उनले अनेकतामा एकता र राष्ट्रिय स्वाभिमान हाम्रा साझा पहिचान भएको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
