काठमाडौं- त्रिभुवन विश्वविद्यालयले स्वतन्त्र विद्यार्थी युनियनको निर्वाचन मिति आगामी चैत ५ गतेका लागि तय गरेको छ। २०६५ सालदेखि हुन नसकेको स्ववियु निर्वाचनको मिति तय भए पनि विद्यार्थी संगठनहरुको आन्तरिक तयारी भने कमजोर देखिएको छ।
खासगरी ठूला पार्टी नेपाली कांग्रेस निकट नेपाल विद्यार्थी संघ र नेकपा एमाले निकट अनेरास्ववियुमा सांगठनिक भद्रगोल देखा परेको छ।
नेपाल विद्यार्थी संघ केन्द्रले अझै पूर्णता पाएको छैन। सभापति डुजाङ शेर्पाले एकल रुपमा संगठन चलाइरहेको नेविसंघकै विद्यार्थी नेताहरुको आरोप छ। त्रिभुवन विश्वविद्यालयमा समेत नेविसंघ संगठनविहीन छ।
समिति विस्तार गर्नुको साटो नेविसंघ सभापति डुजाङ शेर्पाले घोषणापत्र तयारी समिति संयोजकमा पुजन गन्धर्व र प्रचारप्रसार समितिको संयोजकमा डा सन्तोष उपाध्यायलाई मनोनित गरेका छन्।
नेविसंघको संगठन विस्तार गर्न नसकेका शेर्पाले विज्ञप्तिमार्फत समयमै परीक्षाफल प्रकाशित नहुनु र शैक्षिक बेरोजगार सिर्जना हुनुले शैक्षिक क्षेत्रमा देखिएको ढिलासुस्ती र नीतिगत कठिनाइलाई चिर्नका लागि स्ववियु निर्वाचन अनिवार्य सर्त भएको उल्लेख गरेका छन्।
साथै उनले आगामी चैत ५ गते हुने स्ववियु निर्वाचनका सन्दर्भमा देशैभरका नेविसंघका कार्यकर्तालाई तयारीमा रहन आग्रह गरेका छन्। स्ववियु निर्वाचनलाई थप प्रभावकारी, व्यवस्थित र परिणाममुखी बनाउन भन्दै उनले नेविसंघका पूर्व केन्द्रीय सदस्य पुजन गन्धर्वलाई घोषणापत्र तयारी समितिको संयोजक र चिकित्सा अध्ययन संस्थानका पूर्व इकाई सभापति डा सन्तोष उपाध्यायलाई प्रचारप्रसार समितिको सभापतिमा नियुक्त गरेका छन्।
सभापति शेर्पाको निर्णयमा नेविसंघकै नेताहरु सशंकित
नेविसंघ सभापति शेर्पाले गरेको निर्णयप्रति नेविसंघकै नेता–कार्यकर्ता सशंकित भएका छन्। उनीहरुले शेर्पाले आफ्नो कार्यकाल थप्ने प्रयत्न गरेको आरोप लगाएका छन्। नेविसंघ त्रिविका निर्वमान सचिव योगेन्द्र रावलले सभापति शेर्पाले विद्यार्थी भुलाउँदै आफ्नो पदावधि थप्ने नियतले फण्डा गरेको आरोप लगाए।
उनले स्ववियु निर्वाचन र केन्द्रीय कार्यसमिति विस्तारमा सभापति शेर्पा असक्षम भएको ठोकुवा गरे। उनले भने, ‘ हामी प्रष्ट छौँ, न उहाँसँग केन्द्रीय समिति विस्तार गर्ने आँट छ न स्ववियु निर्वाचन गर्न सक्ने ताकत। महाधिवेशनको मुख्य जिम्मेवारी पाएको व्यक्तिले विद्यार्थी माझ संघको १२औं महाधिवेशनको यथेष्ट कार्ययोजना प्रस्तुत गर्न पर्दैन?’
रावलले सभापति स्ववियु सभापतिको टिकट खोज्ने र नेविसंघ केन्द्रीय सदस्यमा स्पेस खोज्नेहरुको निश्चित भीडमा रमाइरहेको आरोप समेत लगाए।
सभापति शेर्पाले भने माघ महिनाभित्र क्याम्पसहरुमा नेविसंघका समितिहरु विस्तार गरिसक्ने बताए। उनले भने, ‘माघभरि विश्वविद्यालय क्याम्पसहरुमा हामी संगठन विस्तारमा लाग्छौं। अबको एक हप्ताभित्र केन्द्रीय कमिटी पनि आउँछ। काठमाडौं भ्याली भित्रका क्याम्पसहरुमा यो माघभित्र अधिवेशन गरेर फागुनमा स्ववियुको प्रचारप्रसार गरी चैत ५ को स्ववियु निर्वाचनमा होमिन्छौं।’
सभापति शेर्पाले घोषणापत्र र प्रचारप्रसार मुख्य कुरा भएको बताउँदै त्यसलाई अघि बढाएको दावी गरे। पार्टीले नै साउन मसान्तभित्र केन्द्रीय कमिटीलाई पूर्णता दिने निर्णय गरेको स्वीकार गर्दै स्थानीय निर्वाचन र संघ–प्रदेशको निर्वाचन सँगसँगै आएका कारण पूर्णता दिन नसकेको बताए। उनले स्ववियु निर्वाचन लगत्तै केन्द्रीय महाधिवेशन गर्ने प्रतिवद्धता समेत गरे।
अनेरास्ववियुमा स्ववियु पहिला कि महाधिवेशन पहिला भन्ने विवाद
यसैगरी सत्तारुढ दल नेकपा एमाले निकट अनेरास्ववियुको नेतृत्व गरिरहेकी अध्यक्ष सुनिता बराल एमालेबाट समानुपातिक सांसदमा निर्वाचित भइन्। बराल सांसदमा निर्वाचित भइसकेपछि अनेरास्ववियुको नेतृत्वले कसले लिने भन्नेबारेमा अहिले संगठनभित्र विभिन्न व्यक्तिहरु आकांक्षी देखिएका छन्।
अनेरास्ववियुका नेता विजन रेग्मीले संगठनमा फरकमत राख्नेलाई घाँटी निमोठ्ने प्रचलन हावी रहेको आरोप लगाएका छन्। उनले संगठनका नेताहरु विद्यार्थीबीच नभएर नेताका अघिपछि लागेको बताएका छन्। उनले सामाजिक सञ्जालमा लेखेका छन्, ‘रातभरि कुरेर भए पनि पार्टी नेतृत्वसँग बसेको फोटो खिच्यो। जता गयो त्यतै मेरा बा–आमा भन्यो। संगठनको नेतृत्व भेट्यो, मेरो दाइ र दिदी भन्दै दिनमा चार पटक सामाजिक सञ्जालमा फोटो हालेर बस्यो। विद्यार्थीको मुद्दामा चुइक्क बोल्नु छैन। टियुको लापरबाहीले लाखौं विद्यार्थीको भविष्य अन्योलमा छ, मतलब छैन।’
उनले कफी सपमा बसेर गफ चुट्दैमा अहिलेको डिजिटल युगका विद्यारथीको आवश्यकता र आन्दोलनलाई सम्बोधन गर्न सकिएला? भन्दै प्रश्न गरेका छन्।
अनेरास्ववियु २३औं राष्ट्रिय महाधिवेशन स्ववियुको निर्वाचन अघि या पछि गर्नेबारे पनि अन्योल देखिएको छ।
अनेरास्ववियुका वरिष्ठ उपाध्यक्ष आरसी लामिछानेले संगठनको स्वस्थता हाम्रो प्रतिबद्धता, स्ववियु निर्वाचन हाम्रो प्राथमिकता भन्ने नारासहित अनेरास्ववियुले स्ववियु निर्वाचनको तयारी गरिरहेको दावी गरे। उनले राष्ट्रिय महाधिवेशन कहिले गर्ने भन्ने विषयमा छलफल भइरहेको बताए।
उनले भने, ‘राष्ट्रिय महाधिवेशनका बारेमा स्ववियु निर्वाचन अगाडि कि पछाडि भन्ने कुरामा विवाद छ। स्ववियु निर्वाचन पछि गरौं भन्ने अधिंकाश साथीहरुको मत रहेको छ।’
उनले थपे, ‘तल्ला कमिटीका नियमित अधिवेशन, सम्मेलनका साथै स्वतन्त्र युनियनको चुनावको तयारीमा लाग्छौं। अरु संघ–संगठनहरुलाई पनि स्ववियु निर्वाचनका लागि डोर्याएर ल्याउँछौं। स्वतन्त्र विद्यार्थीको निर्वाचन सकिएपछि महाधिवेशनमा केन्द्रित हुन्छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
