धनगढी– धनगढी उपमहानगरपालिका वडा नम्बर १ लक्ष्मीनगरका स्थानीयले धनगढी उपमहानगरपालिकाको कार्यालय घेराउ गरेका छन्।
वडा नम्बर १ मा नाली अतिक्रमण गरि बनाइएका संरचना हटाउन उपमहानगरपालिकाले आनाकानी गरेको भन्दै उपमहानगरपालिकाको कार्यालय घेराउ गरेका हुन्।
लक्ष्मीनगरकी स्थानीय शोभिता रानाले उपमहानगरपालिकाले संरचना हटाउनमा विभेद गरेको आरोप लगाइन्। उनले भनिन्, ‘मैले बनाएको घर डर, त्रास देखाउँदै तथा अन्यको पनि संरचना हटाउँछौ भनी भत्काउन लगाइयो तर, अहिले उपमहानगरपालिका संरचना हटाउनमा पछि हट्यो।’
उनका अनुसार सो क्षेत्रमा पाँचभन्दा बढी घर नाली अतिक्रमण गरेर बनेका छन्।
स्थानीय सुवास चन्दले २०६३ सालदेखि नै नाली अतिक्रमण गरेर भौतिक संरचना बन्दा पछाडि रहेको बस्ती डुवानको जोखिममा रहेको बताए। उनले भने, ‘विगतदेखि नै अतिक्रमण संरचना हटाउन माग गरिरहेका छौं। तर, उपमहानगरपालिका आनाकानी गरिरहेको छ।’ उनले नालीमाथि भौतिक संरचना निर्माण हुँदा सडक क्षेत्र पनि साँघुरिदै गएको बताए।
कैलाली बहुमुखी क्याम्पसका सह–प्राध्यापक मोहनसिंह साउदको घर पनि सोही बस्तीमा रहेको छ। उनले सडक चौडा बनाउन आफनो घरको पर्खाल भत्काए। बस्तीको सडक चौडा बनाउन सहज होस भनी उनले पर्खाल भत्काए पनि नाली अतिक्रमण निर्माण भएका अन्य घरधनीले पनि भत्काएनन्। उनी भन्छन्, ‘मुख्य सडक चौडा गर्ने बेला भत्काइएका घरहरु पनि पछाडि बनाउन उपमहानगरपालिकाले अनुमति दिएको भनी संरचना निर्माण भइरहेका छन्।’
धनगढी उपमहानगरपालिका वडा नम्बर १ का वडा अध्यक्ष सन्तोष मुडभरीले उपमहानगरपालिकाले अतिक्रमित संरचना हटाउने कामबाट पछि नहट्ने बताए। उनले भने, ‘अहिले केही समस्या आएको छ। त्यसबारे नगर प्रमुख गोपाल हमालसँग छलफल गरी नाली अतिक्रमण गरेर बनेका संरचना हटाउन दबाब दिइने छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
