काठमाडौं– अकुत सम्पत्ति कमाएको भन्दै ९ जना प्रहरी अधिकारीविरुद्ध अख्तियार दुरुपयोग अनुसन्धान आयोगमा उजुरी परेको छ। पदको दुरुपयोग गरी अकुत सम्पत्ति कमाएको छानबिन गरी पाउँ भन्दै उजुरी परेको हो।
विभिन्न ठाउँमा पोस्टिङ हुँदा प्रहरी आचरणविपरित काम गरेको, अधिकारको दुरुपयोग गरी लाभ लिएको, भ्रष्टाचार गरेको लगायत दाबी गर्दै उजुरी गरिएको छ।
डीएसपीहरू ऐन मल्ल, राकेश पोद्दार, मदन कुँवर, टीका कार्की, विजय कुँवर र चारजना इन्स्पेक्टरविरुद्ध उजुरी परेको हो।
९ जनालाई एकमुष्ट दिइएको उजुरीको दर्ता नम्बर सी–०३३०१६ छ। उक्त उजुरी गत १७ गते दर्ता भएको पाइएको छ।
उजुरीमा २०५२ सालमा असईमा भर्ना भएका ऐनले पदको दुरुपयोग गरी अकुत सम्पत्ति कमाएको दाबी गरिएको छ। हाल इलाका प्रहरी कार्यालय कोहलपुरमा कार्यरत रहेका मल्लले अकुत सम्पत्तिकै कारण काठमाडौंको टोखामा घर ठड्याएको, सेयरमा ५ करोड रुपैयाँ बराबर लगानी गरेको आरोप लगाइएको छ। बाँकेमा ट्राफिक भएर बस्दा, महाराजगञ्जमा पुलिस रिपोर्ट दिने ठाउँमा बस्दा, अकुत सम्पत्ति कमाएको आरोप लगाइएको छ।
२०५२ सालमै असईमा भर्ना भएका डीएसपी राकेश पोद्दारले पनि वीरगञ्ज, झापा, विराटनगर ट्राफिकमा बस्दा अकुत सम्पत्ति कमाएको आरोप उजुरीमा लगाइएको छ। ट्राफिकमा बस्दा अकुत सम्पत्ति कमाएको आरोप उजुरीमा लगाइएको छ।
प्रहरी प्रधान कार्यालयको बजेट शाखामा रहेका डीएसपी विजय कुवँरले पनि अकुत सम्पत्ति कमाएर घरजग्गामा लगानी गरेको दाबी गरिएको छ। उनी पनि २०५२ मा असईमा भर्ना भएका थिए।
प्रहरी प्रधान कार्यालयको कल्याण्ड लेखा शाखामा रहेका डीएसपी मदन कुँवरले पनि अुकत सम्पत्ति कमाएको दाबी गरिएको छ। लेखापालमा रहँदा उनले भ्रष्टाचार गरी अकुत सम्पत्ति कमाएकाले छानबिन हुनुपर्ने उजुरीमा उल्लेख गरिएको छ। उनी पनि २०५२ सालमा असईमै भर्ना भएर प्रहरी सेवा प्रवेश गरेका अधिकृत हुन्।
अर्का डीएसपी टिका कार्की कोटेश्वर प्रभाग, इलाका प्रहरी कार्यालय पकली, इलाका प्रहरी कार्यालय धुलाबारीको इन्चार्ज रहेका बेला अकुत सम्पत्ति कमाएको आरोप लगाउँदै उजुरी दिइएको छ।
त्यसैगरी, चारजना इन्स्पेक्टरहरूले पनि अकुत सम्पत्ति कमाएकाले छानबिन गरी कारबाही गर्नुपर्ने भन्दै उजुरी हालिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914053.png)
-1764146706.png)
-1775812183.jpg)
-1779545841.jpg)
