काठमाडौं– पूर्व प्रधानमन्त्रीत्रय शेरबहादुर देउवा, केपी शर्मा ओली र माधवकुमार नेपालले प्रतिनिधि सभा विघटनलाई लिएर कटाक्ष गरिरहेको बेलामा प्रधानमन्त्री पुष्पकमल दाहाल प्रचण्डले भने सांकेतिक जवाफ दिएका छन्।
विश्वासको मत माग्ने प्रस्तावमाथिको छलफलपछि जवाफ दिने क्रममा उनले हिजो सदन विघटन गर्नु सही थियो वा थिएन भन्ने विषय अहिले सत्ता साझेदारभित्रको विषय नभएको बताए। ‘यो हामी सबैलाई थाहा भएकै कुरा हो। हामीले जतिबेला संविधान सभाबाट संविधान बनाउँदै थियौँ। विगतमा विघटनका अनुभवहरु, त्यसले के कस्तो भयो भन्ने कुराको समीक्षा हामी सबैले गरेकै हौँ। र आउने दिनमा सदनलाई सर्वोपरी बनाउने कुरामा हामी सबैको सहमति थियो नै,’ उनले भने।
प्रचण्डले भोलि संविधान संशोधन र परिमार्जन गर्ने कुरा त्यसलाई नयाँ ठाउँमा पुर्याउने कुरा हुनसक्ने भए पनि २०७२ को संविधानले जे अंगिकार गरेको छ, संशोधन र परिमार्जन नहुँदासम्म त्यसकै मर्म र भावनाअनुसार अगाडि बढ्न आफूहरु प्रतिबद्ध रहेको बताए।
‘मैले प्रधानमन्त्रीको हैसियतमा सत्ता साझेदारहरुको न्यूनतम कार्यक्रमका आधारमा पनि मलाई संविधानको मर्म र भावनाभन्दा कहीँ कतै दायाँबायाँ गर्ने छुट छैन। म संविधानको रक्षाको निम्ति अन्तिम समयसम्म प्रयास गरिराख्ने प्रतिबद्धता यहाँ व्यक्त गर्न चाहन्छु,’ उनले भने।
सोमबारको बैठकमा ओलीले प्रतिनिधि सभा विघटन गर्नु प्रतिगमन नभएको बताएका थिए। २०७७ पुस र २०७८ जेठमा गरेको प्रतिनिधि सभा विघटनको उनले बचाउ गरेका थिए। मंगलबारको बैठकमा उनले सोही धारणा दोहोर्याएका थिए। मंगलबारको बैठकमा देउवा र नेपालले ओलीले प्रतिवाद गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-(1)-1788014032.jpeg)
-1786602170.png)
-1787821306.jpg)
-1786513116.png)
