काठमाडौं– १५ दिन अगाडि कांग्रेस सभापति शेरबहादुर देउवासँग असहमति राख्दै एमाले अध्यक्ष केपी शर्मा ओली निवासतिर लागेका माओवादी केन्द्रका अध्यक्ष पुष्पकमल दाहाल प्रचण्ड सोमबार साँझ पुनः देउवातिर सोझिए। यो १५ दिनमा प्रचण्ड प्रधानमन्त्री बनेका छन् भने देउवा सत्ताबाहिर पुगेका छन्। प्रतिनिधि सभाको सबैभन्दा ठूलो दल भएर पनि कांग्रेस सत्ता बाहिर हुन पुगेकोमा देउवाले आलोचना खेपिरहेका छन्। यसैबीच, विगत दुई वर्षदेखि सत्ताबाहिर रहेको एमाले सत्ताकै प्रमुख साझेदार बन्न पुगेको छ।
सोमबार साँझ प्रधानमन्त्री प्रचण्ड एकाएक कांग्रेस सभापति देउवा निवास धुम्बाराहीतिर लागेपछि चर्चा पाउन स्वाभाविक थियो। त्यहीमाथि उनले आफ्ना लागि विश्वासको मत मागेको र देउवाले समर्थन जनाएको समाचारले थप चर्चा पायो। पार्टीभित्र असन्तुष्टि हुँदाहुँदै देउवाले विश्वासको मत दिने सहमति जनाएका थिए। मंगलबार बिहानको केन्द्रीय कार्यसम्पादन समितिको बैठक र संसदीय दलको बैठकबाट कांग्रेसले औपचारिक रुपमै विश्वासको मत दिने निर्णय लिएको थियो।
कांग्रेसको निर्णयमा पार्टीभित्रै असहमति व्यक्त भएका छन्। तर, देउवा प्रधानमन्त्री प्रचण्डकै पक्षमा उभिएका छन्। देउवाको यो निर्णयले संसद् प्रतिपक्षीविहीन बन्न पुगेको छ। जानकारहरुले कांग्रेसको निर्णयलाई अस्वाभाविक रुपमा लिएका छन्। तर, प्रचण्ड र देउवालाई पुनः निकट बनेको परिप्रेक्ष्यमा सोमबारका दुई घटनाक्रमलाई केलाउन वाञ्छनीय हुन्छ।
सोमबार बसेको प्रतिनिधि सभाको पहिलो बैठकमा प्रधानमन्त्रीसहित अन्य सबै दलहरुका शीर्ष नेताहरुले शुभकामना मन्तव्य दिएका थिए। एमाले अध्यक्ष केपी शर्मा ओलीले भने आफू प्रधानमन्त्री हुँदा गरेको दुई पटकको प्रतिनिधि सभा विघटनको औचित्य पुष्टि गर्ने प्रयत्न गरे। उनले प्रतिनिधि सभा विघटन गर्नु प्रतिगमन पनि नभएको दोहोर्याए।
ओलीको उक्त अभिव्यक्तिले प्रधानमन्त्री प्रचण्डलाई अहसजिलो बनाएको सहजै बुझ्न सकिन्छ। किनकि, ओलीले गरेको प्रतिनिधि सभा विघटनविरुद्ध आन्दोलनको नेतृत्व उनैले गरेका थिए। र कांग्रेस सभापति देउवालाई प्रधानमन्त्री बनाएर प्रतिनिधि सभाको पूर्ण कार्यकाल सुनिश्चित गराएका थिए।
संसद बैठकपछि प्रधानमन्त्री प्रचण्डलाई प्रत्रकारहरुले ओलीकै अभिव्यक्तिका सन्दर्भमा प्रश्न तेर्स्याएका थिए। तर उनले कुनै प्रतिक्रिया जनाएनन्। मौन रहेरै बाहिरिए। परिस्थिति यस्तो छ, प्रचण्डलाई ओलीका बारेका आलोचनात्मक टिप्पणी गर्न अप्ठ्यारो छ। किनकि, ओलीकै आडभरोसामा उनलाई सत्ता प्राप्त भएको छ।
कांग्रेस महामन्त्री गगन थापाले त सोमबार नै संसद् भवन परिसरमा ओलीको अभिव्यक्ति नै प्रचण्डसँग विग्रहको कारक बन्न सक्ने आशंका व्यक्त गरेका थिए। प्रचण्डले पनि सो परिस्थितिलाई आकलन गरेरै देउवासँग पुग्न उत्प्रेरित भएको हुनसक्छ।
साथै, सोमबार नै एमाले अध्यक्ष ओलीले अर्को व्यवहार देखाए। जसको खासै चर्चा भएन, तर सांकेतिक थियो। सोमबार साँझ सतारुढ दलहरुले नयाँ सरकारको न्यूनतम साझा कार्यक्रम सार्वजनिक गरे। त्यस कार्यक्रममा एमाले अध्यक्ष ओली मुख्य र बीचको कुर्सीमा बसेका थिए, प्रधानमन्त्री प्रचण्ड भने छेउमा। यसले कुनै न कुनै रुपमा प्रचण्डमाथि ओलीको ‘प्रभुत्व’ पुष्टि गर्थ्यो।
हुन त ओली सत्तारुढ दलहरुको समन्वय समितिका संयोजक हुन्। त्यसैले उनलाई बीचमा राखिनु सान्दर्भिक हो भन्ने तर्क गर्न सकिएला। तर, तत्कालीन नेकपामा ओली र प्रचण्डमा विग्रह उत्पन्न हुनुमा अन्य कैयौँ कारण जस्तै कुर्सीको ‘पोजिसन’को पनि भूमिका थियो।
आफूमाथि ओलीको दबदबालाई सुरुमै ‘साइज’मा ल्याउने एउटा प्रयत्नस्वरुप प्रचण्डले देउवासँग संवाद बढाएका हुन सक्छन्।
त्यसो त, यी सबै घटनाक्रममा कांग्रेस र देउवाको आफ्नै रणनीति देखिन्छ। ऊ एमाले र माओवादीलाई अलग राख्ने रणनीतिमा देखिन्छ। तत्कालमा विभिन्न पदहरुमा हुने भागबण्डा र भविष्यमा सत्ता सम्भावना समेत त्यसमा जोडिन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
