काठमाडौं- संघमा प्रतिनिधि सभाको पहिलो अधिवेशन जारी रहँदा दुई वटा प्रदेशले भने नयाँ मुख्यमन्त्री पाएका छन्। सोमबार बागमती प्रदेशमा शालिकराम जम्कट्टेल र गण्डकी प्रदेशमा खगराज अधिकारी मुख्यमन्त्री नियुक्त भएका हुन्। उनीहरु क्रमशः माओवादी केन्द्र र नेकपा एमालेका संसदीय दलका नेता हुन्।
बागमती प्रदेशका प्रमुख यादवचन्द्र शर्मा र गण्डकी प्रदेशका प्रमुख पृथ्वीमान गुरुङले गत पुस २१ गते मुख्यमन्त्रीमा दाबी गर्नका लागि आज (सोमबार) बेलुका ४ बजेभित्रको समय दिएका थिए। सोही अनुसार जम्कट्टेल र अधिकारीले दाबी पेश गरेका थिए।
संघीय सरकारमा सत्ता साझेदारी गरेका दलहरुको आइतबार साँझ बसेको बैठकले कुन प्रदेशमा कुन दलले नेतृत्व गर्ने टुंगो लगाएको थियो। त्यसमा बागमती प्रदेशमा पहिलो चरणमा माओवादी केन्द्रले मुख्यमन्त्री लिने सहमति भएको थियो। त्यस्तै, गण्डकी प्रदेशमा एमालेले एकल रुपमा मुख्यमन्त्री लिने सहमति भएको थियो।
जम्कट्टेललाई ७० सांसदको समर्थन
माओवादी केन्द्रका जम्कट्टेलले सोमबार एमाले, माओवादी केन्द्र, राप्रपा, एकीकृत समाजवादी र हाम्रो नेपाली पार्टीको समर्थनसहित मुख्यमन्त्रीमा दाबी पेश गरेका थिए। ती सबै पार्टीको गरी उनलाई ७० सांसदको समर्थन देखिन्छ। ११० सदस्यीय बागमती प्रदेश सभामा मुख्यमन्त्रीमा दाबी गर्नका लागि न्यूनमत ५६ सांसदको समर्थन आवश्यक पर्छ।
संघमा एकीकृत समाजवादीले प्रधानमन्त्री पुष्पकमल दाहाल ‘प्रचण्ड‘लाई विश्वासको मत दिने वा नदिनेबारे प्रष्टसँग केही नभनेको बेलामा सोही पार्टीका प्रदेश सांसदहरूले भने मुख्यमन्त्रीमा जम्कट्टेलाई समर्थन जनाएका छन्।
उनी पुस १६ गते संसदीय दलको नेतामा चयन भएका थिए। त्यस दिन काठमाडौंमा बसेको माओवादी केन्द्रको संसदीय दलको बैठकले उनलाई सर्वसम्मत रुपमा संसदीय दलको नेतामा चयन गरेको हो।
प्रदेश संसदीय दलको नेताका लागि माओवादी केन्द्रका बागमती प्रदेशका अध्यक्ष सरल सहयात्रीको पनि दाबी थियो। उनले चुनावको तयारी पनि गरेका थिए। तर, चुनावै नगराई जम्कट्टेललाई संसदीय दलको नेता बन्ने वातावरण बनाइएको थियो।
जम्कट्टेल सोही प्रदेशका पूर्वआन्तरिक मामिला तथा कानुन मन्त्री समेत हुन्। उनी यो प्रदेशका चौंथो मुख्यमन्त्री हुन्। यसअघि यस प्रदेशमा डोरमणि पौडेल, अष्टलक्ष्मी शाक्य र राजेन्द्र पाण्डे मुख्यमन्त्री भइसकेका छन्।
मंसिर ४ मा सम्पन्न प्रदेश सभा निर्वाचनमा जम्कट्टेल धादिङ- १ (ख) बाट प्रदेश सभामा सदस्यमा निर्वाचित भएका थिए।
अधिकारीलाई ३३ सांसदको समर्थन
नेकपा एमालेका खगराज अधिकारीले सोमबार एमाले, माओवादी केन्द्र, राप्रपा र स्वतन्त्र (दीपक मनाङे)को समर्थनसहित दिउँसो साढे २ बजे मुख्यमन्त्रीमा दाबी पेश गरेका थिए। ती सबैगरी उनलाई ३३ सांसदको समर्थन देखिन्छ। ६० सदस्यीय गण्डकी प्रदेश सभामा मुख्यमन्त्रीमा दाबी गर्नका लागि न्यूनमत ३१ सांसदको समर्थन आवश्यक पर्छ।
संघीय गृहमन्त्री समेत भइसकेका अधिकारी यसपटक मुख्यमन्त्री बन्ने लक्ष्यसहित प्रदेश सभा सदस्यका लागि निर्वाचन लडेका थिए। उनी कास्की- १ (क) बाट निर्वाचित भएका हुन्। उनी एमालेको संगठन विभाग प्रमुख पनि हुन्।
अधिकारी गत पुस १० गते संसदीय दलको नेतामा चयन भएका थिए। त्यसदिन बसेको संसदीय दलको बैठकमा लिलाबहादुर थापाले अधिकारीलाई संसदीय दलको नेता बनाउन प्रस्ताव गरेका थिए। त्यस्तै, रोशन गाहा मगरले समर्थन गरेका थिए। बैठकले उनलाई सर्वसम्मत रुपमा संसदीय दलको नेतामा चयन गरेको थियो।
अधिकारी गण्डकी प्रदेशका तेस्रो मुख्यमन्त्री हुन्। यसअघि सो प्रदेशमा पृथ्वीसुब्बा गुरुङ र कृष्णचन्द्र पोखरेल मुख्यमन्त्री भइसकेका छन्।
अधिकारीले सोमबार नै पद तथा गोपनियताको शपथ लिएका छन्। साथै, तीन मन्त्री नियुक्त गरेका छन्। उनीहरुले पनि शपथ लिएका छन्। उनीहरुको मन्त्रालय भने तोकिएको छैन। शपथ लिनेहरुमा एमालेबाट सीता सुन्दास, माओवादी केन्द्रबाट हरि चुमान र राप्रपाबाट पञ्चराम गुरुङ छन्।
प्रदेश १ का मुख्यमन्त्रीले लिए शपथ
आइतबार प्रदेश १ को मुख्यमन्त्री नियुक्त भएका हिक्मत कार्कीले पद तथा गोपनियताको शपथ लिएका छन्। उनले सोमबार दिउँसो प्रदेश प्रमुख परशुराम खापुङसमक्ष शपथ लिएका हुन्।
कार्कीले आइतबार मात्रै एमाले, माओवादी केन्द्र, राप्रपा र जसपाको समर्थनसहित मुख्यमन्त्रीमा दाबी पेश गरेका थिए। उनी आइतबार नै मुख्यमन्त्री नियुक्त भएका थिए।
आइतबार साँझ नै सत्ता साझेदार दलहरुबीच भएको सहमति अनुसार प्रदेश १ को मुख्यमन्त्री पूर्ण कार्यकाल एमालेलाई नै दिने सहमति भएपछि प्रदेश १ सभाका माओवादी सांसदहरु आक्रोशित भएका छन्। उनीहरुले आलोपालो सरकारको नेतृत्व गर्न पाउनुपर्ने बताएका छन्। त्यसको असर सोमबारको मन्त्रिपरिषद् गठनमा पनि प्रकट भएको छ।
कार्कीले माओवादी बाहेककै एक/एक जना समेटेर मन्त्रिपरिषद् गठन गरेका छन्। उनले एमालेका तीलकुमार मेन्याङ्बो, राप्रपाका भक्तिप्रसाद सिटौला र जसपाका निर्मला लिम्बुलाई मन्त्री बनाएका छन्। तर, उनीहरुलाई मन्त्रालय तोकिएको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788007575.jpg)
-1786602170.png)
-1787821306.jpg)
-1786513116.png)
