काठमाडौं– गण्डकी प्रदेशका मुख्यमन्त्री खगराज अधिकारीले पद तथा गोपनियताको शपथ लिएका छन्। उनले सोमबार बेलुका शपथ लिएका हुन्।
अधिकारीले ३ मन्त्री पनि नियुक्त गरेका छन्। उनीहरुले पनि सोमबार नै शपथ लिएका छन्। उनीहरुको मन्त्रालय भने तोकिएको छैन। शपथ लिनेहरुमा एमालेबाट सीता सुन्दास, माओवादी केन्द्रबाट हरि चुमान र राप्रपाबाट पञ्चराम गुरुङ छन्।
अधिकारी सोमबार मात्रै मुख्यमन्त्री नियुक्त भएका हुन्। उनले एमाले, माओवादी केन्द्र, राप्रपा र स्वतन्त्र (दीपक मनांगे) को समर्थन सहित दिउँसो साढे २ बजे मुख्यमन्त्रीमा दाबी पेश गरेका थिए। ती सबै पार्टी गरी उनलाई ३३ सांसदको समर्थन देखिन्छ। ६० सदस्यीय गण्डकी प्रदेश सभामा मुख्यमन्त्रीमा दाबी गर्नका लागि न्यूनमत ३१ सांसदको समर्थन आवश्यक पर्छ।
संघीय गृहमन्त्री समेत भइसकेका अधिकारी यसपटक मुख्यमन्त्री बन्ने लक्ष्यसहित प्रदेश सभा सदस्यका लागि निर्वाचन लडेका थिए। उनी कास्की- १ (१)बाट निर्वाचित भएका हुन्। उनी एमालेको संगठन विभाग प्रमुख पनि हुन्।
अधिकारी गत पुस १० गते संसदीय दलको नेतामा चयन भएका थिए। त्यस दिन बसेको संसदीय दलको बैठकमा लिलाबहादुर थापाले अधिकारीलाई संसदीय दलको नेता बनाउन प्रस्ताव गरेका थिए। त्यस्तै, रोशन गाहा मगरले समर्थन गरेका थिए। बैठकले उनलाई सर्वसम्मत रुपमा संसदीय दलको नेतामा चयन गरेको थियो।
अधिकारी गण्डकी प्रदेशका तेस्रा मुख्यमन्त्री हुन्। यसअघि सो प्रदेशमा पृथ्वीसुब्बा गुरुङ र कृष्णचन्द्र पोखरेल मुख्यमन्त्री भइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770957149.png)
-1764146706.png)
-1770562345.jpg)
