काठमाडौं– सत्ता साझेदार दलका शीर्ष नेताहरुको बैठकले सरकारलाई विश्वासको मत दिनका लागि प्रतिनिधि सभामा प्रतिनिधित्व गर्ने सबै दललाई आग्रह गर्ने निर्णय गरेको छ।
आइतबार साँझ प्रधानमन्त्रीको सरकारी निवास बालुवाटारमा बसेको सत्ता साझेदार दलहरुका शीर्ष नेताहरुको बैठकले प्रधानमन्त्री पुष्पकमल दाहाल (प्रचण्ड)लाई विश्वासको मत दिनका लागि सबै दललाई आह्वान गर्ने निर्णय गरेको हो।
प्रधानमन्त्री प्रचण्डले प्रतिनिधि सभाको पुस २६ गतेको बैठकमा विश्वासको मतका लागि प्रस्ताव पेस गर्दै छन्। बैठकले प्रतिनिधि सभामा प्रतिनिधित्व गर्ने १२ वटा राजनीतिक दल र सबै स्वतन्त्र सांसदलाई विश्वासको मतको पक्षमा मतदान गर्नका लागि आह्वान गर्ने निर्णय गरेको राष्ट्रिय प्रजातन्त्र पार्टीका अध्यक्ष राजेन्द्र लिङ्देनले जानकारी दिए।
आइतबारको बैठकले प्रदेशहरुको भागबण्डा पनि टुंगाएको छ। जसअनुसार प्रदेश १, गण्डकी र बागमतीमा नेकपा एमालेको नेतृत्वमा पूर्ण कार्यकालका लागि सरकार गठन हुनेछ। यस्तै, कर्णाली प्रदेशमा माओवादी केन्द्रको नेतृत्वमा पूर्ण कार्यकालका लागि सरकार गठन हुनेछ।
सुदूरपश्चिम प्रदेश र बागमती प्रदेशमा एमाले र माओवादीले आधा–आधा कार्यकाल सरकारको नेतृत्व गर्ने सहमति जुटेको लिङ्देनले जानकारी दिए। मधेस प्रदेशमा जनता समाजवादी पार्टी र जनमत पार्टीले आधा–आधा कार्यकाल सरकारको नेतृत्व गर्नेछन्।
आइतबारको बैठकमा प्रधानमन्त्री तथा माओवादी केन्द्रका अध्यक्ष प्रचण्ड, नेकपा एमालेका अध्यक्ष केपी शर्मा ओली, उपप्रधान एवम् गृहमन्त्री तथा राष्ट्रिय स्वतन्त्र पार्टीका सभापति रवि लामिछाने, राप्रपा अध्यक्ष लिङ्देन, जसपा अध्यक्ष उपेन्द्र यादव र जनमत पार्टीका अध्यक्ष सीके राउत सहभागी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771852392.png)
-1771851152.png)
-1764146706.png)
