काठमाडौं– पुस २५ गते (सोमबार) संघीय संसद्को पहिलो अधिवेशन सुरु हुँदैछ। मंसिर ४ गते सम्पन्न निर्वाचनपछि पहिलोपटक सोमबार प्रतिनिधि सभा र राष्ट्रिय सभाको बैठक बस्न लागेको हो।
पहिलो अधिवेशनअन्तर्गत दिउँसो १ बजे सुरु हुने बैठकका लागि सबै तयारी पूरा भएको संघीय संसद् सचिवालयले जानकारी दिएको छ।
संघीय संसद् सचिवालयका सहायक प्रवक्ता दशरथ धमलाले संघीय संसद्को पहिलो अधिवेशनको सबै तयारी पूरा भएको जानकारी दिए। अधिवेशनका लागि आवश्यक प्रशासनिक, व्यवस्थापकीय र प्राधिविक पक्षका सबै कामहरु पूरा गरिएको सहप्रवक्ता धमलाको भनाइ छ।
संघीय संसद् अन्तर्गतको प्रतिनिधि सभा र राष्ट्रिय सभा दुवैको बैठक सोमबार एकसाथ बस्दैछ। प्रतिनिधि सभा बैठकका लागि सर्वदलीय बैठक र राष्ट्रिय सभा बैठकका लागि कार्य व्यवस्था परामर्श समितिको बैठक बसेर पहिलो अधिवेशनका लागि आवश्यक निर्णय गरिएको र सोही बैठकको निर्णयअनुसार संघीय संसद् सचिवालयले आवश्यक व्यवस्था मिलाएको सहप्रवक्ता धमलाको भनाइ छ।
‘संघीय संसद्को अधिवेशन भोलि (सोमबार)देखि सुरु हुँदैछ। दुवै सभाका बैठकहरु एकसाथ १ बजेबाट सुरु हुन्छन्। संघीय संसद् सचिवालयले यसको सन्दर्भमा गर्नुपर्ने तयारीहरु सम्पूर्ण रुपमा पूरा गरिसकेको छ,’ धमलाले भने।
यस पटक केही नयाँ दलहरु पनि निर्वाचित भएर आएकाले दलका लागि आवश्यक पर्ने संसदीय दलका कार्यालयहरु नयाँ ठाउँमा व्यवस्थापन गरिएको धमलाले जानकारी दिए।
‘नयाँ निर्वाचित भएर आएका दलका लागि आवश्यक पर्ने संसदीय दलको कार्यालयहरु हामीसँग थिएनन्। न ठाउँ थियो, न हामीसँग पर्याप्त स्रोत, साधनको आधारमा भवनहरु बनाउन सकिने अवस्था नै थियो। तत्काल हामीले नेपाल सरकारसँग समन्वय गर्यौं। र सरकारले केही संरचनाहरु उपलब्ध गराइदियो। हामीले त्यसको व्यवस्था मिलाइसकेका छौं,’ धमलाले भने।
नयाँ दलबाट निर्वाचित हुने पदाधिकारीहरुलाई कानुन बमोजिम सवारी साधन उपलब्ध गराउनुपर्ने भएकाले सरकारसँग सवारीसाधनहरु माग गरिएको धमलाले जानकारी दिए।
संघीय संसद् सचिवालयले सत्तापक्ष र प्रतिपक्ष दलका सांसदहरुलाई दलीय प्रतिनिधित्वको आधारमा बस्न मिल्ने गरी सिटको व्यवस्था गरिएको पनि जानकारी गराएको छ। तर स्थान अभावका कारण सबै दलका संसदीय दलका नेताहरुलाई पहिलो लहरमा राख्ने गरी सिटको व्यवस्था भने गर्न नसकिएको सहायक प्रवक्ता धमलाले बताए।
संघीय संसद्मा १२ वटा राजनीतिक दलहरुको प्रतिनिधित्व रहेको छ। ‘१२ वटा दलहरुलाई समेटेर यो सिटको व्यवस्थापन गर्नुपर्नेछ। हामीसँग भौतिक संरचना यति नै हो। थप छैन,’ धमलाले भने।
कोभिड संक्रमणको जोखिम कम नभएकाले बीचमा एउटा सिट खाली राखेर सांसदहरुको सिट व्यवस्थापन गरिएको धमलाले जानकारी दिए।
अधिवेशनमा सबै दलका संसदीय दलका नेताहरुले बोल्ने कार्यसूचि तय गरिएको छ। संघीय संसद्मा सांसदहरुले पनि ईहाजिरी गर्ने व्यवस्था मिलाइएको छ। सोमबारबाट परीक्षणका लागि राष्ट्रिय सभामा सुरु हुने र परीक्षणपछि दुवै सदनमा त्यसलाई लागू गर्ने योजना तय गरिएको पनि संघीय संसद् सचिवालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914053.png)
-1764146706.png)
-1775812183.jpg)
-1779545841.jpg)
