काठमाडौं– आफनो नेतृत्वको सत्ता गठबन्धन भत्किएको १० दिनपछि नेपाली कांग्रेसले मुख खोलेको छ।
पुष १० मा कांग्रेससँगको गठबन्धन तोड्दै नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ नेकपा (एमाले) सँग सहकार्य गरेर नयाँ प्रधानमन्त्री बनेका थिए। त्यसपछि केन्द्रदेखि प्रदेशसम्म सत्ताविहीन हुन पुगेको कांग्रेसले आफ्ना कारण गठबन्धन नभत्किएको दाबी गरेको छ।
कांग्रेस प्रवक्ता डा प्रकाशशरण महतले बुधबार पार्टी कार्यालयमा पत्रकार सम्मेलन गरेर पछिल्लो विकसित राजनीतिक घटनाक्रम बारेमा भने, ‘हामी वैकल्पिक गठबन्धन बनाउनतर्फ लागेनौं।’
त्यो बेला माओवादी अध्यक्ष प्रचण्डलाई कांग्रेसले पनि प्रधानमन्त्री बनाउन तयार रहेको खुलासा गर्दै महतले यद्यपि उनले छलफल गर्ने मौका नै नदिएको आरोप लगाए।
महतले नयाँ बनेको गठबन्धनलाई विनाकुनै विचार र विनाकुनै सिद्धान्त सत्ताका लागिमात्रै सबै एकजुट भएको आरोप लगाए। यो कतिसम्म टिक्छ भनेर आफूहरुले हेरिरहेको उनले बताए।
‘हामी प्रतिपक्षमै हुँदा पनि आफ्नो भूमिकामा सशक्त हुन्छौं’ उनले भने, ‘तर विचार र सिद्धान्त नै नमिल्नेहरु कहाँसम्म जान्छन् त्यो पनि हेरिरहेका छौं।’
कांग्रेसले माओवादीसहित पाँच दलहरुको गठबन्धन बन्दा त्यहाँ एउटा मान्यता र सिद्धान्तले काम गरेको भन्दै महतले संविधानमाथि नै प्रश्न उठाउन थालेपछि आफूहरुले त्यसको रक्षार्थ गठबन्धन गरेको स्मरण गराए। ‘अहिले केका लागि गठबन्धन बने, त्यो सर्वबिदितै छ,’ महतले भने, ‘राजा ल्याउने माग गर्नेदेखि संघीयता विरोधीसम्म एउटै मोर्चामा देखिएका छन्।’
महतले आफूहरुले राजनीतिक संस्कारभित्र रहेर संसद्मा अब रचनात्मक प्रतिपक्षको भूमिमा निभाउने पनि स्पष्ट पारे।
आफू नेतृत्वको सत्ता गठबन्धन भत्किएपछि पार्टीभित्रैबाट भइरहेको विरोधको कुनै औचित्य नरहेको भन्दै महतले पार्टीको कार्यसम्पादन समितले नै राष्ट्रपति र प्रधानमन्त्री दुवैमा काग्रेसले दाबी गर्नुपर्ने निर्णय गरेकाले पार्टीभित्र कसैले पनि नेतृत्वमाथि दोष दिनु ठीक नभएको बताए।
‘काम गर्दैजाँदा सबै सफल हुन्छ नै भन्ने होइन,’ उनले भने, ‘निर्वाचनवाट हामी पहिलो पार्टी बनेकै छांै। भविष्यमा पार्टीलाई थप सुढृढ गर्दै अर्को निर्वाचनमा एकल बहुमत ल्याउने गरी अब अगाडि बढनु पर्छ।’
प्रवक्ता महतले अब २८ गतेदेखि बस्ने पार्टीको केन्द्रीय समिति बैठकले समसामयिक राजनीतिबारे समीक्षा गर्दै पार्टीका कामहरु पनि अगाडि बढाउने जनाए।
‘निर्वाचनका कारण पार्टीका विभागहरु गठनदेखि अन्य धेरै काम यो बीचमा हामीले गर्न नसकेको अवस्था थियो,’ उनले भने, ‘अब केन्द्रीय कमिटी बैठकमा पार्टी सभापतिज्यूले सबैसँग सल्लाह गरेपछि पार्टीका कामहरु पनि अघि बढ्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1778551198-1778552039.jpeg)
-1778914053.png)
-1764146706.png)
-1779545841.jpg)
