काठमाडौं– इन्गेजमेन्ट (टिकाटालो) तोडिएपछि बानेश्वरकी २६ वर्षीया पुष्पा न्यौपानेले गरेको आत्मदाहको आरोपमा पक्राउ परेका उनका प्रेमी अहिले जेलमा छन्।
२५ दिन लामो अनुसन्धान सकिएपछि जिल्ला अदालत काठमाडौंमा उपस्थित गराइएका उनलाई पुर्पक्षमा राख्न आदेश दिएसँगै उनी जेलमा रहेका छन्।
टिकाटालो तोडिएको भन्दै केटा पक्षकाले जानकारी गराएपछि मंसिर १८ गते साँझ उनले केटाको घर अगाडि पुगेर शरीरमा पेट्रोल छर्केर आत्मदाहको प्रयास गरेकी थिइन्। त्यसपछि गम्भीर घाइते भएकी उनको उपचारको क्रममा त्रिवि शिक्षण अस्तापलमा मंसिर १९ गते बिहान मत्यु भएको थियो।
पुष्पाको मृत्यु भएपछि टिकाटालो गरिएका केटा सुधन संग्रौलाविरुद्ध आत्महत्या दुरुत्साहनमा मुद्दा परेको थियो।
पुष्पा पारिवारिक हिंसामाथि थिइन्, पहिल्यै आत्महत्याको प्रयास भएको रहेछ : संग्रौला
पुष्पा पहिल्यै पारिवारिक यौन हिंसामा रहेको र यसअघि नै आत्महत्याको प्रयास गरेको दाबी गर्दै प्रेमी संग्रौलाले बयान दिएको पाइएको छ। यी कुराहरु पुष्पा आफैंले एक दिन शेयर गरेको भन्दै संग्रौलाले बयान दिएका थिए।
कपडाको होलसेल व्यापार गर्दै आएका उत्तम न्यौपाने (पुष्पाको काका)मार्फत् संग्रौलाको पुष्पासँग चिनजान भएको थियो। उत्तमको केल्मी स्पोर्टस ब्राण्डको दरबारमार्गस्थित पसलमा पुष्पा बस्थिन्। सोही मेसोमा गत जेठमा उनीहरुबीच भेट र चिनजान भएको थियो।
कपडा किन्न दुई दाजु भाई केल्मीको दरबार्गस्थित ब्राण्डमा पुग्दा पुष्पासँग चिनजान र बोलचाल भएको र सोही राति पुष्पाले फेसबुकमा फ्रेण्ड रिक्वेसट पठाएको संग्रौलाले बताएका छन्।
त्यसपछि उनीहरु दुई जनाबीच कुराकानी सुरु हुन थालेको थियो। काका उत्तमलेसमेत रिलेसन अघि बढाउँदा राम्रो हुने सुझाव दिएका थिए। चिनजान भएको केही दिनमै पुष्पा, सुधनका दाजुभाई (सुधन र मधुसुधन) र पुष्पाको साथी श्रेया चार जनाले सँगै लञ्च गरेका थिए। त्यतिबेला पुष्पालाई सुधनले नै उनको घर बुद्धनगरसम्म पुर्याइदिएका थिए।
सम्बन्ध नजिकिँदै गएपछि गत भदौ १८ गते सुधन र पुष्पाको घरपरिवारमै सल्लाह गरेर टिकाटालोसमेत भएको थियो। जनै सुपारी दिइएको थियो। जब टिकाटालो भयो त्यसपछि भने उनीहरुको सम्बन्धमा धेरै नै उतारचढाव आउन थालेको अनुसन्धानबाट खुलेको छ।
‘एक दिन पुष्पाले मसँग मेरो एक जना पूर्वप्रेमी छ, अन्तिम पटक उसलाई भेट गर्न चाहन्छु भनिन्,’ सुधनले बयानमा भनेका छन्, ‘अर्को दिन पनि पुष्पालाई मैले किनेर ल्याई दिएको मोबाइलको कभरभित्र एउटा केटाको चिठी मैले भेटेँ। कसको चिठी हो भनी सोद्धा उक्त चिठी पनि पूर्वप्रेमीके रहेछ। त्यसपछि उनीसँग मेरो मन टाढिँदै गयो।’
पूर्वप्रेमीको चिठी नै भेटिएपछि थप बुझ्दै जाँदा उनको अन्य व्यक्तिहरुसँग पनि सम्बन्ध भएको देखिएको सुधनको दाबी छ। एकदिन बाचा नै गराएर पुष्पाले आफ्नो अतित कालो रहेको भन्दै आफ्नो व्यथासमेत सुनाएको सुधनले बयान दिएका छन्।
‘कसैले मलाई बलपूर्वक आजभन्दा केही वर्ष पहिले करणी गरेको थियो। मैले सो कुरा परिवारका सदस्यहरुलाई समेत बताएकी थिएँ तर मेरो त्यतिबेला कुनै सुनुवाई नै भएन, म पारिवारिक रुपमा नै यौन हिंसामा परेकी हुँ, म अहिले सम्म पनि घर परिवारको मान्छेहरुबाट अपहेलित भई राखेकी थिएँ, तपाईंले मलाई छोडे पनि छोड्नु, तपाईं जस्तो केटालाई मैले कुराहरु लुकाएर राख्न नसकेकी हुँदा बताएकी हुँ म विगतमा नै आत्महत्या गर्न खोजेकी थिएँ’ पुष्पाले आफूसँग भनेको भन्दै सुधनले अनुसन्धानका क्रममा बयानमा भनेका छन्।
यी कुराहरु सुनेपछि पुष्पासँग सम्बन्ध अघि बढाउन आफूलाई उचित नलागेको सुधनले बताएका छन्। बोलचाल बन्द गरेपछि सुधनका दाइ मुधुसुदनलाई समेत फोन गरेर आत्महत्या गर्नेसम्मको कुरा पुष्पाले बताएको सुधनको भनाइ छ।
दुवै जनाबीच सम्बन्ध बिग्रिएपछि जनै सुपारी फिर्ता ल्याउने भनि भदौ १७ गते फिर्ता ल्याइएको थियो। त्यसको दुई दिनपछि भदौ १९ गते पुष्पा सुधनको घर अगाडि पुगेर शरीरमा पेट्रोल छर्किएर आत्महत्या गरेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
