धनगढी– सुदूरपश्चिम प्रदेश सभामा निर्वाचित ६ जनाले स्थानीय भाषामा पद तथा गोपनियताको सपथ ग्रहण गर्ने भएका छन्।
मंसिर १५ गते १ बजे हुन लागेको नवनिर्वाचित प्रदेश सभा सदस्यहरूको पद तथा गोपनियताको सपथ ग्रहण स्थानीय भाषामा गर्न प्रदेश सभा सचिवालयमा निवेदन पेश गरेका हुन्।
सुदूरपश्चिम प्रदेशमा ५३ सदस्य छन्। नागरिक उन्मुक्ति पार्टीबाट प्रत्यक्षतर्फ निर्वाचित पाँच र नेपाली कांग्रेसतर्फ समानुपातिकबाट निर्वाचित एक गरी ६ जनाले स्थानीय भाषामा पद तथा गोपनियताको सपथ लिने भन्दै निवेदन पेश गरेको सूचना अधिकारी युवराज जैसीले जानकारी दिए।
नागरिक उन्मुक्तिबाट कैलाली क्षेत्र नम्बर १ प्रदेश सभा १ बाट निर्वाचित कैलाश चौधरी, प्रदेश सभा २ का लक्ष्मण किशोर चौधरी, निर्वाचन क्षेत्र नम्बर २ प्रदेश सभा २ का रामेश्वर चौधरी, निर्वाचन क्षेत्र नम्बर ३ प्रदेश सभा १ का घनश्याम चौधरी र २ का खुशी राम डगौरा थारूसँगै कांग्रेसबाट समानुपातिकतर्फबाट निर्वाचित कञ्चनपुरकी गीताकुमारी चौधरीले स्थानीय भाषाका लागि निवेदन दिएको उनले बताए।
प्रदेश सभा सचिवालयले सूचना जारी गर्दै स्थानीय भाषामा सपथ लिन चाहनेलाई तीन दिनभित्र निवेदन दिन अनुरोध गरेको थियो।
संविधानको धारा १८२ को उपधारा (५), प्रदेशसभा सदस्य निर्वाचन ऐन २०७४ को दफा ७५ बमोजिम निर्वाचित प्रदेश सभा सदस्यहरुमध्ये ज्येष्ठ सदस्यले प्रदेश सभाको अध्यक्षता गर्ने व्यवस्था अनुसार प्रदेश प्रमुखको कार्यालयमा सपथ ग्रहण गराउने व्यवस्था रहेको छ।
सुदूरपश्चिम प्रदेश सभामा निर्वाचित सबैभन्दा ज्येष्ठ सदस्य मानबहादुर रावल रहेका छन्। ६८ वर्षीय रावल कांग्रेसबाट अछाम क्षेत्र नम्बर २ प्रदेश सभा २ बाट निर्वाचित भएका हुन्। निर्वाचित प्रदेश सभा सदस्य रावललाई प्रदेश प्रमुख देवराज जोशीले पद तथा गोपनियताको सपथ गराउनेछन्।
प्रदेश सभा सदस्य रावलले शपथ लिएपछि ५२ जना प्रदेश सभा सदस्यलाई सपथ ग्रहण गराउने छन्। प्रदेश सभामा प्रत्यक्ष निर्वाचित ३२ र समानुपातिकतर्फबाट २१ सांसद रहेका छन्।
पद तथा गोपनियताको सपथ खाएपछिमात्र प्रदेश सभाको पहिलो बैठक ज्येष्ठ नागरिकले सञ्चालन गर्ने व्यवस्था रहेको छ। १५ गते पद तथा गोपनियताको सपथ खुवाउने र पुस १८ गते पहिलो बैठक आह्वान गरिने भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1755350560.jpg)
-1764146706.png)
