काठमाडौं– प्रधानमन्त्री पुष्पकमल दाहाल (प्रचण्ड)ले सिंहदरबार पुगेर पद्भार ग्रहण गरेका छन्। पद्भार ग्रहण गर्दै प्रधानमन्त्रीले पहिलो निर्णयमा हस्ताक्षर गरेका छन्।
प्रधानमन्त्री प्रचण्डको निजी सचिवालयका अनुसार उनले ‘सुशासन, सेवा प्रवाह र विकास निर्माणका काममा प्रभावकारिता अभिवृद्धि गर्न प्रधानमन्त्री तथा मन्त्रिपरिषद कार्यालयको सुदृढीकरणसम्बन्धी निर्णय’मा हस्ताक्षर गरेका छन्।
प्रधानमन्त्रीको पद्भार ग्रहण तथा पहिलो निर्णयमा हस्ताक्षरपछि सिंहदरबारस्थि प्रधानमन्त्री तथा मन्त्रिपरिषद्को कार्यालयमा मन्त्रिपरिषद्को पहिलो बैठक चलिरहेको छ।
एमाले–माओवादी केन्द्रसहित ७ दलको समर्थनमा आइतबार प्रधानमन्त्री नियुक्त भएका प्रचण्डले सोमबार पद तथा गोपनीयताको शपथ लिएका थिए। सोमबारै ३ जना उपप्रधानमन्त्री र ४ जना मन्त्रीले पनि पद तथा गोपनीयताको शपथ लिएका छन्।
प्रचण्ड नेतृत्वको सरकारको प्रारम्भिक मन्त्रिपरिषद्मा नेकपा एमालेबाट १ उपप्रधानमन्त्री र ३ जना मन्त्री, माओवादी केन्द्रबाट १ उपप्रधानमन्त्री, राष्ट्रिय स्वतन्त्र पार्टीबाट १ उपप्रधानमन्त्री र जनमत पार्टीबाट १ मन्त्री नियुक्त भएका छन्।
एमालेका विष्णु पौडेलले उपप्रधानसहित अर्थ मन्त्रालयको जिम्मेवारी पाएका छन्। एमालेबाट ज्वालाकुमारी साह, दामोदर भण्डारी र राजेन्द्र राई मन्त्री नियुक्त भएका छन्। माओवादी केन्द्रबाट नारायणकाजी श्रेष्ठ उपप्रधानसहित भौतिक पूर्वाधार तथा यातायातमन्त्री नियुक्त भएका छन्।
राष्ट्रिय स्वतन्त्र पार्टीबाट पार्टी सभापति एवम् संसदीय दलका नेता रवि लामिछाने उपप्रधानसहित गृहमन्त्री नियुक्त भएका छन्। यस्तै, जनमत पार्टीबाट अब्दुल खान मन्त्री नियुक्त भएका छन्। मन्त्रीहरुको जिम्मेवारी भने तोकिन बाँकी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
