काठमाडौं– ललितपुर महानगरपालिकाका प्रमुख (मेयर) चिरिबाबु महर्जनले काठमाडौं उपत्यकामा अब मेट्रोको विकल्प नरहेको बताए। शनिबार ललितपुर महानगरपालिकाको १०४ औं स्थापना दिवसका अवसरमा बोल्दै उनले काठमाडौं उपत्यकामा अब मेट्रोको विकल्प नरहेको बताएका हुन्।
मेयर महर्जनले मेट्रो रेल धेरै महंगो छ भनेर पछि हट्नु नहुने स्पष्ट पार्दै अब पनि मोटरसाइकल ल्याएर उपत्यकामा ट्राफिक जाम बढाउनुभन्दा मेट्रो रेल सञ्चालनका लागि आवश्यक तयारी थाल्नुपर्ने बताए। मेट्रो रेलको विकल्प मोेटरसाइकल किमार्थ हुन नसक्ने दाबी गर्दै उनले उपत्यकामा मेट्रोको विकल्प नै रहेको बताए।
मेयर महर्जनले अन्तर्राष्ट्रिय अध्ययनअनुसार पनि ३० लाख जनसंख्या भएको ठाउँका लागि मेट्रो अपरिहार्य रहेको भन्दै विलम्व नगरी मेट्रोको आवश्यक तयारी गर्नुपर्ने धारणा राखे। उनले मेट्रो रेलको लागि सरकारको अनुहार हेरेर कहिल्यै सम्भव नहुने भन्दै काठमाडौं र ललितपुर महानगरपालिका लगायत काठमाडौं उपत्यकाका १८ वटा पालिकाको राम्रो भूमिका यसमा हुनुपर्ने बताए। उनले विशेषगरी मेट्रो रेल सञ्चालनका लागि काठमाडौं महानगरपालिकाले प्रमुख भूमिका खेल्नुपर्ने बताए।
‘काठमाडौं उपत्यकामा अब मेट्रोको विकल्प छँदैछैन। मेट्रो चलाउनैपर्छ। आज निर्णय गर्नसक्यौँ भने अर्को १० देखि १५ वर्षसम्ममा त्यो सकिन्छ,’ उनले भने, ‘मेट्रो ज्यादै महंगो छ रे भन्ने सुन्ने गरेको छु। सस्तो के त? सस्तो पनि त हुनुपर्छ। अबको १५ वर्षपछि काठमाडौं उपत्यकाभित्रको जनसंख्या झनै बढ्नेछ। यसको विकल्प के त? यही मोटरसाइकल ल्याउने? तसर्थ, यो विकल्प किमार्थ हुन सक्दैन। यसको निमित्त हामीले मेट्रो नल्याइकन सुखै छैन।’
महंगो भयो भनेर वास्तै नगर्ने पनि गर्न नहुने बताउँदै उनले कुनैपनि योजना बनाएर भएपनि मेट्रो ल्याउनैपर्ने स्पष्ट पारे। अन्तर्राष्ट्रिय अध्ययनअनुसार पनि ३० लाख जनसंख्या भएको ठाउँका लागि मेट्रो अपरिहार्य भएको भन्दै उनले विलम्ब नगरी यो काम अघि बढाउन आवश्यक रहेको बताए।
‘सरकारको अनुहार हेरेर बस्ने हो भने केही पनि हुँदैन। त्यसका लागि काठमाडौं र ललितपुर महानगरपालिकालगायत काठमाडौं उपत्यकाका १८ वटा पालिकाको राम्रो भुमिका खेल्नुपर्छ’, उनले भने, ‘त्यसमा काठमाडौं महानगरपालिका प्रमुख हो। यसमा अघि बढौँ।’
मेयर महर्जनले आफ्नो दोस्रो कार्यककालमा अझै बढी काम गरेर देखाउने दाबीसमेत गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
