तस्बिर: गेट्टी ईमेज
काठमाडौं– पाकिस्तान र अफगानिस्तानको सीमा क्षेत्रमा भएको गोलाबारीमा ६ जना पाकिस्तानी नागरिकको मृत्यु भएको छ। आइतबार दिउँसो बलुचिस्तान–कन्धार सीमा क्षेत्रमा गोलाबारी भएको थियो। गोलाबारीमा अन्य १७ जना घाइते भएका छन्।
गोलाबारीपछि पाकिस्तानी सेनाले एक बयान जारी गर्दै अफगानी सुरक्षा बलले अन्धाधुन्द गोली चलाएको आरोप लगाएको छ। अफगानी सुरक्षा बलले आर्टिलरी र गोला–बारुदको प्रयोग गरेको पाकिस्तानी सेनाको भनाइ छ। अफगानी सेनाको आक्रमणपछि पाकिस्तानी सुरक्षा बलबाट जवाफी कारबाही गरिएको पाकिस्तानी सेनाको बयानमा उल्लेख छ।
समाचार संस्था रोयटर्सका अनुसार अफगानिस्तानको कन्धार प्रहरी प्रवक्ता हाफिज सबेरले अफगानिस्तानका पनि १ जना सैनिक मारिएको बताएका छन्। यस्तै, अन्य ३ जना पनि घाइते भएका छन्, जसमा २ सर्वसाधारण छन्।
अफगान सरकारका अधिकारी नूर अहमदका अनुसार दुवै पक्षबीच कुराकानी भएपछि घटनास्थलको अवस्था सामान्य भएको छ।
अफगान सुरक्षाबलसँग सम्बन्धित स्रोतलाई उद्धृत गर्दै रोयटर्सले जनाएअनुसार पाकिस्तानी सुरक्षा बलले अफगानी सुरक्षाकर्मीलाई अफगान क्षेत्रको सीमामा एक नयाँ चेकपोस्ट बनाउन रोकेपछि झडप सुरु भएको थियो।
पाकिस्तानको चमन जिल्लाका पुलिस अधिकारी अब्दुल्लाह कासीले पाकिस्तानी अखवार डनलाई बताएअनुसार पाकिस्तानी क्षेत्रमा मोर्टार सेल खसेपछि दुवै पक्षबीच गोलाबारी सुरु भएको थियो।
अफगानिस्तानको सीमावर्ती प्रान्त कन्धारको चमन चौकी दुवै देशबीच व्यापार तथा आवतजावतको मार्ग हो।
गोलीबारीको घटनापछि पाकिस्तानी सरकारले अफगानी सरकारसँग कुरा गर्दै घटनाका सन्दर्भमा गम्भीर ध्यानाकर्षण भएको जनाएको छ।
यो क्षेत्रमा दुवै पक्षबीच झडप भएको यो पहिलो घटना भने होइन। पछिल्लो महिना पनि यस्तै प्रकारको संघर्ष हुँदा कैयौं दिनसम्म यो नाका बन्द भएको थियो। त्यतिबेला एक हतियारधारी अफगानीले पाकिस्तानी क्षेत्रमा घुसेर पाकिस्तानी सेनामाथि आक्रमण गरेका थिए। उक्त आक्रमणमा १ जना पाकिस्तानी सैनिकको मृत्यु भएको थियो भने २ जना घाइते भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775566576.png)
-1764146706.png)
