सत्ता गठबन्धनको बैठकअघि प्रचण्डको ‘साइड छलफल’, एमाले सचिवदेखि माधव नेपालसँग ‘वान टु वान’ भेटवार्ता

राजनीति

नेपाल लाइभ सोमबार, मंसिर १९, २०७९ १६:२४

काठमाडौं– प्रदेश र प्रतिनिधि सभा निर्वाचनपछि पहिलोपटक सोमबार सत्ता गठबन्धनको बैठक बोलाइयो। बैठक अहिले प्रधानमन्त्रीनिवास बालुवाटारमा जारी छ।

सत्ता गठबन्धनको बैठकअघि प्रमुख सत्ताघटक नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले भने ‘साइड छलफल’ तीव्र पारे।

उनले सत्ता सहयात्री नेकपा एकीकृत समाजवादीका अध्यक्ष माधवकुमार नेपालदेखि प्रतिपक्ष एमालेका सचिव रघुवीर महासेठसँग छुट्टाछुट्टै छलफल गरेका छन्।

सत्ता गठबन्धनको बैठकमा निर्वाचन परिणाम समीक्षा र नयाँ सरकार गठनबारे छलफल गर्ने भनिएका बेला प्रचण्डले नेपाली कांग्रेसका नेता तथा सञ्चारमन्त्री ज्ञानेन्द्र बहादुर कार्की, एमाले सचिव महासेठ र एकीकृत समाजवादीका अध्यक्ष नेपालसँग छुट्टाछुट्टै छलफल गरेका हुन्।

शनिबार र आइतबार बसेको माओवादी केन्द्रको पदाधिकारी बैठकले सत्ता गठबन्धनलाई निरन्तरता दिने तर, सरकारको नेतृत्वमा माओवादीको दाबी रहने अनौपचारिक निर्णय गरेको थियो। त्यसपछि राजनीतिक चहलपहल बढेको छ।

प्रचण्डलाई भेट्न सञ्चारमन्त्री कार्की सोमबार बिहानै खुमलटार पुगेका थिए। त्यसपछि दिउँसो १ बजे एमाले सचिव महासेठ प्रचण्डलाई भेट्न खुमलटार नै पुगेका थिए।

महासेठसँग कुरा गरेपछि प्रचण्ड नेपाललाई भेट्न कोटेश्वर पुगेका थिए। नेपाल निवासमै रहेका जनमत पार्टीका अध्यक्ष सीके राउतसँग प्रचण्ड र नेपालले केहीबेर कुरा गरेका थिए। राउत निस्केपछि प्रचण्ड र नेपालले केही समय छलफल गरेर त्यहीँबाट गठबन्धनको बैठकमा सहभागी हुन बालुवाटार पुगे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

मुलुक प्रधानमन्त्रीले नभई बिचौलियाहरुले चलाइरहेछन् : उपेन्द्र यादव

गीत बजाएको आरोपमा १४ जना पक्राउ

कावासोतीमा मोटरसाइकल दुर्घटनामा परी दाजुभाइको मृत्यु