काठमाडौं– सन् २०१३–१४ तिर बेल्जियमको राष्ट्रिय टोलीमा गोल्डेन जेनेरेसन अर्थात सुनौलो पुस्ता जन्मियो। त्यही पुस्ताले २००२ पछि पहिलोपटक ठूलो फुटबल प्रतियोगितामा बेल्जियमलाई छनोट गरायो। त्यसको सुरुवात भएको थियो, २०१४ को विश्वकपबाट।
सो विश्वकपको समूह चरणदेखि नै लगातार राम्रो पदर्शन गर्दै बेल्जियम क्वार्टरफाइनलमा पुग्यो। तर, त्यहाँ उसको चुनौती लियोनल मेसीको अर्जेन्टिनाले १–० को झिनो अन्तरले समाप्त गरिदियो। अघिल्लो अर्थात २०१८ मा भएको विश्वकपमा बेल्जियमले सनसनी मच्चायो। प्रमुख दाबेदार ब्राजिललाई क्वार्टरफाइनलबाटै घर फर्कायो। तर, उसको यात्रा साविक विजेता फ्रान्सले सेमिफाइनलमा झिनो अन्तरले हराएर समाप्त गरदियो।
प्ले अफमा इंग्ल्याण्डलाई हराउँदै बेल्जियम विश्वकपमा तेस्रो भयो। यो बेल्जियमको इतिहासमै विश्वकपको सबैभन्दा राम्रो नतिजा हो। बेल्जियम अहिले फिफा वरीयताको दोस्रो स्थानमा छ। बेल्जियम २०१५ यता ४ पटक फिफा वरीयताको शीर्ष स्थानमा रह्यो। अझ भनौं लामो समय नै रह्यो।
केभिन डे ब्रुयने, इडेन हाजार्ड, थिबाउट कोर्टवास, रोमेलु लुकाकुजस्ता खेलाडी रहेको गोल्डेन जेनेरेसनले माथिल्लो स्तरको फुटबल खेले पनि कुनै उपाधि भने जित्न सकेन। यसर्थ, योपटकको विश्वकप उनीहरूका अन्तिम अवसर भएको विश्लेषण गरिएको थियो। तर, विश्वकपको दाबेदार मानिएको बेल्जियम समूह चरणको दोस्रो खेलमा तुलनात्मक धेरै कमजोर अफ्रिकी टोली मोरक्कोसँग २–० ले पराजित भएको छ। अघिल्लो खेल क्यानडालाई १–० को झिनो अन्तरले हराएर ३ अंक जोडेको थियो बेल्जियमले। तर, दोस्रो पराजयले उसलाई समूह ‘एच’को तेस्रो स्थानमा थकेलेको छ। पहिलो स्थानमा विश्वकपको साविक उपविजेता क्रोएसिया ४ अंकसहित पहिलो स्थानमा छ। समान ४ अंक जोडेको मोरक्को गोल अन्तरमा पछि पर्दै दोस्रो स्थानमा छ। लगातार २ खेल हारेको क्यानडा शून्य अंकसहित प्रतियोगिताबाट बाहिरिइसकेको छ।
यस्तो अवस्थामा तेस्रो स्थानमा रहेको बेल्जियम उत्कृष्ट लयमा रहेको क्रोएसियासँग निर्णायक खेल खेल्दैछ। बिहीबार साँझ ८ः४५ बजे हुने यस खेल हारेमा बेल्जियम प्रतियोगिताबाट बाहिरिने निश्चत छ। किनकि, क्रोएसिया पनि समूह विजेता बन्दै अन्तिम १६ मा जान चाहन्छ। त्यसका लागि उसले सम्भवत एकैसाथ अन्तिमपटक ठूलो प्रतियोगिता जित्न कोसिस गर्ने मनसाय लिएर कतार गएको बेल्जियमको गोल्डेन जेनेरेसनलाई घर पठाउनुपर्ने छ। त्यसका लागि आफू तयार रहेको क्यानडालाई ४–१ को भारी अन्तरले हराउँदै क्रोएसियाले जनाउ घण्टी दिइसकेको छ।
अर्कोतिर मोरक्कोलाई क्यानडामाथि कम्तीमा बराबरीको नतिजा चाहिएको छ। यस्तो नतिजा आए बेल्जियमले क्रोएसियासँग बराबरी गरे पनि उ प्रतियोगिताबाट बाहिरिने छ।
त्यसो त, बेल्जियमको गोल्डेन जेनेरेसनका अधिकांश खेलाडी ३० वर्ष कटिसकेका छन्। उनीहरूसँग अर्को पटक उपाधि जित्ने अवसर नहुन सक्ने फुटबल पण्डितहरूले विश्लेषण गरिरहेका छन्। यस्तोमा बिहीबार राति प्रतियोगिताबाट बाहिरिए गोल्डेन बेल्जियमको यो जेनेरेसन समाप्त हुने उनीहरूको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
