काठमाडौं– कतारमा जारी विश्वकप फुटबलमा एसियाली राष्ट्र दक्षिण कोरियाविरुद्ध अफ्रिकी राष्ट्र घानाले ३–२ गोल अन्तरको रोमाञ्चक जित हात पारेको छ।
२–२ गोलको बराबरीको अवस्थामा मोहम्मद कुदुसले गोल गर्दै घानालाई ६८ औँ मिनेटमा ३–२ को अग्रता दिलाएका थिए। सोही गोल नै निर्णायक बनेको हो।
यसअघि घानाले २४ औँ मिनेटमा अग्रता लिएको थियो। मोहम्मद सालिसूले अग्रता दिलाएका थिए।
फेरि, ३४ मिनेटमा घानाले दोस्रो गोल थप्यो। कुदुसले नै दोस्रो गोल गरेका थिए।
तर मध्यान्तरपछि दक्षिण कोरियाले २ गोल फर्काउँदै रोमाञ्चक बराबरी गर्यो। मध्यान्तरअघि २–० ले पछि रहेकोमा दक्षिण कोरियाले दोस्रो हाफमा २ गोल नै फर्काएको हो।
दक्षिण कोरियाका चा गुई सुङले ५८ र ६१ मिनेटमा बराबरी गरेका थिए। तर, त्यो बराबरी ७ मिनेटमात्र टिक्न सक्यो। दक्षिण कोरियाले खेलको अन्त्यसम्म पनि बराबरी गर्ने प्रयास गरेको थियो तर सकेन।
यस जितसँगै घानाले ३ महत्वपूर्ण अंक जोडेको छ। समान ३ अंक जोडेको पोर्चुगलले मध्यराति दोस्रो खेल उरुग्वेविरुद्ध खेल्दैछ। उरुग्वे र दक्षिण कोरियाको समान १ अंक छ। तर, उरुग्वेले १ खेल कम खेलेको छ।
खेल बढी प्रतिस्पर्धात्मक भएकाले तनाबपूर्ण पनि भएको थियो। दक्षिण कोरियाका प्रशिक्षक पाउलो बेन्टोले रातो कार्ड पाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
