काठमाडौं– मंसिर ४ मा सम्पन्न प्रतिनिधि सभा तथा प्रदेश सभा निर्वाचनको अन्तिम मत परिणाम आउने क्रम जारी छ। यो समाचार तयार पार्दासम्म १ सय ५४ स्थानको मतपरिणाम आइसकेको छ। ११ स्थानको नतिजा आउन बाँकी छ।
संविधान जारी भएपछि २०७४ मा भएको पहिलो निर्वाचनामा प्रतिनिधि सभातर्फ ८० स्थानमा जित निकाल्दै एमाले ठूलो दल बनेको थियो। तर अहिलेसम्मको मत परिणाम हेर्ने हो भने मंसिर ४ मा सम्पन्न निर्वाचनबाट एमाले प्रत्यक्षतर्फ ४५/४६ सिटमा खुम्चिने देखिन्छ।
पार्टीका ‘स्टार क्याम्पेनर’ तथा अध्यक्ष केपी शर्मा ओलीले महत्त्वका साथ ६ वटा चुनावी सभा गरेको सुदूरपश्चिम प्रदेशमा एमालेले जम्मा २ स्थानमा र ३ वटा चुनावी सभामा भाषण गरेको कर्णाली प्रदेशमा खातै खोल्न सकेन।
यता प्रदेश १ मा पुरानो विरासत कायम गरेको छ भने मधेस प्रदेशमा एमालेको जबरजस्त उपस्थिति जनाएको छ।
त्यसो त, ०७४मा रहेको राजनीतिक समीकरण र यो निर्वाचनअघि बनेको राजनीतिक समीकरणले दलहरूले प्राप्त सिट संख्यामा फेरबदल भएको छ।
यो बीचमा अनपेक्षितरुपमा जबरजस्त उपस्थिति जनाएको राष्ट्रिय स्वतन्त्र पार्टीको पक्षमा आएको लहरले पनि मौजुदा दलहरुले अघिल्लो निर्वाचनमा प्राप्त सिट गुमाएका छन् भने नयाँ समीकरणको प्रभावले कतै थप पनि गरेका छन्।
राजनीतिक उथलपुथलले यस अघिको ठूलो दल एमालेले कुन कुन प्रदेशमा पुरानो जित दोहोर्यायो वा गुमायो भन्ने विषय प्रस्तुत गर्न यहाँ वाञ्छनीय हुन्छ।
प्रदेश–१ मा पुरानै हैसियत कायम राख्ने अवस्थामा एमाले
नेकपा एमालेले ०७४ को निर्वाचनमा प्रदेश–१ बाट प्रतिनिधि सभाका कुल २८ मध्ये १६ क्षेत्रबाट जित हासिल गरेको थियो। तत्कालीन वाम गठबन्धनको माहोलमा एमालेले ताप्लेजुङ, पाँचथर, इलाम १ र इलाम २, झापा २,४,५, मोरङ १, ३ र ६, सुनसरी १, खोटाङ, ओखलढुङ्गा, तेह्रथुम, संखुवासभा र धनकुटामा जित हासिल गरेको थियो।
यो समचार तयार पार्दासम्म एमालेले ०७४मा जित निकालेको अधिकांश स्थानमा जित निकालेको छ। नतिजा आउन बाँकी इलाम १ मा एमाले उम्मेदवारले अग्रता लिएका छन्। तर संखुवासभा, ओखलढुङ्गा, खोटाङ र मोरङ–३ मा भने एमाले पराजित भएको छ।
यसका अलवा एमालेले उदयपुर–२ मा जित निकालेको छ भने सुनसरीको २, ३, ४ मा अग्रता कायम गरेको छ। ०७४ मा सुनसरी– १ मा जित निकालेको एमालेले यो निर्वाचनमा उम्मेदवार उठाएन। पार्टीले पूर्व एमाले हाल जसपाका नेता अशोक कुमार राईलाई समर्थन गरेको छ।
अहिलेसम्मको अग्रतालाई कायम राखे एमालेले यो निर्वाचनमा प्रदेश–१ मा १६ स्थानमा जित निकाले ठूलो दल बन्नेछ।
एमाले फैलिएको प्रदेश मधेस
यो प्रदेशमा एमालेले बलियो उपस्थिति दर्ज गरेको छ। उसका लागि यो उत्साहजनक नतिजा हो।
०७४ को निर्वाचनमा एमालेले यो प्रदेशमा सिराहा–३, र धनुषा–४ मा मात्र जित निकालेको थियो। यो निर्वाचनमा सिराह–३ मा एमालेले जित हासिल गरेको छ भने धनुषा–४ मा एमाले उम्मेदवार रघुवीर महासेठ जितको लागि संघर्ष गरिरहेका छन्। यस बाहेक एमालेले यो निर्वाचनमा धनुषा–३, पर्सा–३, बारा–१ र ३, सर्लाही–३, सिरहा– १ र ३ तथा महोत्तरी–१ मा जित निकालिसकेको छ।
बागमती प्रदेश, जहाँ धेरै गुमायो एमालेले
०७४ को निर्वाचनमा एमालेले दोलखा, सिन्धुली–१, धादिङ– १ र २, नुवाकोट–२, काठमाडौं २, ३, ५, ७, ८ र ९, भक्तपुर–२, ललितपुर–१ र २, काभ्रेपलाञ्चोक–२, सिन्धुपाल्चोक–२, मकवानपुर–१ र २, चितवन–१ र २ मा जित हासिल गरेको थियो। तर यो निर्वाचनमा काठमाडौं–९, मकवानपुर–२, काभ्रे–२ ललितपुर–२ मा मात्र जित निकालेको छ।
गण्डकी प्रदेशमा जहाँ एक तिहाइ मात्र जित दर्ता गर्यो
०७४ को निर्वाचनमा एमालेले मनाङ, कास्की–१, २ र ३, तनहुँ–१ र २, स्याङ्जा १ र २, नवलपरासी बर्दघाट पूर्व–२, मुस्ताङ, म्याग्दी, बागलुङ–१ र पर्वत मा जित निकालेको थियो। यो निर्वाचनमा एमालेले कास्की–१, २ र ३ मा जित दोहोर्याएको छ। त्यस्तै, पर्वतमा पनि जित निकालेको छ। यस बाहेक अन्य क्षेत्र गुमाएको छ। स्याङ्जामा भने हालसम्म मतगणना भएको छैन। यस बाहेक एमालेले लमजुङमा जित निकालेको छ।
लुम्बिनीमा बराबरीको अवस्थामा
यस्तै यो प्रदेशमा ०७४को निर्वाचनमा गुल्मी–१ र २, पल्पा १ र २, रुपन्देही १, २, र ३, दाङ १, र ३ , र बाँके ३मा जित निकालेको थियो। यो निर्वाचनमा गुल्मी २, पाल्पा १ र २ मा जित दोहोर्याएको छ भने अर्घाखाँची, कपलिवस्तु १, प्यूठान, बाँके १, रुपन्देही ५ मा नयाँ जित नेकालेको छ। त्यस्तै, कपिलवस्तु ३, रुपन्देही १ र २ मा भने अग्रता कायम गरेको छ।
खातै खोल्न नसकेको कर्णाली
०७४ को निर्वाचनमा यो प्रदेशमा डोल्पा, मुगु, दैलेख १ र २, सुर्खेत १ र २ जित निकालेको एमालेले यो निर्वाचनमा खाता खोल्नै सकेन।
सुदुरपश्चिम प्रदेश जहाँ ओलीलाई पत्याएनन् जनताले
यो निर्वाचनको पूर्वसन्ध्यामा एमाले अध्यक्ष केपी शर्मा ओलीले दार्चुलाबाट चुनावी सभा सुरु गरे। अध्यक्ष ओलीले यो प्रदेशमा सबैभन्दा धेरै ६ वटा चुनावी सभा गरे। तर अध्यक्ष ओलीलाई यहाँका जनताले पत्याएको पाइएन। ०७४ को निर्वाचनमा बाजुरा, अछाम १ र २, बझाङ, डोटी, कैलाली २ र ५, दार्चुला, बैतडी, कञ्चनपुर २ र ३ मा जितको एमालेले यो निर्वाचनमा पुरानो जितेको स्थान सबै गुमायो।
यद्यपि, कञ्चनपुर १ र बैतडीमा भने नयाँ जित निकालेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
