विनोद चौधरीदेखि विक्रम पाण्डेसम्म, यी व्यवसायी छिर्दैछन् संसद्

राजनीति

सुमित्रा कार्की शनिबार, मंसिर १०, २०७९ १६:०४

काठमाडौं– प्रतिनिधि सभा निर्वाचन २०७९ बाट ११ व्यवसायी निर्वाचित भएर संसद्मा आउने लगभग पक्का भएको छ।
व्यवसायी बिनोद चौधरी, मोहन आचार्य, डा.शुनिल शर्मा, पूर्णबहादुर (कान्छाराम) तामाङ, दीपक खड्का, राजेन्द्र बजगाईं, लालप्रसाद (एलपी) साँवा लिम्बू, कृष्णकुमार श्रेष्ठ (किसान) र विक्रम पाण्डे संसद्मा आउने भएका हुन्।

जसमध्ये केही उम्मेदवारले निर्वाचिन जितिसकेका छन् भने केहीले हार पनि चाखेका छन्। केहीको ठाउँमा भने मतदान चुनावी प्रक्रिया नै प्रभावित भएको छ। यसपटकको निर्वाचबाट नेपाली कांग्रेसका नेता तथा व्यवसायी उमेश श्रेष्ठ भने ‘आउट’ भएका छन्।

विनोद चौधरी
विश्वका अर्बपतिहरुको सूचीमा आफ्नो नाम लेखाउन सफल व्यवसायी तथा नेपाली कांग्रेसका केन्द्रीय सदस्य विनोद चौधरी प्रतिनिधि सभा सदस्यमा निर्वाचित भएका छन्। उनले नवलपरासी (पश्चिम) क्षेत्र नम्बर १ बाट निर्वाचनमा होमिएका चौधरीले राष्ट्रिय स्वतन्त्र पार्टीका उम्मेदवार महेन्द्र सिंह ठकुरीलाई ३ हजार ८७५ को मतान्तरले पराजित गरेका हुन्।

विभिन्न व्यवसायिक संस्थाको नेतृत्वसमेत गरिसकेका उनी फोब्र्सको अर्वपति सूचीमा सामेल नेपाली व्यवसायी हुन्। २०६४ को पहिलो संविधान सभामा एमालेबाट समानुपातिक सभासद् हुनुअघि उनी राजनीतिक रुपमा परिचित थिएनन्।

तर, एमालेसँग उनको आबद्धता लामो समय रहेन। २०७४ मा सम्पन्न प्रतिनिधि सभा निर्वाचनमा उनी कांग्रेसको तर्फबाट समानुपातिक सांसद बनेका थिए।

मोहन आचार्य
निर्माण व्यवसायी तथा नेपाली कांग्रेसका केन्द्रीय सदस्यसमेत रहेका मोहन आचार्य रसुवाबाट यसपटक पनि संघीय सांसदमा निर्वाचित भएका छन्।

आचार्यले १८ हजार २३५ मत ल्याउँदै जित हात पारे। उनका प्रतिस्पर्धी छोवाङ तेन्जिङ तामाङले ड हजार ६१४ मत ल्याएका थिए। २०४६ बाट नेपाल विद्यार्थी संघमार्फत् राजनीति सुरु गरेका उनी २०७४ को प्रतिनिधि सभा निर्वाचनमा रसुवाबाटै निर्वाचित भएका थिए।

डा.शुनिल शर्मा
नेपाली कांग्रसको तर्फबाट प्रतिनिधि सभा सदस्यका लागि उम्मेदारी दिएका शुनिल शर्मा स्वास्थ्य व्यवसायी हुन्। उनी मोरङ क्षेत्र नम्बर ३ बाट प्रतिनिधि सभा सदस्यमा निर्वाचित भएका छन्।

विजयी ढकालले ४८ हजार ६३१ मत ल्याए। उनका प्रतिस्पर्धी ढकाल २५ हजार ८९५ मा सीमित रहे। शर्माले ढकाललाई २२ हजार ७३६ मतको अन्तरले ‘स्तब्ध’ पारे।

राष्ट्रिय प्रजातन्त्र पार्टीकी रेखा थापाले १० हजार ९९८ मत ल्याइन्।

कांग्रेसका शर्मा प्रतिनिधि सभामा नयाँ अनुहार हुन्। यसअघि २०७४ सालको निर्वाचनमा पनि सोही क्षेत्रबाट प्रतिस्पर्धी रहेका उनी त्यतिबेला ढकालसँगै पराजित भएका थिए।

नेकपा एमाले र माओवादी केन्द्रको तत्कालीन वाम गठबन्धनको बलमा ढकाल ४२ हजार ४१३ मत ल्याएर विजयी भएका थिए। शर्मा भने ढकालभन्दा १ हजार ९०७ मत कम, ४० हजार ५०६ मा रोकिएका थिए।

पूर्णबहादुर (कान्छाराम) तामाङ
नेपाली कांग्रेसको तर्फबाट रामेछापे–१ बाट प्रतिनिधि सभामा उम्मेदवारी दर्ता गराएका पूर्णबहादुर (कान्छाराम) तामाङ निर्माण व्यवसायी हुन्। उनको क्षेत्रमा पनि मतगणना जारी छ।

तर उनी भारी मतान्तरले एमालेका नेता कैलाशप्रसाद ढुंगेलभन्दा अगाडि छन्। तामाङले ३४ हजार १८२ मत ल्याउँदा ढुंगेलले २४ हजार ६८७२ मत प्राप्त गरेका छन्।

तामाङ रामेछाप जिल्लाका कांग्रेसका जिल्ला सभापति पनि हुन्। २०७४ को निर्वाचनमा पनि तामाङ यसै क्षेत्रबाट निर्वाचन लडेका थिए। तर, उनलाई माओवादीका उम्मेदवार श्यामकुमार श्रेष्ठले पराजित गरेका थिए।

दीपक खड्का
संखुवासभा–१ बाट निर्वाचन लडेका दीपक खड्का नेपाली कांग्रेस सखुवासभाका सभापति हुन्। उनलाई घरजग्गा व्यवसायीका रुपमा चिनिन्छ।

एमालेका नेता राजेन्द्र प्रसाद गौतमलाई पराजित गर्दै उनी यसपटक प्रतिनिधि सभा सदस्यमा निर्वाचित भएका छन्।
निर्वाचित खड्काले ३२ हजार १५८ मत पाए। उनका प्रतिस्पर्धी एमालेका गौतमले २६ हजार ७११ मत ल्याए।

खड्का २०७० को दोस्रो संविधान सभा निर्वाचनमा संखुवासभा–२ बाट विजयी भएका थिए। त्यतिबेला पनि उनले एमालेका गौतमलाई पराजित गरेका थिए। २०७४ मा भने सोही क्षेत्रमा उनै गौतमले खड्कालाई पराजित गरे। खड्का २०७३ मा खानेपानी तथा सरसफाइ राज्यमन्त्री भएका थिए।

राजेन्द्र बजगाईं
नेपाली कांग्रेसका नेता तथा पर्यटन व्यवसायी राजेन्द्र बजगाईं गोरखा–१ बाट प्रतिनिधि सभा सदस्यमा निर्वाचित भएकमा छन्। ३३ हजार ४२८ मत ल्याउँदै उनी निर्वाचित भएका हुन्।

उनका प्रतिस्पर्धी नेकपा एमालेका रामशरण बस्नेतले १६ हजार ७८५ मत पाए। कांग्रेसको चौधौं महाधिवेशनमा केन्द्रीय सदस्यका लागि भिडेका उनी पराजित भएका थिए। उनी २०७४ को निर्वाचनमा गोरखा १ (१)बाट प्रदेश सभाका लागि उम्मेदवार बनेका थिए। तर, एमालेका रामशरण बस्नेतसँगै उनी त्यसबेला पराजित भएका थिए।

लाल प्रसाद (एलपी) साँवा लिम्बू
नेकपा एमालेका नेता तथा वैदेशिक रोजगार व्यवसायी लाल प्रसाद (एलपी) साँवा लिम्बू झापा–४ बाट प्रतिनिधि सभा सदस्यमा निर्वाचित भएका छन्।

२९ हजार ३१५ मत ल्याउँदै निर्वाचित भएका लिम्बूले नेपाली कांग्रेसका देउकुमार देवेलाई पराजित गरेका हुन्। देवेले २२ हजार ४४८ मत प्राप्त गरेका छन्। ५५ वर्षीय लिम्बू एमालेको प्रदेश १ कमिटीका सदस्यसमेत हुन्। दोस्रो संविधान सभा निर्वाचनदेखि उनी संघीय सांसदको प्रतिस्पर्धामा उत्रिएका थिए। यद्यपि २०७० मा भने उनी पराजित भए। २०७४ मा भने निर्वाचित भएका थिए।

कृष्णकुमार श्रेष्ठ (किसान)
एकीकृत समाजवादी पार्टीका कृष्णकुमार श्रेष्ठ (किसान) विभिन्न व्यवसायमा आबद्ध छन्। उनी यसअघि श्रम रोजगार तथा सामाजिक सुरक्षामन्त्री समेत बनिसकेका छन्। उनी बारा निर्वाचन क्षेत्र–४ बाट २० हजार २९७ मत ल्याउँदै निर्वाचित भएका हुने। उनीसँग पराजित भएका नेकपा एमालेका एकवाल मियाँले १३ हजार ८६३ मत ल्याए।

५४ वर्षीय श्रेष्ठ नेकपा एकीकृत समाजवादीका वैकल्पिक केन्द्रीय सदस्य हुन्। २०३८ सालमा अनेरास्ववियूमा आबद्ध भएर राजनीति सुरु गरेका उनी एमालेको जिल्ला कमिटीमा रहेर जिम्मेवारी सम्हालेका थिए।

२०७८ भदौमा नेकपा एकीकृत समाजवादी गठन भएपछि भने उनी सो पार्टीमा लागेका हुन्। २०७४ मा सम्पन्न प्रतिनिधि सभा निर्वाचनमा उनी तनहुँ–१ बाट निर्वाचित भएका थिए।

विक्रम पाण्डे
६९ वर्षीय पाण्डे राष्ट्रिय प्रजातन्त्र पार्टीका उपाध्यक्ष हुन्। निर्माण व्यवसायीको रुपमा पनि उनी परिचित छन्। प्रतिनिधि सभा निर्वाचनमा चितवन–३ बाट उम्मेदवार बनेका पाण्डे माओवादी केन्द्रका डा भोजराज अधिकारीलाई हराउँदै प्रतिनिधि सभा सदस्यमा निर्वाचित भएका छन्।

विजयी भएका पाण्डेले ३५ हजार ५५ मत ल्याए। उनका प्रतिस्पर्धी माओवादी केन्द्रका डा अधिकारीले २५ हजार ८२२ मत ल्याए। सत्ता गठबन्धनका उम्मेदवार माओवादीका डा अधिकारीलाई ९ हजार २३३ मतको अन्तरले पराजित गर्दै राप्रपाका पाण्डेले प्रतिनिधि सभाको सिट सुरक्षित गरेका हुन्।

चितवन ३ बाट यसअघि २०७४ सालको चुनावमा माओवादी केन्द्रका अध्यक्ष पुष्पकमल दाहाल प्रचण्ड विजयी भएका थिए। पाण्डे प्रचण्डसँग ९ हजार ३४१ मतको अन्तरले पराजित भएका थिए।

प्रचण्डले ४८ हजार २७६ मत ल्याएका थिए भने पाण्डे ३८ हजार ९३५ मतमा सीमित भएका थिए। उनी २०७३ मा भूमिसुधार तथा व्यवस्था र २०७४ मा वन तथा भू–संरक्षण मन्त्री भएका थिए।

बालकृष्ण शिवाकोटी
यस्तै व्यवसायी तथा नेकपा एमालेका नेता बालकृष्ण शिवाकोटी दोलखाबाट प्रतिनिधि सभाका लागि उम्मेदवार बनेका छन्। विवादका कारण उनको क्षेत्रमा हालसम्म पनि मतगणना हुन सकेको छैन।

जित्न नसकेका उमेश श्रेष्ठ
व्यवसायी तथा नेपाली कांग्रेसका केन्द्रीय सदस्यसमेत रहेका उमेश श्रेष्ठले चितवन क्षेत्र नम्बर २ बाट उम्मेदवारी दिएका थिए। सत्तारुढ गठबन्धनबाट उम्मेदवार बनेका श्रेष्ठलाई राष्ट्रिय स्वतन्त्र पार्टीका उम्मेदवार रवि लामिछानेले पराजित गरेका हुन्। श्रेष्ठ घद्ध हजार १७० मतान्तरले पराजित भएका छन्।

व्यवसायीका रुपमा उनले शिक्षा, पर्यटन, ऊर्जा र बैंकिङ क्षेत्रमा लगानी गरेका छन्। निजी तथा आवासीय विद्यालय संगठन (प्याब्सन) र निजी उच्च माध्यमिक विद्यालयहरुको संगठन (हिसान) का पूर्वअध्यक्ष पनि हुन्।

उनी २०७० र २०७४ मा समानुपातिकबाट सांसद भएका थिए। वर्तमान मन्त्रिपरिषद्को कार्यालयमा राज्यमन्त्री छन्। उनी त्यसअघि स्वास्थ्य तथा जनसंख्या राज्यमन्त्रीसमेत भएका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।