फाइल फोटो
काठमाडौं- मंसिर ४ गते सम्पन्न प्रतिनिधि सभा निर्वाचनमा अपेक्षित नतिजा हासिल गर्न नसकेका दुई प्रमुख कम्युनिस्ट पार्टीका अध्यक्षबीच फोन संवाद भएको छ। बिहीबार एमाले अध्यक्ष केपी शर्मा ओलीले माओवादी केन्द्रका अध्यक्ष पुष्पकमल दाहाललाई फोन गर्दै आगामी राजनीतिक कार्यदिशाको विषयमा छलफल गरेका हुन्।
प्रत्यक्षतर्फ १०० सिट हासिल गर्ने लक्ष्य बोकेको एमाले र समग्रमा बलियो तेस्रो शक्ति बन्ने लक्ष्य राखेको माओवादी केन्द्र दुवैले सोचेभन्दा कमजोर नतिजा निकालेका छन्। जारी मतगणनाबाट उनीहरुले थप उत्साहित हुने स्थिति छैन। त्यसैलाई संकेत गर्दै ओलीले प्रचण्डसँग भनेको विषय उद्धृत गर्दै प्रचण्डको सचिवालयले भन्यो, 'अब के गर्ने?'
प्रचण्डले आफूहरू गठबन्धन गरेर चुनावमा सहभागी भएकाले गठबन्धनप्रति प्रतिबद्ध रहेको बताए पनि ओलीकाे प्रश्नको जवाफ भने प्रष्टसँग दिएनन्। बरु उनले व्यक्तिगत चुनावी नतिजाको लागि ओलीलाई बधाई दिएका थिए। 'भर्खर चुनाव जितिएको छ', प्रचण्डले ओलीलाई भने, 'तपाईंले पनि राम्रैसँग जित्नुभएको छ। बधाई छ।'
बिहीबार नै प्रधानमन्त्री देउवाले पनि प्रचण्डलाई फोन गरेको उनको सचिवालयले बताएको छ। दुई नेताबीच पनि बधाई साटासाट भएको थियो।
नेकपा विभाजनपछि ओली र प्रचण्डबीच तिक्ततापूर्ण सम्बन्ध रहिआएको छ। सार्वजनिक भाषणहरूमा उनीहरूले एकअर्काको आलोचना गर्ने गरेका छन्। त्यसो त २०७४ मा वाम गठबन्धन बनाउने निर्णय लिनुअघि पनि उनीहरु कटाक्षमा उत्रिने गरेका थिए। नेकपा गठनपछि केही समय दुई बीचको सम्बन्ध सौहार्द्रपूर्ण भए पनि विस्तारै तिक्तता बढेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
