काठमाडौं– चितवन- २ मा रवि लामिछाने भारी मतान्तरणले विजयी भएका छन्। उनी नवगठीत राष्ट्रिय स्वतन्त्र पार्टीका सभापति हुन्।
लामिछानेले ४९ हजार २६१ मत ल्याउँदा उनका निकटतम् प्रतिनिधि सत्तारूढ गठबन्धनका तर्फबाट उम्मेदवार रहेका उमेश श्रेष्ठको १५ हजार ९९ मत आएको छ। लामिछाने ३४ हजार १ सय ७० मतान्तर कायम गर्दै विजयी भएका छन्।
को हुन् लामिछाने
४७ वर्षीय लामिछाने टेलिभिजनकर्मीका रुपमा परिचित थिए। उनको कार्यक्रमले प्रशस्तै मात्रामा चर्चा र प्रशंसा पाउने गरेका थिए। पछिल्लो समय उनी ‘ग्यालेक्सी फोरके टेलिभिजन’मा ‘सिधा कुरा’ कार्यक्रम चलाउँथे। त्यसअघि ‘न्युज ट्वान्टीफोर टेलिभिजन’मा ‘सिधा कुरा जनतासँग’ कार्यक्रम चलाउँथे। कार्यक्रममा साधारण मान्छेका समस्या र सवाललाई प्राथमिकता दिएका कारण उनी चर्चामा थिए।
त्यसअघि उनले तत्कालीन प्रधानमन्त्री केपी शर्मा ओलीको पालामा २०७३ वैशाख ११ देखि ‘सिधा कुरा प्रधानमन्त्रीसँग’ कार्यक्रम चलाउँथे।
लामिछानेले २०६९ चैत २९ देखि लगातार ६० घण्टा १२ मिनेट अन्तर्वार्ता कार्यक्रम चलाएका थिए। ‘बुद्ध नेपालमा जन्मेका हुन् भन्ने सन्देश’ दिन सञ्चालन गरिएको सो कार्यक्रमले विश्व कीर्तिमान कायम गरेको थियो।
उनी झन्डै एक दशक अमेरिका बसेर सन् २०१७ मा नेपाल फर्किएका हुन्।
टेलिभिजनमा कार्यक्रममार्फत लोकप्रिय रहेकै बेला उनले आफू आबद्ध ग्यालेक्सी फोरके टेलिभिजनबाट राजीनामा दिएर २०७९ असार ७ गते काठमाडौंको राष्ट्रिय सभागृहमा राष्ट्रिय स्वतन्त्र पार्टीको घोषणा गरेका थिए।
पत्रकार शालिकराम पुडासैनीको आत्महत्या दुरुत्साहन मुद्दाबाट ५ लाख धरौटीमा रिहा भएपछि २०७६ भदौ १० मा उनले चितवनमा धन्यवाद सभामा आयोजना गरेका थिए। त्यतिबेला उनको सभामा ठूलो संख्यामा मानिसहरु उपस्थित भएका थिए। त्यतिबेलै लामिछाने राजनीतिमा जोडिने आकलन गरिएको थियो। चितवन– २ मा उम्मेदवारी दिनुलाई उनले सोही प्रसंगसँग जोडेर प्रतिक्रिया दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
