शीर्ष नेतालाई चुनौती दिने महामन्त्रीको जित, ‘एसम्यान’ महासचिवहरुको हार

निर्वाचन विशेष

डिबी खड्का बिहीबार, मंसिर ८, २०७९ ११:५४

काठमाडौं– निर्वाचन परिणाम उत्तरार्द्धतिर आइपुगेको छ। नतिजा आउने क्रम जारी रहँदा केही नतिजा सन्देशपूर्ण देखिएका छन्।

पार्टीका विरासत, गढ र किल्लाबाट बाहिर आएर मतदाताले निर्णय गरेका छन्। निर्णय गर्ने क्रममा केही राजनीतिक सन्देश पनि दिएका छन्।

बहुदलपछि नै नेपाली राजनीतिको केन्द्रमा रहेका शीर्ष तीन दललाई मतदाताले सबक सिकाएका छन्। सबक सिकाउने क्रम पनि केही अर्थपूर्ण देखिएको छ। ‘पकेट क्षेत्र’मा चुनाव लडेका कारण शीर्ष नेताहरु जोगिए पनि उनीहरुका 'एसम्यान'हरु भने पराजित भएका छन्।

प्रश्न गर्ने महामन्त्रीको जित
नेपाली कांग्रेसमा शेरबहादुर देउवा सभापति छन्। देउवाको कार्यशैली आमजलाई चित्त बुझिरहेको छैन। तर, कांग्रेसमा बलियो गुट बनाएर बसेका उनलाई महाधिवेशनबाट कांग्रेसजनले पाखा लगाउन सकेनन्। तर, देउवाको विपक्षी गुटबाट महामन्त्रीमा प्रतिस्पर्धा गरेर गगन थापा र विश्वप्रकाश शर्माले जिते।

उनीहरुले चुनावअघि नै देउवालाई चुनौती दिइसकेका छन्। आगामी संसदीय दलको निर्वाचनमा महामन्त्री गगन थापाले देउवासँग प्रतिस्पर्धा गर्ने घोषणा गरेका छन्।

थापालाई उक्त पदमा प्रतिस्पर्धा गर्न आफूले प्रस्ताव गर्ने शर्माले बताएका छन्। थापालाई जितको शुभकामना दिँदै शर्माले भनेका छन्, 'जसलाई मैले संसदीय दलको नेता हुँदै नेपाल देशको प्रधानमन्त्री पदमा प्रस्ताव गर्नुछ!'

महामन्त्री थापाले नेकपा एमालेका उम्मेदवार राजन भट्टराईलाई ७ हजार भन्दा बढी मतान्तरले हराएका हुन्। थापाले २१ हजार ३०२ मत ल्याए भने एमालेका भट्टराईले १३८५५ मत ल्याएका थिए।

यसैगरी कांग्रेस महामन्त्री शर्माले कम्युनिस्टको गढ मानिने झापा- १ मा एमालेका अग्नि खरेललाई १४ हजार दुई सय ७५ मतले पराजित गरे। शर्माले ३९ हजार छ सय २४ मत ल्याउँदा निकटतम प्रतिद्वन्द्वी खरेलले २५ हजार तीन सय ४९ मत मात्रै पाए।

महासचिवहरुको हार
शीर्ष तीन दलमध्ये दुई नेकपा एमाले र माओवादी केन्द्रका महासचिवहरुले हारेका छन्। एमाले महासचिव शंकर पोखरेलले माओवादी केन्द्रकी रेखा शर्मासँग हार बेहोरेका हुन्। लुम्बिनी प्रदेशका पूर्व मुख्यमन्त्री समेत रहेका पोखरेलको हार एमालेका लागि अनपेक्षित हो।

दाङ राजधानी सारेको जस पाउने पोखरेललाई लागेको थियो। त्यसैमाथि प्रभावशाली मानिएका महरा पछि हट्दा शर्मा उम्मेदवार बन्नुपरेको थियो। पोखरेललाई निर्वाचनअघि नै प्रभावशाली नेताको रुपमा प्रस्तुत गरिएको थियो। जसले शर्मामाथि दबाब बढाएको थियो। त्यसलाई खण्डन गर्दै शर्माले नेपाल लाइभसँगको अन्तर्वार्तामा भनेकी थिइन्- निर्वाचन 'वेट'ले होइन, अजेन्डाले लडिन्छ। निर्वाचन परिणामले उनको अजेन्डाकै अनुमोदन भएको देखियो।

महासचिव पोखरेलको हार एमालेलाई मात्रै होइन, अध्यक्ष केपी शर्मा ओलीका लागि पनि ठूलो झट्का हो। किनभने एमालेमा आफ्नो विरासत पोखरेलमा सार्नेगरी उनलाई महासचिव मनोनित गरिएको थियो। नेकपाकालमै महासचिव बनेका विष्णु पौडेल प्रतिस्पर्धी भए पनि उपाध्यक्षमा सर्नुपरेको थियो। दुईबीचको प्रतिस्पर्धाको संकेत निर्वाचनअघि पनि देखियो। राजधानीका विषयलाई लिएर उनीहरुले दोहोरी नै खेलेका थिए।

शीर्ष नेताहरुले गिजोल्दै गएको राजनीतिलाई सुधार्न होइन, अन्ध साथ दिन अघि बढेका पोखरेललाई आम मतदाताले नै सबक सिकाएको रुपमा लिन सकिन्छ, यो परिणामलाई।

माओवादी केन्द्रलाई त समग्रमै ठूलो झट्का लाग्यो। त्यसैमा अध्यक्ष पुष्पकमल दाहाल प्रचण्डका 'एसम्यान' देव गुरुङ हारेका छन्। पार्टीमा महासचिवका लागि प्रतिस्पर्धा गरिरहेका बर्षमान पुन र जनार्दन शर्मालाई पाखा लगाउँदै गुरुङ प्रचण्डको छनौटमा परेका थिए। गुरुङ एमाले उपमहासचिव पृथ्वी सुब्बा गुरुङसँग लमजुङमा पराजित भएका हुन्।

एकीकृत समाजवादीका महासचिव तथा राष्ट्रिय सभा सदस्य बेदुराम भुसाल प्रतिनिधि सभाको यो निर्वाचनमा मैदानमा थिएनन्। चुनावी मैदानमा रहेका उपमहासचिव जीवनराम श्रेष्ठ, सचिवद्वय जगन्नाथ खतिवडा र रामकुमारी झाँक्री पराजित भएका छन्।