काठमाडौं– मंसिर ४ गते भएको प्रतिनिधि सभाको निर्वाचनको अन्तिम नतिजा आउनेक्रम जारी छ।
हालसम्म ६३ स्थानको अन्तिम नतिजा सार्वजनिक भएको छ। अहिलेसम्म नेपाली कांग्रेसले २५ स्थानमा जित हात पारेको छ। त्यस्तै नेकपा एमालेले १५ स्थानमा जित हात पारेको छ।
माओवादी केन्द्रले ७ स्थानमा जितेको छ भने एकिकृत समाजवादीले ६ स्थानमा र राष्ट्रिय स्वतन्त्र पार्टीले ४ स्थानमा, राप्रपाले २ स्थानमा जितेको छ।
यो निर्वाचनमा नेकपा एमालेका केही प्रभावशाली नेताले पराजय भोगेका छन् भने केही मतगणनामा पछि परेका छन्।
वरिष्ठ उपाध्यक्ष ईश्वर पोखरेल, महेश बस्नेतले पराजय भोगेका छन् भने महासचिव शंखर पोखरेल लगायत केही नेताहरू मतगणनामा पछाडि परिरहेका छन्।
नेकपा एमालेबाट यसपटक ६ जना नयाँ अनुहारले प्रतिनिधि सभामा प्रवेश पाउने भएका छ्न्।
उदयपुर–२ मा प्रतिनिधि सभामा निर्वाचित भएका अम्बरबहादुर रायमाझी नयाँ अनुहार हुन्। एकिकृत समाजवादीका जगनाथ खतिवडालाई पराजित गर्दै उनी विजयी भएका हुन्। कुनै समय नेकपा एमालेका सहकर्मी रहेका खतिवडा र रायमाझी चुनावी प्रतिस्पर्धामा आमुन्ने सामुन्ने भएका थिए।
५३ वर्षीय रायामाझी नेकपा एमालेको प्रदेश–१ कमिटीका सचिवालय सदस्य हुन्। त्यस्तै अर्का नयाँ अनुहार हुन् मकवानपुर–२बाट निर्वाचित महेशकुमार वर्तौला। उनले एकीकृत समाजवादीका उम्मेदवार विरोध खतिवडालाई पराजित गरे।
‘हेविवेट’ एवम् उक्त क्षेत्रमा पुराना कम्युनिष्ट नेता खतिवडालाई हराउँदै उनी सांसदका रुपमा पहिलो पटक आउन लागेका हुन्। कुनै समय राजनीनिक गुरु मानेका खतिवडालाई हराउने चेला भएका छन्।
४० वर्षीय वर्तौला नेकपा एमालेको बागमती प्रदेश कमिटी सदस्य हुन्। उनी अनेरास्वियुको केन्द्रीय उपाध्यक्ष समेत थिए। एमालेबाट अर्का नयाँ अनुहार हुन् ललितपुर–२बाट निर्वाचित प्रेमबहादुर मर्हजन।
उनी यसअघि केन्द्रीय राजनीतिमा अवसरबिहीन थिए। एमाले विभाजनको समयमा उनी सुरुमा एकीकृत समाजवादीतिर लागेका थिए । पछि उनी नेकपा फर्कर्दै ललितपुरमा टिकट पाएर त्यसलाई जितमा बदल्न सफल भए।
सत्ता गठबन्धनबाट एकीकृत समाजवादीको भागमा परेको उक्त क्षेत्रमा स्वतन्त्र उम्मेदवारसँग उनको प्रतिस्पर्धा भएको थियो। यो पटक अर्का नयाँ अनुहार हुन् सूर्य थापा। पत्रकार हुँदै संसदीय राजनीतिमा प्रवेश गरेका थापा प्यूठानबाट निर्वाचित भएका हुन्।
थापाले राष्ट्रिय जनमोर्चाकी उपाध्यक्ष दुर्गा पौडेललाई पराजित गर्दै प्रतिनिधि सभाको प्रवेश पक्का गरे। बासुदेव घिमिरेले रुपन्देही–५ बाट निर्वाचित हुँदै प्रतिनिधि सभामा नयाँ अनुहारको रुपमा प्रवेश पाएका छन्।
मंसिर ४को निर्वाचनमा उम्मेदवारी दर्ता गर्ने क्रममा नेकपा एमालेले दुईवटा नाम दर्ता गरेपछि उनले झन्डै गुमाएका थिए। राष्ट्रिय सभा सांसद खेमलाल भट्टराईले पनि अन्तिम समयमा उम्मेदवारी दर्ता गराएका थिए।
तर निर्वाचन आयोगले घिमिरेको कायम गरेको थियो। उनी तिलोत्तमा नगरपालिकाका पूर्वमेयर हुन्। नुवाकोट–१बाट निर्वाचिन बद्री मैनाली पनि प्रतिनिधि सभाका लागि नयाँ अनुहार हुन्। ४६ वर्षीय मैनाली नेकपा एमाले नुवाकोटका जिल्ला कमिटीका अध्यक्ष हुन्।
२०७४ को प्रदेश सभा निर्वाचनामा नुवाकोट– १ (२)बाट निर्वाचित हुँदै उनी अष्टलक्ष्मी शाक्य बागमती प्रदेशको मुख्यमन्त्री हुँदा कृषि तथा सहकारी मन्त्री भएका थिए।
उनले माओवादी केन्द्रका उम्मेदवार हितबहादुर तामाङलाई पराजित गर्दै प्रतिनिधि सभाको बाटो तय गरेका हुन्।
यी हुन् एमालेका जित हात पार्ने नयाँ सांसद
अम्बरबहादुर रायमाझी उदयपुर–२ नयाँ
महेशकुमार बर्तौला मकवानपुर–२ नयाँ
प्रेमबहादुर महर्जन ललितपुर २ नयाँ
सूर्य थापा प्युठान नयाँ
बासुदेव घिमिरे रुपन्देही–५ नयाँ
बद्री मैनाली नुवाकोट– १ नयाँ
पुरानै सांसद
केपी शर्मा ओली झापा–५
योगेश भट्टराई ताप्लेजुङ
राजकुमार गुप्ता पर्सा –३ पुनरागमन
कृष्णगोपाल श्रेष्ठ काठमाडौ–९
विद्या भट्टराई कास्की–२
पदम गिरि पर्वत
पृथ्वीसुव्वा गुरुङ लमजुङ
टोपबहादुर रायमाझी अर्घखाँची
गोकर्ण विष्ट गुल्मी–२
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
